The Phnom Penh Post Search

Search form

Logo of Phnom Penh Post newspaper Phnom Penh Post - ទូ​ម៉ាស៊ីន ATM ពីរ​ត្រូវ​គេ​គាស់​យក​លុយ​អស់




ទូ​ម៉ាស៊ីន ATM ពីរ​ត្រូវ​គេ​គាស់​យក​លុយ​អស់

ទូ​ម៉ាស៊ីន ATM ពីរ​ត្រូវ​គេ​គាស់​យក​លុយ​អស់

សៀមរាបៈ ទូម៉ាស៊ីន​អេធីអឹម (ATM​) របស់​ធនាគារ​កាណាឌីយ៉ា និង​ធនាគារ​ ANZ Royal ចំនួន​ពីរ នៅ​ផ្សារ​ទំនើប​ឡាក់គីម៉ល ស្ថិត​ក្នុង​សង្កាត់​ស្វាយដង្គុំ ក្រុង​​សៀមរាប ត្រូវ​បាន​គេ​​លួច​បំបែក​​យក​ប្រាក់​អស់​កាលពី​ម៉ោង​ប្រមាណ ១ រំលង​អធ្រាត្រ​ឈាន​ចូល​ថ្ងៃ​ទី​ ២២ ខែ​មិថុនា​ម្សិលមិញ​។

ហេតុការណ៍​នេះ​ធនាគារ​កាណាឌីយ៉ា បាន​​ប្តឹង​ទារ​សំណង​នៃ​ការ​បាត់បង់​ប្រាក់​ ៦ ម៉ឺន​ដុល្លារ និង​ប្រាក់​ ៩ លាន​រៀល​ពី​ម្ចាស់​ផ្សារ​ទំនើប​ឡាក់គីម៉ល​ (Lucky Mall) ទី​ដែល​ទូម៉ាស៊ីន (ATM​) តាំង​នៅ​។

រីឯ​ធនាគារ ANZ មិន​ទាន់​បាន​ប្តឹង​នៅ​ឡើយ​រហូត​មក​​ទល់​​ល្ងាច​ថ្ងៃ​ម្សិលមិញ​​។ នេះ​បើ​តាម​លោក ថង សាគុណ ស្នងការ​រង​នគរបាល​ខេត្ត​សៀមរាប​ទទួល​បន្ទុក​កណ្តាល​យុត្តិធម៌​បាន​ឲ្យ​ដឹង​ពី​ម្សិលមិញ។

លោក សាគុណ ឲ្យ​ដឹង​ថា​នៅ​ពេល​មាន​ការ​ភ្ញាក់ផ្អើល​នូវ​ហេតុការណ៍​នេះ​សមត្ថកិច្ច​ក៏​បាន​​ឃាត់​​ខ្លួន​បុរស​ពីរ​នាក់​ជា​សន្តិសុខ​ផ្សារ​ដែល​បាន​យាមកាម​នៅ​ទី​នោះ ដើម្បី​ធ្វើការ​សាកសួរ។

លោក​បញ្ជាក់​ថា៖ «ទូ​ត្រូវ​គេ​បំបែក​យក​ប្រាក់​បាត់​។ យើង​មិន​ដឹង​អស់​ប៉ុន្មាន​ទេ​ប៉ុន្តែ​ខាង​ធនាគារ​កាណាឌីយ៉ា​បាន​ដាក់​ពាក្យ​បណ្តឹង​ទារ​ឲ្យ​ម្ចាស់​ផ្សារ​ឡាក់គីម៉ល​សង​ ៦ ម៉ឺន​ដុល្លារ​ និង​ប្រាក់​ខ្មែរ ៩ លាន​រៀល។ រីឯ​ធនាគារ ANZ មិន​ទាន់​បាន​ប្តឹង​ទេ ហើយ​យើង​ក៏​មិន​ដឹង​មាន​ប្រាក់​ប៉ុន្មាន​ដែរ»។

លោក​បន្ត​ថា​៖ «សន្តិសុខ​ពីរ​នាក់​ជា​អ្នក​ត្រូវ​វេន​យាម​ពី​ម៉ោង​ ៧ យប់ ដល់​ម៉ោង ៧ ព្រឹក​ត្រូវ​បាន​ឃាត់​ខ្លួន​តាម​បញ្ជា​របស់​ព្រះរាជអាជ្ញា​ដើម្បី​ធ្វើការ​ស្រាវជ្រាវ​បន្ត​»។

បុគ្គលិក​ម្នាក់​នៃ​ធនាគារ​ ANZ នៅ​ខេត្ត​សៀមរាប​បាន​បដិសេធ​ធ្វើ​អធិប្បាយ​ពី​បញ្ហា​​នេះ​ដោយ​ថ្លែង​ថា មិន​បាន​ទទួល​ព័ត៌មាន​​។ ចំណែក​តំណាង​ធនាគារ​កាណាឌីយ៉ា​នៅ​ខេត្ត​សៀមរាប​មិន​អាច​ទាក់ទង​បាន​ទេ​កាលពី​ម្សិលមិញ​។

បុគ្គលិក​ម្នាក់​នៃ​ផ្សារ​ទំនើប Lucky Mall បាន​និយាយ​ថា​ខ្លួន​មិន​​បាន​ដឹង​ពី​ការ​ខូចខាត​ម៉ាស៊ីន​អេធីអឹម​នោះ​ទេ​៕

អត្ថបទគួរចាប់អារម្មណ៍