The Phnom Penh Post Search

Search form




Logo of Phnom Penh Post newspaper Phnom Penh Post - ទណ្ឌិត​ម្នាក់​ហែក​គុក​រត់​បាន ២​ឆ្នាំ ត្រូវ​ចាប់​បញ្ចូល​គុក​វិញ

ទណ្ឌិត​ម្នាក់​ហែក​គុក​រត់​បាន ២​ឆ្នាំ ត្រូវ​ចាប់​បញ្ចូល​គុក​វិញ

ទណ្ឌិត​ម្នាក់​ហែក​គុក​រត់​បាន ២​ឆ្នាំ ត្រូវ​ចាប់​បញ្ចូល​គុក​វិញ

បាត់ដំបងៈ ទណ្ឌិត​ម្នាក់​ក្នុង​ចំណោម​បក្ខពួក​ចំនួន ៥ នាក់​ដែល​បាន​ហែក​គុក ខេត្ត​បាត់ដំបង រត់​គេច​ខ្លួន​កាល​ពី ឆ្នាំ​២០១២ ត្រូវ​បាន​សមត្ថកិច្ច​នគរបាល​ឃាត់​ខ្លួន​និង​បញ្ជូន​ទៅ​ឃុំ​ឃាំង​នៅ​ពន្ធនាគារ​វិញ កាល​ពី​ថ្ងៃ​សៅរ៍។

ស្នងការ​រង​នគរបាល ខេត្ត​បាត់ដំបង ទទួល​បន្ទុក​យុត្តិធម៌​លោក ជេត វណ្ណី បាន​ឲ្យ​ដឹង​កាល​ពី​ម្សិល​មិញ​ថា ការ​ឃាត់​ខ្លួន​នេះ បាន​ធ្វើ​ឡើង នៅ​ម៉ោង ៨ ព្រឹក​ថ្ងៃ​សៅរ៍ នៅ​តាម​ផ្លូវ​ត្រង់​ចំណុច ភូមិ​កុយវែង ឃុំ​ព្រះ​ផុស ស្រុក​គាស់ក្រឡ ខណៈ​ទណ្ឌិត​រូប​នេះ កំពុង​ធ្វើ​ដំណើរ​តាម​ផ្លូវ។ ទណ្ឌិត​រូប​នោះ​ឈ្មោះ នូ ប៉ូលីន អាយុ ៣៤​ឆ្នាំ បច្ចុប្បន្ន​រស់​នៅ ស្រុក​គាស់​ក្រឡ មាន​ស្រុក​កំណើត​នៅ ភូមិ​ជ្រៃកោង ឃុំ​ស្លាកែត ខេត្ត​បាត់ដំបង។

ទណ្ឌិត នូ ប៉ូលីន មាន​ជាប់​ពាក់​ព័ន្ធ​ពី​បទ​ល្មើស​ប្លន់​ម៉ូតូ នៅ ឆ្នាំ​២០០៤ និង​ត្រូវ​បាន​តុលាការ ខេត្ត​បាត់ដំបង កាត់​ទោស​ឲ្យ​ជាប់​ពន្ធនាគារ​រយៈ​ពេល ១០ ឆ្នាំ។ ប៉ុន្តែ​នៅ​ក្នុង​អំឡុង ខែ​មេសា ឆ្នាំ​២០១២ ទណ្ឌិត​រូប​នេះ​និង​ទណ្ឌិត ៤ នាក់​ផ្សេង​ទៀត បាន​ហែក​ពន្ធនាគារ​រត់​គេច​ខ្លួន​នៅ​ពេល​ដែល​មន្រ្តី​ពន្ធនាគារ​មាន​ការ​ធ្វេស​ប្រហែស​បន្ទាប់​ពី​ទណ្ឌិត​រូប​នេះ បាន​អនុវត្ត​ទោស​ក្នុង​ពន្ធនាគារ​បាន​ចំនួន ៨ ឆ្នាំ ៣ ខែ នៅ​សល់​ទោស​ត្រូវ​អនុវត្ត​ចំនួន ១ ឆ្នាំ ៩ ខែ​ទៀត។

ក៏​ប៉ុន្តែ​យ៉ាង​ណា​ក៏​ដោយ លោក ជេត វណ្ណី បាន​បញ្ជាក់​ឲ្យ​ដឹង​ថា ទណ្ឌិត​ឈ្មោះ នូ ប៉ូលីន នឹង​ត្រូវ​ប្រឈម​នូវ​បទ​ចោទ​ថ្មី​មួយ​ទៀត​ពាក់​ព័ន្ធ​នឹង​ការ​ហែក​គុក​រត់៕

អត្ថបទគួរចាប់អារម្មណ៍