The Phnom Penh Post Search

Search form

Logo of Phnom Penh Post newspaper Phnom Penh Post - បក្ខពួក​រ៉ាស្មាច់​ម្នាក់​ជាប់​អន្ទាក់​ប៉េអឹម​បន្ទាប់​ពី​គេច​ខ្លួន​ជាង​១០​ឆ្នាំ




បក្ខពួក​រ៉ាស្មាច់​ម្នាក់​ជាប់​អន្ទាក់​ប៉េអឹម​បន្ទាប់​ពី​គេច​ខ្លួន​ជាង​១០​ឆ្នាំ

បក្ខពួក​រ៉ាស្មាច់​ម្នាក់​ជាប់​អន្ទាក់​ប៉េអឹម​បន្ទាប់​ពី​គេច​ខ្លួន​ជាង​១០​ឆ្នាំ

130402_09b
បក្ខពួករ៉ាស្មាច់ឈ្មោះ ឡាំ គឹមលាង ហៅ ឡាយ សេង សហការី

ភ្នំពេញៈ ជន​សង្ស័យ​ម្នាក់​ជា​បក្ខពួក​ក្រុម​មេខ្លោង​រ៉ាស្មាច់ ដែល​ល្បី​ខាង​ជំរិត​ទារ​ប្រាក់​ហើយ​ត្រូវ​សមត្ថកិច្ច​បាញ់​ស្លាប់​និង​បាន​រត់​គេច​ខ្លួន​ជាង​១០​ឆ្នាំ ត្រូវ​កង​រាជ​អាវុធហត្ថ​លើ​ផ្ទៃ​ប្រទេស​ចាប់​បញ្ជូន​ទៅ​សាលា​ដំបូង​រាជធានី​ភ្នំពេញ​កាល​ពី​ម្សិល​មិញ​តាម​ដីកា​ចាស់​របស់​តុលាការ បន្ទាប់​ពី​បាន​ចាប់​ខ្លួន​កាល​ពីថ្ងៃ​ទី៣០ មីនា នៅ​ភូមិ​ព្រែក​ព្នៅ ខណ្ឌ​សែន​សុខ រាជធានី​ភ្នំពេញ។

លោក ខេង ទីតូ អ្នក​នាំ​ពាក្យ​កងរាជអាវុធហត្ថ​លើ​ផ្ទៃ​ប្រទេស​ប្រាប់​ពី​ម្សិលមិញ​ថា​ជន សង្ស័យ​ម្នាក់​ជា​បក្ខពួក​មេ​ខ្លោង​ធំ​ដែល​ល្បី​ខាង​ចាប់​ជំរិត​ហើយ​ដែល​បាន​រត់​គេច​ខ្លួន​អស់​ពេល​ជាង​១០​ឆ្នាំ​នោះ​ត្រូវ​កម្លាំង​កង​រាជ​អាវុធ​ហត្ថ​លើ​ផ្ទៃ​ប្រទេស​ចាប់​ខ្លួន​បាន​កាល​ពីរ​សៀល​ថ្ងៃទី​៣០ ខែ​មីនា នៅ​ភូមិ-សង្កាត់​ព្រែក​ព្នៅ ខណ្ឌ​សែន​សុខ​ពី​បទ​ជាប់​ពាក់​ព័ន្ធ​ការ​ចាប់​ជំរិត​ការ​ផលិត និង​ការ​ជួញ​ដូរ​គ្រឿង​ញៀន​កន្លង​មក។

លោក​ថ្លែង​ថា​៖ «​សមត្ថកិច្ច​គ្រាន់​តែ​ចាប់​ជន​សង្ស័យ​តាម​ដីកា​ចាស់​របស់​តុលាការ​មិន​មាន​បទ​ល្មើស​អី​ថ្មី​ទេ​តែ​ជន​នេះ​ពី​មុន​ធ្លាប់​ពាក់​ព័ន្ធ​នឹង​បទ​ល្មើស​ជំរិត​ទារ​ប្រាក់​នៅ​ក្នុង​ក្រុម​ឧក្រិដ្ឋជន រ៉ាស្មាច់​ហើយ​ក្រោយ​ពី​សមត្ថកិច្ច​បំបែក​សម្បុក​សម្លាប់​មេខ្លោង​និង​ចាប់​បក្ខ​ពួក​អស់​ជន​សង្ស័យ​ក៏​គេច​ខ្លួន​ទៅ​បង្ក​បទ​ល្មើស​គ្រឿង​ញៀន​ជា​បន្ត​ដូច្នេះ​ទោស​គេ​ពី​មុន​យ៉ាង​ម៉េច​គឺ​នៅ​តែ​ដដែល​ទេ​»។

លោក ខេង ទីតូ បញ្ជាក់​ថា ការ​ចាប់​ជន​នេះ​ពុំ​មាន​ដក​ហូត​បាន​អ្វី​ទេ​សមត្ថកិច្ច​ចាប់​ហើយ​បញ្ជូន​ទៅ​តុលាការ​តែ​ម្តង​។

មន្រ្តី​កង​រាជ​អាវុធ​ហត្ថ​នៃ​ស្នង​ការ​ស្រាវ​ជ្រាវ​និង​យុត្តិធម៌​ថា​ជន​សង្ស័យ​ឈ្មោះ ឡាំ គឹម​លាង​ហៅ ឡាយ សេង អាយុ​៤៦​ឆ្នាំ​បាន​រត់​គេច​ខ្លួន​រយៈ​ពេល​១១​ឆ្នាំ​និង​មាន​បក្ខពួក​បង្ក​បទ​ល្មើស​ចាប់​មនុ​ស្ស​ជំរិត​ទារ​ប្រាក់​៤នាក់​ទៀត​តែ​អ្នក​ទាំង​៤នាក់​ត្រូវ​ចាប់​ខ្លួន​កាល​ពី​ឆ្នាំ​១៩៩៨​-១៩៩៩​។

បុរស​ជាប់​ចោទ​ទាំង​៤នាក់​មាន​ឈ្មោះ ឈឿន សារី ហ៊ូ សំណាង ហៅ​អាព្រីង ហ៊ូ ពៅ និង​ឈ្មោះ អ៊ូ ពេជ្រ។

មន្រ្តី អាវុធ​ហត្ថ​ប្រាប់​ទៀត​ថា​គូកន​ដែល​ផលិត​និង​ជួញ​ដូរ​គ្រឿង​ញៀន​ហើយ​ត្រូវ​កម្លាំង​សមត្ថកិច្ច​ចាប់​ខ្លួន​បាន ឈ្មោះ ឡាំ សុខខេង ភេទ​ប្រុស អាយុ​៣៨​ឆ្នាំ​ចាប់​ខ្លួន​នៅ​ថ្ងៃ​ទី​០១​ខែ​សីហា​ឆ្នាំ​២០០៧​ឈ្មោះ ម៉ៅ សុគុណ ហៅ​ជ្រូក ភេទ​ប្រុស​អាយុ​៣៦​ឆ្នាំ​ចាប់​ខ្លួន​ថ្ងៃ​ទី៥​តុលា​ឆ្នាំ​២០០៧ ឈ្មោះ គឹម ហាន ភេទ​ប្រុស​អាយុ​៣៩​ឆ្នាំ និង​ឈ្មោះ​ញឺម សំបូរ ហៅ​ហ៊ីម ហៅ​ខ្មៅ ភេទ​ប្រុស​អាយុ ២៥​ឆ្នាំ ចាប់​ខ្លួន​នៅ​ថ្ងៃទី​១៥ ខែ​តុលា​ឆ្នាំ​២០០៧ ឈ្មោះ គ្រុយ សេង​ឡេង ភេទ​ប្រុស អាយុ​៥៤​ឆ្នាំ ចាប់​ខ្លួន​ថ្ងៃ​ទី​២៥ ខែ​ធ្នូ​ឆ្នាំ​២០០៨​។

ប្រភព​ដដែល​បន្ត​ថា​ក្រុម​ឧក្រិដ្ឋជន​ចាប់​ជំរិត​ជា​សមាជិក​ក្រុម​ឧក្រិដ្ឋជន​សោម ណារ៉ា ហៅ​រ៉ាស្មាច់ ជា​មេខ្លោង​ធំ​ដែល​បង្ក​បទ​ល្មើស​ពី​ឆ្នាំ​១៩៩៨-១៩៩៩​។​ក្រោយ​ពី​បែក​សំបុក​មក​នៅ​ឆ្នាំ​២០០៧​ឡាំ គឹម លាង ហៅ ឡាយ សេង ក៏​ទៅ​លួច​ផលិត​និង​ជួញ​ដូរ​គ្រឿង​ញៀន​ជា​មួយ​មេ​ខ្លោង​ឡាំ សុខ​ខេង ដែល​ត្រូវ​ជា​ក្មួយ​ហើយ​ត្រូវ​កម្លាំង​កង​រាជ​អាវុធ​ហត្ថ​ចាប់​បាន​និង​រឹប​អូស​វត្ថុ​តាង​ផលិត​គ្រឿង​ញៀន​មាន ម៉ាស៊ីន​ផលិត​គ្រឿង​ញៀន​រួម​នឹង​ឧបករណ៍​ជាច្រើន​ទៀត។

មន្ត្រី​សាលា​ដំបូង​ភ្នំពេញ​មិន​អាច​ទាក់​ទង​ដើម្បី​សុំ​ព័ត៌មាន​លម្អិត​បាន​ទេ កាល​ពី​ម្សិល​មិញ ហើយ​លោក ជីវ កេង ប្រធាន​សាលា​ដំបូង​ភ្នំពេញ​មិន​លើក​ទូរស័ព្ទ​ឆ្លើយ​តប​ឡើយ​៕

អត្ថបទគួរចាប់អារម្មណ៍