The Phnom Penh Post Search

Search form

Logo of Phnom Penh Post newspaper Phnom Penh Post - ទណ្ឌិត​ស្រ្តី​ជាតិ​វៀតណាម​ដែល​មាន​ឈ្មោះ​លើក​លែង​ទោស​ស្លាប់​មុន​មាន​សេរីភាព




ទណ្ឌិត​ស្រ្តី​ជាតិ​វៀតណាម​ដែល​មាន​ឈ្មោះ​លើក​លែង​ទោស​ស្លាប់​មុន​មាន​សេរីភាព

ទណ្ឌិត​ស្រ្តី​ជាតិ​វៀតណាម​ដែល​មាន​ឈ្មោះ​លើក​លែង​ទោស​ស្លាប់​មុន​មាន​សេរីភាព

ភ្នំពេញៈ ទណ្ឌិត​ស្ត្រី​ជនជាតិ​វៀតណាម​ម្នាក់​ដែល​ព្រះមហាក្សត្រ​សម្រេច​ព្រះរាជទាន​លើកលែង​ទោស​ផ្អែក​លើ​គោលការណ៍​មនុស្ស​ធម៌ និង​តាម​ការ​ស្នើ​សុំ​របស់​អង្គការ​លីកាដូ​ត្រូវ​បាន​មន្ត្រី​លីកាដូ​អះអាង​ថា​បាន​ស្លាប់​ដោយ​សារ​ជំងឺ​មហារីក​មុន​ពេល​អនុញ្ញាត​ឲ្យ​មាន​សេរីភាព​វិញ​។

ការ​ស្នើ​សុំ​របស់​លីកាដូ​ត្រូវ​បាន​ធ្វើ​ឡើង​តាមរយៈ​លិខិត​ចុះ​ថ្ងៃ​ទី​ ២៣​ ខែ​កុម្ភៈ​ឆ្នាំ ២០១៥ ដោយ​ប្រធាន​អង្គការ​លីកាដូ​លោកស្រី ពុង ឈីវកេក ក្រោម​ហេតុផល​ថា​ទណ្ឌិត​ដែល​ជា​ស្ត្រី​ជនជាតិ​វៀតណាម​ឈ្មោះ ទី គឹមហឿង កំពុង​ប្រឈម​នឹង​ជំងឺ​មហារីក​សុដន់​ដំណាក់​កាល​ចុងក្រោយ និង​ដោយសារ​ទណ្ឌិត​នោះ​ត្រូវ​បាន​ចាប់​ឃុំ​ខ្លួន​តាំងពី​ខែ​មិថុនា​ឆ្នាំ​ ២០០៩​ និង​បាន​ជាប់​ពន្ធនាគារ​អស់​ពេល​ជាង​ ៥ ​ឆ្នាំ ៨ ​ខែ​រួច​មក​ហើយ។

យ៉ាង​ណា​មិញ​ព្រះរាជក្រឹត្យ​របស់​ព្រះមហាក្សត្រ​តាម​ការ​ស្នើសុំ​របស់​លោក​នាយករដ្ឋមន្ត្រី​ចុះ​ថ្ងៃ​ទី ១៦ ខែ វិច្ឆិកា ឆ្នាំ​ ២០១៥ ក៏​បាន​សម្រេច​លើក​លែង​ទោស​ទណ្ឌិត ទី គឹមហឿង ដោយ​ផ្អែក​តាម​គោលការណ៍​ច្បាប់ និង​គោលការណ៍​មនុស្ស​ធម៌​តែ​យ៉ាង​ណា​ក៏ដោយ​ទណ្ឌិត​រូប​នេះ​ត្រូវ​បាន​មន្ត្រី​អង្គការ​លីកាដូ​អះអាង​ថា​បាន​ស្លាប់​ដោយសារ​ជំងឺ​នោះ​តាំង​ពី​ថ្ងៃ​ទី​ ៨ ខែ​តុលា​ម្ល៉េះ​។

អ្នក​គ្រប់គ្រង​បច្ចកទេស​ឃ្លាំ​មើល​សិទ្ធិ​មនុស្ស​អង្គការ​លីកាដូ​លោក អំ សំអាត បាន​សម្តែង​ការ​សោកស្តាយ​ចំពោះ​ភាព​យឺតយ៉ាវ​នៃ​យន្តការ​អនុវត្ត​នីតិវិធី​របស់​អាជ្ញាធរ​មាន​សមត្ថកិច្ច​ដែល​អូស​បន្លាយ​ពេលវេលា​រហូត​ដល់​ទណ្ឌិត​ដែល​ជា​ជនរងគ្រោះ​នៃ​ជំងឺ​មហារីក​សុដន់​ដំណាក់​ចុង​ក្រោយ​នេះ​មិន​អាច​ទទួល​បាន​សេរីភាព​មុន​បាត់បង់​ជីវិត។

លោក​ថា៖ «យើង​សង្ឃឹម​ថា​ក្នុង​ករណី​ដូច​គ្នា​នេះ​នៅ​ពេល​ក្រោយ​មន្ត្រី​ពាក់ព័ន្ធ​គួរ​រៀបចំ​របាយការណ៍ និង​បញ្ជាក់​ឲ្យ​បាន​ច្បាស់លាស់​ដើម្បី​អាច​ឲ្យ​សម្តេច​នាយក​រដ្ឋមន្ត្រី​អាច​ស្នើសុំ​ហើយ​ព្រះមហាក្សត្រ​អាច​ព្រះរាជទាន​លើកលែង​ទោស​មុន​ពេល​ទណ្ឌិត​ស្លាប់​បែប​នេះ»។

យ៉ាង​ណា​ក៏ដោយ​​អ្នក​នាំពាក្យ​ក្រសួង​យុត្តិធម៌​លោក ជិន ម៉ាលីន បាន​ឲ្យ​ដឹង​ពី​ម្សិលមិញ​ថា​លោក​នៅ​មិន​ទាន់​អាច​សន្និដ្ឋាន​ថា​ទណ្ឌិត​រូប​នោះ​ស្លាប់​នៅ​ឡើយ​ទេ​ប៉ុន្តែ​លោក​ថា៖ «ការ​លើកលែង​ទោស​គឺ​ធ្វើ​តាម​គោលការណ៍​មនុស្សធម៌​ហើយ​ដំណើរការ​នៃ​ការងារ​នេះ​ពេល​ខ្លះ​គឺ​ត្រូវការ​ពេលវេលា​យូរ...ក្រសួង​យុត្តិធម៌​មាន​ការ​សោកស្តាយ​ប្រសិន​បើ​រឿង​នេះ​ជា​ការពិត»។

ភ្នំពេញ​ប៉ុស្តិ៍​មិន​អាច​សុំ​ការ​ឆ្លើយតប​ពី​មន្រ្តី​ពន្ធនាគារ​បាន​ទេ​ពាក់ព័ន្ធ​នឹង​ករណី​នេះ​។

ទណ្ឌិត ទី គឹមហឿង ភេទ​ស្រី អាយុ​ ៥០ ឆ្នាំ​ជនជាតិ​វៀតណាម​ និង​គូកន ​២ នាក់​ទៀត​ត្រូវ​បាន​សាលា​ដំបូង​ខេត្ត​សៀមរាប​កាលពី​ខែ​តុលា​ឆ្នាំ​ ២០១០ ផ្តន្ទាទោស​ដាក់​ពន្ធនាគារ​ ១០ ​ឆ្នាំ​ម្នាក់​ពី​បទ «សញ្ចារកម្ម​ទាក់ទង​នឹង​ពេស្យា​កុមារ» ពាក់ព័ន្ធ​នឹង​ការ​លក់​ក្មេងស្រី​ចំនួន ៣ នាក់​ឲ្យ​បម្រើ​ផ្លូវ​ភេទ​ក្នុង​ផ្ទះ​បន​មួយ​ក្នុង​ខេត្ត​សៀមរាប​។ ក្រោយ​មក​ដីកា​ស្ថាពរ​របស់​សាលា​ឧទ្ធរណ៍​ក៏​បាន​សម្រេច​តម្កល់​សាលក្រម​សាលា​ដំបូង​អនុវត្ត​ទោស​ដូច​គ្នា៕

អត្ថបទគួរចាប់អារម្មណ៍