The Phnom Penh Post Search

Search form

Logo of Phnom Penh Post newspaper Phnom Penh Post - តុ​លាការ​កំពូល​ជំនុំ​ជម្រះ​រឿង​ក្តី​លោក​សែម​សុ​វណ្ណ​ដេត​




តុ​លាការ​កំពូល​ជំនុំ​ជម្រះ​រឿង​ក្តី​លោក​សែម​សុ​វណ្ណ​ដេត​

តុ​លាការ​កំពូល​ជំនុំ​ជម្រះ​រឿង​ក្តី​លោក​សែម​សុ​វណ្ណ​ដេត​

ភ្នំពេញៈ តុលាការកំពូល​កាល​ពី​ម្សិល​មិញ​បាន​បើកជំនុំ​ជម្រះ​រឿងក្តី​ លោក​ សែម ​សុវណ្ណ​ដេត ​អតី​ត​នា​យក​​ប្រ​តិបត្តិ​វិទ្យុ​និង​​ទូរទស្សន៍​​អាស៊ីអា​គ្នេយ៍​​ ពាក់​ព័ន្ធ​នឹង​ការ​កាន់​កាប់​ដី​ព្រៃអភិ​រក្សក្នុង​ខេត្ត​កំពត​​ ៤០០​ ហិក​តា ​ ​ដែល​ករណី​នេះ​សាលាដំបូង​ខេត្ត​កំពត ​បាន​ផ្តន្ទា​ទោស​​ដាក់​ពន្ធនា​គារ​៨​ឆ្នាំ​ និង​ពិន័យ​ប្រាក់​ចំនួន​២០​លាន​រៀល ​ហើយ​​សា​លា​ឧទ្ធរណ៍​​បាន​​តម្កល់​សេចក្តី​សម្រេច​នេះ​។

លោក ​ពត ​ផា​ណាល់​ នាយ​រង​ខណ្ឌ​រដ្ឋបាល​ព្រៃឈើ​ខេត្ត​កំពត​ ​ជា​ដើម​បណ្តឹង​ដំបូង​​​រៀបរាប់​ក្នុង​​សវនា​ការដែល​អវត្តមានលោក សែម​ សុវណ្ណ​ដេត​ ថា ​ដី​ព្រៃ​នោះ​ស្ថិត​នៅ​ភូមិ​ព្រៃ​ប៉ាយ​ ឃុំ​ត្រពាំង​ព្រាយ ​ស្រុក​ឈូក ​ខេត្ត​កំពត ​មាន​ទំហំ១.០​៦៣ ​​ហិកតា​ ត្រូវ​អ្នក​ស្រុក​រុក​​រាន​អស់​១៣៨​ហិកតា​ និង​មាន​ខ្លះ​មករស់​នៅលើ​ដី​នោះ​ផង​។ ​នៅ​ឆ្នាំ​២០០៤ ​លោក ​​សុវណ្ណ​​ដេត​ បាន​ប្រមូល​ទិញ​ដី​​នោះ​ពី​ពលរដ្ឋ​ហើយ​ឈូស​ឆាយ​​គ្រោង​បង្កើត​ជា​ក្រុម​ហ៊ុន​នៅ​លើដី​នោះ​​ក្នុង​ខែ​មីនា ​ឆ្នាំ២​០០៥​។

លោក​បន្ត​ថា​៖​«​ដីព្រៃ​នោះ​ជា​​តំ​ប​ន់សត្វ​ព្រៃ​ឆ្លង​កាត់​និង​ជា​ជម្រក​សត្វ​ព្រៃ​ផង។ ពី​ដំបូង​ដី​ព្រៃ​នោះ​ជា​​ដីសម្បទាន​សង្គម​កិច្ច​របស់រដ្ឋ​ ដែល​​​ផ្ទៃដី​៦០០​ហិកតា​ ក្នុង​ដី​ ១.០៦៣ ​​ហិកតា​ បាន​បម្រុង​ទុក​សម្រាប់​​គ្រួសារ​​ទ័ព​ជើង​ទឹក​»។

លោក​ ផា​ណាល់ ថ្លែង​ទៀត​ថា ​ការកាន់​​កាប់​រុក​រាន​ដីខុស​ច្បាប់​ ​របស់​លោក សុ​វណ្ណ​ដេត ខាង​សមត្ថ​កិច្ច​លោកចុះទៅ​​ហាម​គាត់​ដល់​ទៅ​៣​លើក​​ ​តែ​គាត់​នៅ​តែ​បន្ត​សកម្ម​ភាព​​រុករានរហូត ​​​ទី​ស្តី​​​កា​រ​គ​ណៈ​​​រដ្ឋម​ន្រ្តីឲ្យចុះ​ស៊ើប​អង្កេត​ឲ្យផ្អា​ក​ប​ណ្តោះអា​សន្ន​សិន​។

លោក​ ផា​ណាល់​ ថ្លែង​ថា ​នៅ​ឆ្នាំ​​២០០៥​ ​រដ្ឋបាល​ព្រៃ​ឈើខេត្ត​ប្តឹ​ងទៅ​សាលា​ដំបូ​​ង​​ខេ​ត្ត​​ហើយ​តុលាការក៏​បាន​សម្រេច​ទោ​ស​ដាក់​ពន្ធ​នាគារលោក​ សែម សុវណ្ណ​ដេត​ចំនួន ៨​ឆ្នាំ​និង​ពិន័យ​ជា​​ប្រាក់​​​២០​លាន​រៀល ​តែ​ត្រូវ​​លោក ​ប្តឹង​ទាស់​ទៅ​​សាលាឧ​ទ្ធរណ៍​​និង​ប្តឹង​សារ​ទុក្ខ​មក​តុលាកា​រ​កំពូល​ ព្រោះ​តែ​​សាលា​ឧទ្ធរ​ណ៍តម្កល់​​សេចក្តី​សម្រេច​សាលា​ដំបូង​។

លោក ​ហ៊ុយ ​ផា​រី​ មេធា​វី​ដែល​បំ​ពេញ​នីតិ​វិ​ធី​​​ដើម​បណ្តឹង​សារទុក្ខ​លោក​សែម ​សុវណ្ណ​​ដេត​ ថ្លែង​ក្នុង​សវនា​ការថា ​លោកស្នើ​​ឲ្យតុ​លា​ការ​កំពូល​លើក​លែង​បទ​ចោទ​និង​សុំ​ឲ្យកូ​ន​ក្តី​មាន​សេរីភាព ​ហើយ​សុំឲ្យ​ខាង​រដ្ឋ​បាលព្រៃ​ឈើខេ​ត្ត​កំ​ពត​ដក​ពាក្យ​បណ្តឹ​ង​វិញ​ ដោយ​លោកសំអាងថា ​កូន​ក្តី​លោកបាន​ប្រមូល​ទិញ​ដីពីប្រ​​ជាពល​​រដ្ឋ​មាន​លិខិត​ទិញ​លក់​ត្រឹមត្រូវ​និង​មាន​ការ​ទទួល​ស្គាល់​​ពីអាជ្ញា​ធ​រមូលដ្ឋាន​រហូត​ដល់​​ថ្នាក់​ខេត្ត​។​

​ប្រ​ធាន​​ចៅក្រម​ជំនុំ​ជម្រះ ប្រកាសថា ​សាល​ដីកាសវនាការ​នេះ​​ នឹង​លើក​យក​ទៅប្រ​កាស​នៅ​ថ្ងៃ​ទី​៣​ ខែ​មេសា ​ខាង​មុ​ខ​។

​លោក ​សែម ​សុវណ្ណ​ដេត ​ធ្លាប់​ត្រូ​វ​​​​អគ្គ​នាយ​ក​វិទ្យុ​​ទូរ​ទស្ស​ន៍​អា​ស៊ី​អាគ្នេយ៍លោក ​កៅ គឹ​ម​ហួន​ ប្តឹង​ពីប​ទរំលោ​ភលើសេ​ចក្តីទុ​កចិ​ត្ត ​ទាក់​ទងនឹង​ការកេង​ប្រវ័ញ្ច​ប្រា​ក់​ពីស្ថានី​យ និ​ងត្រូ​វតុលាកា​រកាត់​ឲ្យជា​ប់ទោស​ដាក់​ពន្ធ​នាគារ​ ៣​ឆ្នាំ៦​ខែ និ​ងប​ង្គាប់​ឲ្យស​ង​ប្រាក់​ ៤,៧​លាន​ដុល្លារនិ​​ងស​ងជំងឺ​ចិត្ត​ចំនួន​២​៥ម៉ឺន​ដុ​ល្លារ​៕

អត្ថបទគួរចាប់អារម្មណ៍