The Phnom Penh Post Search

Search form

Logo of Phnom Penh Post newspaper Phnom Penh Post - ទឹក​ជំនន់​សម្លាប់​មនុស្ស ៧ នាក់ នៅ បន្ទាយ​មាន​ជ័យ




ទឹក​ជំនន់​សម្លាប់​មនុស្ស ៧ នាក់ នៅ បន្ទាយ​មាន​ជ័យ

ទឹក​ជំនន់​សម្លាប់​មនុស្ស ៧ នាក់ នៅ បន្ទាយ​មាន​ជ័យ

ភ្នំពេញៈ យ៉ាង​ហោច​មាន​មនុស្ស​ស្លាប់ ៧ នាក់​ហើយ ដោយ​សារ​ទឹក​ជំនន់ នៅ​ខេត្ត បន្ទាយ​មាន​ជ័យ ចាប់​តាំង​ពី​ខេត្ត​នេះ​បាន​រង​ការ​ជន់​លិច​ដោយ​ជំនន់​ទឹក​ភ្លៀង​និង ទឹក​ដែល​ហូរ​ចាក់​មក​ពី​ប្រទេស ថៃ អស់​ជាច្រើន​សប្តាហ៍​កន្លង​មក។

លោក កែវ វី នាយ​ខុទ្ទកាល័យ​គណៈកម្មាធិការ​ជាតិ​គ្រប់​គ្រង​គ្រោះ​មហន្តរាយ​បាន​ថ្លែង​ថា ចំនួន​អ្នក​ស្លាប់​ដោយ​សារ​ទឹក​ជំនន់​នៅ​ខេត្ត បន្ទាយ​មាន​ជ័យ បាន​កើន​ដល់ ៧ នាក់ ខណៈ​ខេត្ត​ខ្លះ​ទៀត​ដូច​ជា ខេត្ត ព្រះ​វិហារ កំពង់ធំ កំពង់ចាម មិន​ទាន់​មាន​សេចក្តី​រាយការណ៍​ពី​ការ​ស្លាប់​ដោយ​សារ​ទឹក​ជំនន់​នៅ​ឡើយ។

លោក​បញ្ជាក់​ថា៖ «យើង​ទទួល​របាយ​ការណ៍​ថា មនុស្ស ៧ នាក់​បាន​ស្លាប់​នៅ បន្ទាយ​មាន​ជ័យ។​យើង​នឹង​បន្ត​តាម​ដាន​ទៀត»។

លោក​បន្ត​ថា ទឹក​ជំនន់​នៅ​ខេត្ត ព្រះ​វិហារ បាន​ឡើង​ដល់​កម្រិត​ប្រកាស​អាសន្ន ខណៈ​កម្ពស់​ទឹក​ឡើង​ដល់ ១១,២៧ ម៉ែត្រ​ដែល​ត្រូវ​ធ្វើ​ការ​ជម្លៀស​ពលរដ្ឋ​ជិត ២០០ គ្រួសារ នៅ​តាម​ដង ស្ទឹង​សែន ក្រុង ព្រះ​វិហារ។ ចំណែក​ស្ថានភាព​កម្ពស់​ទឹក​នៅ​ខេត្ត កំពង់ធំ ក៏​កំពុង​កើន​ឡើង​ផង​ដែរ។

យោង​តាម​ព្រឹត្តិបត្រ​ព័ត៌មាន​និង​ព្យាករ ទឹក​ជំនន់​នៃ​ក្រសួង ធនធាន​ទឹក និង​ឧតុនិយម កាល​ពី​ម្សិលមិញ កម្ពស់​ទឹក​ទន្លេ មេគង្គ ទន្លេ បាសាក់ និង​នៅ​ទន្លេ សាប ចាប់​ហក់​ឡើង​បន្ទាប់​ពី​ប្រព័ន្ធ​សម្ពាធ​ទាប​បាន​អូស​កាត់​អាង​ទន្លេ មេគង្គ​និង​មាន​ព្យុះ ទី១១ ឈ្មោះ UTOR ឆ្លង​កាត់ ហ្វីលីពីន និង​កំពុង​ស្ថិត​លើ​សមុទ្រ​ចិន ដោយ​ធ្វើ​ដំណើរ​ទៅ​ភាគ​ខាង​ត្បូង​ប្រទេស​ចិន។

លោក ទ្រី ណារិន អភិបាល​ខេត្ត បន្ទាយ​មាន​ជ័យ បាន​ថ្លែង​ឲ្យ​ដឹង​ថា អ្នក​ស្លាប់​ដោយ​សារ​ទឹក​ជំនន់​ទាំង ៧ នាក់​គឺ​ស្ថិត​នៅ​ក្រុង ប៉ោយប៉ែត សិរីសោភ័ណ ស្រុក ស្វាយចេក និង​ស្រុក ថ្មពួក។

លោក​បញ្ជាក់​ថា ស្ថានភាព​ទឹក​នៅ​ក្រុង ប៉ោយប៉ែត ស្រក​បន្តិច តែ​ទឹក​បាន​ហូរ​ធ្លាក់​ទៅ​ក្រុង សិរីសោភ័ណ និង ស្វាយចេក ជា​តំបន់​ទំនាប​ជាង​ក្រុង ប៉ោយប៉ែត។

លោក​ឲ្យ​ដឹង​ដែរ​ថា រហូត​មក​ទល់​ម្សិលមិញ ស្ថានភាព​ទឹក​ជំនន់​នៅ​ក្នុង​ខេត្ត បង្ក​ផល​ប៉ះ​ពាល់​លើ​ដំណាំ​ស្រូវ ២៧៩៤ ហិកតា និង​ដំឡូង​មី ២៤០ ហិកតា។ ផ្លូវ​ជាតិ ១២៥ ម៉ែត្រ​និង​ផ្លូវ​ប៉េតុង​ប្រវែង ២១ ៤២៩ ម៉ែត្រ ហើយ​និង​សាលារៀន​ចំនួន ៥ ត្រូវ​លិច​លង់ ជាមួយ​គ្នា​ដែរ ផ្លូវ​ប្រវែង ៤៨១ ម៉ែត្រ​ត្រូវ​ទឹក​ហូរ​កាត់​ផ្តាច់​ហើយ​បាន​ប៉ះពាល់​ដល់​ប្រជា​ពលរដ្ឋ ២៥៩២ គ្រួសារ និង​ត្រូវ​ជម្លៀស​ពី​លំនៅឋាន ២៤៦ គ្រួសារ។

តាម​របាយ​ការណ៍​របស់​គណៈកម្មាធិការ​ជាតិ​គ្រប់​គ្រង​គ្រោះ​មហន្តរាយ ក្នុង​ឆ្នាំ ២០១២ គ្រោះ​ទឹក​ជំនន់​បាន​សម្លាប់​មនុស្ស ១៤ នាក់​នៅ​ទូទាំង​ប្រទេស។

នៅ​ខេត្ត ឧត្តរ​មាន​ជ័យ កាល​ពី​ល្ងាច​ថ្ងៃ​ចន្ទ មាន​សេចក្តី​រាយការណ៍​ដែរ​ថា ព្យុះ​ភ្លៀង​បាន​ធ្វើ​ឲ្យ​មនុស្ស​ពីរ​នាក់​រង​របួស​ហើយ​ផ្ទះ​ជាង ១០ ខ្នង រង​ការ​ខូច​ខាត​នៅ​ស្រុក ត្រពាំង​ប្រាសាទ។

លោក ដាំ សារាយ អធិការ​រង​ស្រុក ត្រពាំង​ប្រាសាទ បាន​ឲ្យ​ដឹង​កាល​ពី​ថ្ងៃ​ម្សិលមិញ​ថា ស្រ្តី​វ័យ ៥០ ឆ្នាំ បាន​បាក់​ដៃ​ស្តាំ ខណៈ​ផ្ទះ​របស់​គាត់​បាន​ដួល​រំលំ ហើយ​យុវជន​វ័យ ១៩ ឆ្នាំ​ម្នាក់ ត្រូវ​របួស​ជើង ប៉ុន្តែ​មិន​ធ្ងន់ធ្ងរ​ទេ ខណៈ​មាន​ផ្ទះ​ឈើ​បី​ខ្នង បានរ​ង​ការ​ខូច​ខាត​ទាំង​ស្រុង ក្នុង​ចំណោម​ផ្ទះ ១៤ ខ្នង ដែល​គ្រាន់​តែ​របើក​ដំបូល។

លោក ដាំ សារាយ ប្រាប់​ថា៖ «មន្រ្តី​ខេត្ត​បាន​ចុះ​ទៅ​ចែក​សម្ភារ​ខ្លះៗ​មាន​ស្បៀង​អាហារ និង​លុយ​កាក់​ដល់​ជន​រងគ្រោះ ដើម្បី​ឲ្យ​ពួក​គេ​សង់​ជម្រក​ស្នាក់នៅ។ នេះ​ជា​ព្យុះ​ភ្លៀង​លើក​ដំបូង​ហើយ នៅ​ស្រុក​របស់​ខ្ញុំ​ក្នុង​ឆ្នាំ​នេះ»។

លោក កែវ វី បាន​ឲ្យ​ដឹង​ដែរ​ថា មាន​ព្យុះ ១៤៧ ករណី ចាប់​ពី​ខែ​មករា ដល់​ខែ​កក្កដា ហើយ​ថា «ព្យុះ​នេះ​បាន​ធ្វើ​ឲ្យ​ផ្ទះ ១៥៩៨ ខ្នង​ខូច​ខាត​ទាំង​ស្រុង ផ្ទះ ៦១៤៥ ខ្នង​របើក​ដំបូល មនុស្ស ២៨ នាក់​ស្លាប់ និង ៩៥ នាក់​ត្រូវ​របួស»។

លោក កែវ វី បាន​បញ្ជាក់​ថា ករណី​ខ្យល់​ព្យុះ​នៅ​ក្នុង​ឆ្នាំ​នេះ បាន​កើន​ឡើង​ទ្វេ​ដង បើ​ប្រៀប​ធៀប​នឹង​ឆ្នាំ​មុន​។ សម្រាប់​ករណី​រន្ទះ​បាញ់​វិញ ក្នុង​រយៈ​ពេល ៧ ខែ​នៅ​ឆ្នាំ​នេះ មាន​មនុស្ស​ចំនួន ៩៣ នាក់​បាន​ស្លាប់ ៧២ នាក់ ត្រូវ​របួស និង​ងាប់​សត្វ​គោ​ក្របី​ចំនួន ៤៦ ក្បាល៕ NR

អត្ថបទគួរចាប់អារម្មណ៍