The Phnom Penh Post Search

Search form




Logo of Phnom Penh Post newspaper Phnom Penh Post - នគរបាល​ក្រុង​៧២​នាក់​ផ្អាក​ពី​ការងារ​និង​បណ្តេញ​ចេញ




នគរបាល​ក្រុង​៧២​នាក់​ផ្អាក​ពី​ការងារ​និង​បណ្តេញ​ចេញ

នគរបាល​ក្រុង​៧២​នាក់​ផ្អាក​ពី​ការងារ​និង​បណ្តេញ​ចេញ

130204_09b
ប៉ូលិសចរាចរ ផាកពិន័យអ្នកជិះម៉ូតូនាពេលកន្លងមក ផា លីណា

ភ្នំពេញៈ មន្រ្តី​នគរបាល​ក្រុង​ភ្នំពេញ​ចំនួន​៧២​នាក់​ត្រូវ​បាន​ផ្អាក​ពី​ការងារ ជា​បណ្តោះ​អាសន្ន​និង រង​ការ​បណ្តេញ​ចេញ​ពាក់​ព័ន្ធ​នឹង​ការ​ប្រព្រឹត្ត​អំពើ​ពុក​រលួយ ​ការ​ប្រើប្រាស់​តួនាទី​គំរាម​កំហែង​ប្រជាពលរដ្ឋ និង​កំហុស​វិន័យ​រដ្ឋបាល។ នេះ​បើ​យោង​ទៅ​តាម​ការ​ប្រកាស​ក្នុង​កិច្ច​ប្រជុំ​ប្រចាំ​ខែ​កាល​ពី​ថ្ងៃទី​៣១ ខែ​មករា ឆ្នាំ​២០១៣។

លោក ជួន សុវណ្ណ ស្នងការ​នគរបាល​រាជធានី​ភ្នំពេញ​បាន​ឲ្យ​ដឹងថា ក្នុង​ចំណោម​មន្ត្រី​នគរបាល​ចំនួន​៧២​នាក់ នោះ​មាន​មន្ត្រី​នគរបាល​៦៦ នាក់ ត្រូវ​បាន​ឲ្យ​ផ្អាក​ពី​ការងារ​ជា​បណ្តោះ​អាសន្ន ២​នាក់​ត្រូវ​បណ្តេញ​ចេញ​ពី​ក្រប​ខ័ណ្ឌ​ព្រោះ​បាន​ប្រើប្រាស់​តួនាទី​គំរាម​ខុស​លក្ខន្តិកៈ​កង​នគរបាល​ជាតិ​បាន​ចែង ២នាក់​ប្រឈម​នឹង​ការ​ប្តឹង​ពី​ពលរដ្ឋ​អំពី​អំពើ ពុក​រលួយ ២នាក់​មាន​កំហុស​រដ្ឋបាល។

លោក​បាន​ឲ្យ​ដឹង​ទៀត​ថា៖ «​បើ​កម្លាំង​នគរបាល​ណា​ឈប់​ឥត​ច្បាប់​រយៈ​ពេល​៧​ថ្ងៃ​ត្រូវ​ហៅ​មក​ផ្អាក ការងារ​ដាក់​ពិន័យ​រដ្ឋបាល ពួក​គាត់​នឹង​ត្រូវ​មក​បំពេញ​ការងារ​ជា​ធម្មតា​វិញ​បន្ទាប់​ទទួល​វិន័យ»។

លោកឲ្យ​ដឹង​ទៀត​ថា ​មន្រ្តី​នគរបាល​២នាក់ ដែល​ប្រឈម​ការ​ប្តឹង​ពី​ប្រជាពលរដ្ឋ​ពាក់ព័ន្ធ​នឹង​ការ​ប្រព្រឹត្ត​អំពើ​ពុក​រលួយ​ដោយ​យក​លុយ​គេ​តែ​មិន​ចេញ​វិក្កយបត្រ។ លោក​បញ្ជាក់​ថា៖ «នេះ​ជា​សារ​ព្រមាន​មួយ​ដែល​ខ្ញុំ​ប្រកាស​ជា​សាធារណៈ បន្ទាប់​ពី​យើង​ធ្វើ​ការ​ត្រួត​ពិនិត្យ​រក​ឃើញ​ថា​មន្រ្តី​នគរបាល​មួយ ចំនួន​បាន​ប្រព្រឹត្ត​ខុស​វិន័យ​នគរបាល​ជាតិ​យើង។ រាល់​មន្រ្តី​ទាំងអស់​មិន​អនុញ្ញាត​ឲ្យ​យក​តួនាទី​ជា​កង​កម្លាំង​នគរបាល​ជាតិ​ទៅ​ធ្វើ​ការ​គាប​សង្កត់​លើ​ប្រជាពលរដ្ឋ​ទេ មន្រ្តី​ដែល​បំពេញ​តួនាទី​ខុស​ដាច់ខាត​ត្រូវ​តែ​ទទួល​ទោស​តាម​ច្បាប់»។

លោក ចាន់ សុវេត មន្រ្តីស៊ើប​អង្កេតជាន់​ខ្ពស់​អង្គការ​ការពារ​សិទ្ធិ​មនុស្ស​អាដហុក​បាន​ថ្លែង​ថា ចំណុច​កំណែ​ទម្រង់​របស់​មន្រ្តី​នគរបាល​គឺ​ដោយ​បាន​ដឹង​ពី​សកម្មភាព​មន្រ្តី​នគរបាល​របស់​ខ្លួន​បាន ប្រព្រឹត្ត​នូវ​អំពើ​ដែល​ផ្ទុយ​នឹង​ច្បាប់​បាន​កំណត់។ លោក​ថា៖ «យើង​មាន​ការ​ព្រួយ​បារម្ភ​ដែរ​ប្រសិន​បើ​ក្រុម​មន្រ្តី​ទាំងអស់​នោះ ពិត​ជា​បាន​ប្រព្រឹត្ត​នូវ​អំពើ​ពុក​រលួយ ប្រព្រឹត្ត​ឥរិយាបថ​មិន​គប្បី សកម្មភាព​ទាំង​អស់​នេះ​មិន​ឆ្លុះ​បញ្ចាំង​ពី​ការ​បណ្តេញ​ចេញ​ឬដាក់ ទោស​ទេ ព្រោះ​មន្រ្តី​រាជការ​នៅ​ស្រុក​ខ្មែរ ពិសេស​មន្ត្រី​នគរបាល គឺ​មាន​ប្រាក់​ខែ​តិច​តួច​បំផុត ដូច្នេះ​ដើម្បី​ក្រពះ​មាន​ពេល​ខ្លះ​ពួក​គាត់​មិន​បាន​គិត​អំពី​មុខ​មាត់ កិត្តិយស​របស់​គាត់ គឺ​ធ្វើ​យ៉ាងណា​ដើម្បី​គ្រួសារ​គាត់។ អ៊ីចឹង​ខ្ញុំ​គិត​ថា ការ​ខុស​ឆ្គង​បន្តិច​បន្តួច​វា​មិន​មែន​ជា​រឿង​មួយ​ដែល​ត្រូវ​តែចាប់​កំហុស ​រហូត​ដល់​ការ​បណ្តេញ​ចេញ​នោះទេ​ គឺ​គ្រាន់​តែ​ហៅ​គាត់​មក​អប់​រំ​ជាការល្អ»៕

អត្ថបទគួរចាប់អារម្មណ៍