The Phnom Penh Post Search

Search form




Logo of Phnom Penh Post newspaper Phnom Penh Post - ទុស្សេ​ខ្សែ​ភ្លើង​ផ្ទះ​ភ្ញាស់​ពង​ទា ឆេះ​ស្លាប់​២ របួស ៣​នាក់ នៅ​ថ្ម​គោល បាត់​ដំបង




ទុស្សេ​ខ្សែ​ភ្លើង​ផ្ទះ​ភ្ញាស់​ពង​ទា ឆេះ​ស្លាប់​២ របួស ៣​នាក់ នៅ​ថ្ម​គោល បាត់​ដំបង

ទុស្សេ​ខ្សែ​ភ្លើង​ផ្ទះ​ភ្ញាស់​ពង​ទា ឆេះ​ស្លាប់​២ របួស ៣​នាក់ នៅ​ថ្ម​គោល បាត់​ដំបង

130101_10
សកម្មភាពអន្តរាគមន៍ពន្លត់អគ្គិភ័យនៅក្នុងរាជធានីភ្នំពេញ នាពេលកន្លងមក ផា លីណា

បាត់ដំបងៈ ស្រ្តី២​នាក់​ម្តាយ​និង​កូន​តូច​ត្រូវ​ឆេះ​ខ្លោច​ស្លាប់​នៅ​ក្នុង​ភ្នក់​ភ្លើង​រួម​ជាមួយ​មនុស្ស​៣​នាក់​ទៀត​ត្រូវ​ភ្លើង​រលាក​ពេញ​ខ្លួន​នៅ​ក្នុង​ហេតុ​ការណ៍​ទុស្សេ​ខ្សែ​ភ្លើង​ដាក់​ភ្ញាស់​ពង​ទា​កាល​ពី​ទៀប​​ភ្លឺ​ថ្ងៃ​ទី​៣០ ខែ​ធ្នូ នៅ​ស្រុក​ថ្មគោល ខេត្ត​បាត់​ដំបង។

លោក យឹម វិចិត្រ អធិការ​នគរបាល​ស្រុក​ថ្មគោល​ប្រាប់​ឲ្យ​ដឹង​ថា ក្នុង​គ្រោះ​ថ្នាក់​ភ្លើង​ឆេះ​នេះ​មាន​ជន​រងគ្រោះ​ជា​ឪពុក​ម្តាយ​រួម​ទាំង​កូន​ស្រី​ម្នាក់​ត្រូវ​របួស​រោល​ពេញ​ខ្លួន​ធ្ងន់ធ្ងរ​ម្នាក់ និង​២នាក់​ម្តាយ​កូន​ដែល​ជា​កូន​បង្កើត​ដែរ​នោះ​ត្រូវ​ឆេះ​ខ្លោច​ស្លាប់​នៅ​ក្នុង​ភ្នក់​ភ្លើង។

លោកប្រាប់​ថា៖ «ម្តាយ​និង​កូន​តូច​ដែល​ស្លាប់​ត្រូវ​ភ្លើង​ឆេះ​ខ្លោច​ស្ទើរ​អស់​គ្មាន​សល់ ហើយ​បើ​កុំ​តែ​នាង​បី​កូន​ចូល​ទៅ​វិញ ព្រោះ​គិត​ថា​មាន​កូន​មួយ​ទៀត​នៅ​ក្នុង​ផ្ទះ​នោះ​ប្រហែល​មិន​ស្លាប់​ទេ»។

លោក​ប្រាប់​ឲ្យ​ដឹង​ទៀត​ថា​ភ្លើង​ឆេះ​បណ្តាល​មក​ពី​ទុស្សេ​ខ្សែ​ភ្លើង​ចេញ​ពី​ក្នុង​ផ្ទះ​ធ្វើ​អាជីវកម្ម​ភ្ញាស់​ពង​ទា​ដែល​កន្លែង​ភ្ញាស់​នោះ​នៅ​ជាប់​នឹង​ក្បាល​ដំណេក ហេតុ​នេះ​ទើប​ជន​រងគ្រោះ​គ្មាន​ឱកាស​រត់​គេច​ចេញ​ពី​ក្នុង​ផ្ទះ​បាន។

លោកអធិការ​បន្ត​ឲ្យ​ដឹង​ថា ផ្ទះ​ប្រក់​ស័ង្ក​សី​ឆេះ​អស់​៣ខ្នង កាល​ពី​អ្រធាត្រ​ថ្ងៃ​ទី​៣០ ខែ​ធ្នូ​នោះ ស្ថិត​នៅ​ក្រុម​៥ ភូមិថ្មី ឃុំ​បន្សាយ​ត្រែង ស្រុក​ថ្មគោល ខេត្ត​បាត់ដំបង។ ក្នុង​ហេតុ​ការណ៍​នេះ ថ្វីបើ​រថយន្ត​ពន្លត់​អគ្គិភ័យ​នៃ​ស្នង​ការ​ដ្ឋាន​ខេត្ត​បាន​ចុះ​ជួយ​អន្តរាគមន៍ តែ​ក៏​ត្រូវ​ភ្លើង​ឆេះ​រថយន្ត​តូច​របស់​ម្ចាស់​ផ្ទះ​១​គ្រឿង​និង​ឆេះ​អស់​ទ្រព្យ​សម្បត្តិ​យក​បាន​តែ​រថយន្ត​ធំ​ដឹក​ទំនិញ​២​គ្រឿង​តែ​ប៉ុណ្ណោះ។

លោកបញ្ជាក់ថា ស្រ្តីរងគ្រោះ​ស្លាប់​ឈ្មោះ ណៃ គឹម​ហៀង អាយុ​២៩​ឆ្នាំ ត្រូវ​សសរ​ផ្ទះ​ឆេះ​រលំ​សង្កត់​ខណៈ​រត់​ចូល​ទៅ​រក​កូន​នៅ​ក្នុង​ផ្ទះ​និង​កូន​ស្រី​ឈ្មោះ ណៃ គឹមហៀក អាយុ​២ខួប។ ឯ ណៃ សុធា ភេទ​ប្រុស​អាយុ ជាង​៣០​ឆ្នាំ (ជាប្តី)​រលាក​ភ្លើង​រង​របួស​ស្រាល និង​ឈ្មោះ ចាយ ពក អាយុ​ជាង​៦០​ឆ្នាំ​ជា​ម្តាយ​​របួស​ស្រាល ណៃ ប៊ុនអៀង ភេទ​ប្រុស​អាយុ​៥៦​ឆ្នាំ​ជា​ឪពុក​ត្រូវ​ភ្លើង​ឆេះ​រោល​ពេញ​ខ្លួន​របួស​ធ្ងន់​ត្រូវ​សមត្ថកិច្ច​ជួយ​ដឹក​យក​មក​សង្គ្រោះ​នៅ​គ្លីនិក​ឯក​ជន​នៅ​បាត់​ដំបង។

ដោយឡែក​នៅ​ព្រឹក​ថ្ងៃ​ទី​៣១​ខែ​ធ្នូ វេលា​ម៉ោង​៨ព្រឹក​ម្សិល​មិញ​ក្នុង​សង្កាត់​លេខ​៣ ក្រុង​ព្រះ​សីហនុ ផ្ទះ​វិឡា​មួយ ក៏​ត្រូវ​ភ្លើង​ឆេះ​ដោយ​សារ​តែ​ទុស្សេ​ខ្សែ​ភ្លើង​ត្រូវ​រង​ការ​ខូច​ខាត​ផ្នែក​ជាន់​លើ នៅ​មុន​ពេល​កម្លាំង​នគរបាល​ពន្លត់​អគ្គិភ័យ​ប្រើ​ពេល​ជាង​១​ម៉ោង​ជួយ​អន្តរាគមន៍​ពន្លត់​ឲ្យ​រលត់​វិញ។

លោក ភុល ភស្តា អធិការ​ក្រុង​ព្រះ​សីហនុ​ឲ្យ​ដឹង​ពី​ម្សិល​មិញ​ថា ក្នុង​ផ្ទះ​ចំនួន​៣ខ្នង មាន​តែ​២ខ្នង​តូច​ទេ​ដែល​ឆេះ ចំណែក​ឯផ្ទះ​វិឡា​ឆេះ​ជាន់​លើ​ខូច​ខាត​ទ្រព្យ​សម្បត្តិ​អស់​ខ្លះ ព្រោះ​ម្ចាស់​មិន​នៅ។

មិន​មាន​របាយណ៍​ពី​គ្រោះ​ថ្នាក់​ដោយ​អគ្គិភ័យ​នៅ​ទូទាំង​ប្រទេសទេ។ តែ​តាម​ការ​កត់​សម្គាល់​ក្នុង​ខែ​ធ្នូ នៅ​ខេត្ត​សៀមរាប​អគ្គិភ័យ​បាន​ឆេះ​ផ្សារ​រាត្រី​សម្លាប់​មនុស្ស​៨​នាក់ ខូច​ខាត​ធ្ងន់​ធ្ងរ​ជាងគេ។

លោក នេត វន្ថា នាយ​ការិយាល័យ​ពន្លត់​អគ្គិភ័យ​ក្រុង​ភ្នំពេញ​ប្រាប់​ឲ្យ​ដឹង​ថា គិត​ចាប់​ពី​ខែ​មីនា​រហូត​ដល់​ចុង​ឆ្នាំ​២០១២ នេះ នៅ​ទីក្រុង​ភ្នំពេញ​គ្រោះ​អគ្គិភ័យ​បណ្តាល​មក​ពី​ចរន្ត​អគ្គិសនី នៅ​លំដាប់​ទី១ ការ​ធ្វេស​ប្រហែស​នៅ​លំដាប់​ទី២​(ឆេះ​គ្មាន​មូល​ហេតុ)​និង​បណ្តាល​មក​ពី​ផ្ទុះ​ហ្គាស​ទី៣ ដែល​សរុប​ជន​រងគ្រោះ​របួស​មាន​២៣​នាក់ និង​ស្លាប់​៤​នាក់។

លោក កត់សម្គាល់​ដែរ​ថា៖ ​«ប្រជាពលរដ្ឋ​នៅ​ទីក្រុង​ភ្នំពេញ​ប្រមាណ​៣០​ភាគ​រយ​ប្រើ​ប្រាស់​បំពង់​ពន្លត់​អគ្គិភ័យ ហើយ​អំពាវនាវ​សូម​ឲ្យ​ក្រុម​ហ៊ុន​ធំៗ​ដែល​មាន​កម្មករ​រាប់​រយ​នាក់​ឬ​សណ្ឋាគារ​និង​កន្លែង​ធ្វើ​អាជីវកម្ម​នានា​គួរ​មាន​រថយន្ត​ពន្លត់​អគ្គិភ័យ​ផ្ទាល់​ខ្លួន»។

នៅឯ​ខេត្ដ​កំពង់​ស្ពឺ កាល​ពី​ថ្ងៃទី​២៧ ខែ​ធ្នូ ក្នុង​ពិធី​សម្ពោធ​រោងចក្រ​ស្ករស​របស់​លោក​ឧកញ៉ា លី យ៉ុងផាត់ លោក​នាយក​រដ្ឋ​មន្ត្រី ហ៊ុន សែន បាន​អំពាវនាវ​និង​លើក​ទឹក​ចិត្ដ​ឲ្យ​ម្ចាស់​សណ្ឋាគារ ម្ចាស់​បុរី និង​ម្ចាស់​រោង​ចក្រ​សហគ្រាស​នានា​នៅ​កម្ពុជា អាច​នាំ​ចូល​និង​ទិញ​រថយន្ដ​ពន្លត់​អគ្គិភ័យ​សម្រាប់​ជួយ​អន្ដរាគមន៍​ក្នុង​គ្រោះ​អគ្គិភ័យ​នៅ​ពេល​កើត​ឡើង​ជាយថា​ហេតុ ដោយ​រួច​ពន្ធ បើ​ទោះ​ជា​ប្រភេទ​ចង្កូត​ស្ដាំ​ឬ​ចង្កូត​ឆ្វេង​ក៏​ដោយ៕

អត្ថបទគួរចាប់អារម្មណ៍