The Phnom Penh Post Search

Search form




Logo of Phnom Penh Post newspaper Phnom Penh Post - បង​ថ្លៃ​ត្រូវ​សង្ស័យ​ក្នុង​រឿង​ឃាតកម្ម ១ គ្រួសារ​នៅ​ប៉ៃលិន

បង​ថ្លៃ​ត្រូវ​សង្ស័យ​ក្នុង​រឿង​ឃាតកម្ម ១ គ្រួសារ​នៅ​ប៉ៃលិន

ផ្ទះ​ជន​រង​គ្រោះ​ដែល​ជន​ល្មើស​ដុត​ជាមួយ​សព​ម្ចាស់ និង​ជន​សង្ស័យ​ក្នុង​រឿង​ឃាតកម្ម​គ្រួសារ​នេះ​ពេល​ប៉ូលិស​បាញ់​របួស។
ផ្ទះ​ជន​រង​គ្រោះ​ដែល​ជន​ល្មើស​ដុត​ជាមួយ​សព​ម្ចាស់។ រូបថត សហការី

បង​ថ្លៃ​ត្រូវ​សង្ស័យ​ក្នុង​រឿង​ឃាតកម្ម ១ គ្រួសារ​នៅ​ប៉ៃលិន

ប៉ៃលិនៈ ឃាតករ​ដែល​ចាប់​ចង​ជន​សង្ស័យ​ប្តី​ប្រពន្ធ រួម​ទាំង​កូន​ស្រី​អាយុ​ទើប​តែ​បាន ៦​ខែ សម្លាប់ រួច​ដុត​សាក​សព​ជាមួយ​នឹង​ផ្ទះ​របស់​ពួក​គេ​កាល​ពី​យប់​ថ្ងៃ​ព្រហស្បតិ៍​ឈាន​ចូល​ថ្ងៃ​សុក្រ​ក្នុង ស្រុក​សាលាក្រៅ ខេត្ត​ប៉ៃលិន ត្រូវ​សមត្ថកិច្ច​ចាប់​ខ្លួន​កាល​ពី​ថ្ងៃ​សោរ៍​ចុង​សប្តាហ៍​នេះ ហើយ​ដែល​ជន​សង្ស័យ​ដៃ​ដល់​ត្រូវ​ជា​បង​ថ្លៃ​របស់​ជន​រង​គ្រោះ។

លោក​វរ​សេនីយ៍ឯក អ៊ុន សេរីរ័ត្ន ស្នងការ​រង​នគរបាល ខេត្ត​ប៉ៃលិន​ទទួល​បន្ទុក​សេនាធិការ​បាន​ឲ្យ​ដឹង​កាល​ពី​ថ្ងៃ​អាទិត្យ​ថា សមត្ថកិច្ច​គ្រប់​លំដាប់​ថ្នាក់​ក្នុង​ខេត្ត​បាន​សហការ​គ្នា ធ្វើ​ការ​ស៊ើប​អង្កេត​យ៉ាង​យក​ចិត្ត​ទុក​ដាក់ បន្ទាប់​ពី​មាន​ករណី​ឃាតកម្ម​ដ៏​សាហាវ​កើត​ឡើង​លើ​ក្រុម​គ្រួសារ​ជន​រង​គ្រោះ​ដែល​ធ្វើ​ឲ្យ​មាន​មនុស្ស​ស្លាប់​រហូត​ដល់ ៣​នាក់ រួម​មាន​ទាំង​ក្មេង​ស្រី​អាយុ​ទើប​តែ ៦​ខែ ម្នាក់​ផង។

លោក​ថ្លែង​ថា៖ «ជន​សង្ស័យ និង​ជន​រង​គ្រោះ​មាន​ទំនាស់​ក្នុង​គ្រួសារ ដែល​ធ្វើ​ឲ្យ​ជន​សង្ស័យ​ចង​គំនុំ​ដល់​ជន​រង​គ្រោះ ប៉ុន្តែ​ខ្ញុំ​មិន​ទាន់​បាន​ដឹង​ពី​ហេតុ​ការណ៍​លម្អិត នៃ​ជម្លោះ​របស់​សាច់​ញាតិ​មួយ​នេះ​ទេ»។

​ជន​សង្ស័យ​ក្នុង​រឿង​ឃាតកម្ម​គ្រួសារ​នេះ​ពេល​ប៉ូលិស​បាញ់​របួស។ រូបថត សហការី
​ជន​សង្ស័យ​ក្នុង​រឿង​ឃាតកម្ម​គ្រួសារ​នេះ​ពេល​ប៉ូលិស​បាញ់​របួស។ រូបថត សហការី

កាល​ពី​យប់​ថ្ងៃ​សុក្រ ទី២១ ខែ​វិច្ឆិកា នៅ​ម៉ោង​ប្រមាណ​ជា ១ និង ១៥ នាទី មាន​ករណី​ឃាតកម្ម​មួយ កើត​លើ​គ្រួសារ​ស្មៀន​ឃុំ​សាលា​ក្រៅ ភរិយា និង​កូន​ស្រី ដែល​ត្រូវ​បាន​ជន​ដៃ​ដល់​សម្លាប់​ដោយ​យក​ខ្សែ​លួស​ចង​ក ហើយ​ដុត​ឲ្យ​ឆេះ​ខ្លោច​យ៉ាង​សាហាវ​ព្រៃផ្សៃ​បំផុត​រួម​ទាំង​ផ្ទះ​និង​ទ្រព្យ​សម្បត្តិ​របស់​ពួក​គេ។

យោង​តាម​របាយ​ការណ៍​របស់​ស្នងការដ្ឋាន​នគរបាល ខេត្ត​ប៉ៃលិន បាន​ឲ្យ​ដឹង​ថា ជន​រង​គ្រោះ​ដែល​ស្លាប់​មាន​ឈ្មោះ ហេង រ៉ាវី អាយុ ២៩​ឆ្នាំ ត្រូវ​ជា​ប្តី​របស់​ឈ្មោះ ធី ម៉ាឡៃ អាយុ ២៥​ឆ្នាំ និង​កូន​ស្រី​ឈ្មោះ ហេង មួយគា អាយុ ៦​ខែ។ នៅ​ក្នុង​ហេតុ​ការណ៍​នេះ​ផ្ទះ​និង​អីវ៉ាន់​ចាប់​ហួយ​ត្រូវ​ឆេះ​ទាំង​ស្រុង មាន​ទាំង​ប្រាក់​ប្រមាណ​ជា​ជាង ១ ម៉ឺន​ដុល្លារ​ផង ដោយ​សារ​នៅ​កន្លែង​ឆេះ​មាន​ឃើញ​ស្រទាប់​លុយ​ដែល​ឆេះ​នៅ​សល់​អាច​មើល​ស្គាល់​ថា ជា​ប្រាក់​ដុល្លារ ដែល​ជន​រង​គ្រោះ​ទើប​បាន​ខ្ចី​ពី​ធនាគារ។

លោក​ស្នងការ​រង អ៊ុន សេរីរ័ត្ន បាន​ឲ្យ​ដឹង​ទៀត​ថា សមត្ថកិច្ច​បាន​ឈាន​ដល់​ចាប់​ជន​ដៃ​ដល់​បន្ទាប់​ពី​ធ្វើ​ការ​ស៊ើប​អង្កេត​និង​សាក​សួរ​ទាំង​ជន​សង្ស័យ​និង​អ្នក​រស់​នៅ​ជិត​ខាង​នោះ ហើយ អ្វី​ដែល​សមត្ថកិច្ច​សង្ស័យ​ខ្លាំង និង​ឈាន​ទៅ​ដល់​ឃាត់​ខ្លួន​ពួក​គេ​នេះ គឺ​ដោយ​សារ​ជន​នេះ​ហាក់​គ្មាន​ការ​ភិត​ភ័យ​និង​សត្វ​ចិញ្ចឹម​របស់​ជន​រង​គ្រោះ គឺ​សត្វ​ឆ្កែ​មិន​បាន​ព្រុស​ឬ​ផ្អើល​ចំពោះ​ជន​សង្ស័យ​ម្នាក់​នេះ​ទេ ដោយ​សារ​តែ​ជន​នេះ​ចេញ​ចូល​ផ្ទះ​នេះ​ញឹក​ញាប់។ ដូច​នេះ​យប់​កើត​ហេតុ​គឺ​ងាយ​ឲ្យ​ជន​សង្ស័យ​ចូល​ទៅ​ធ្វើ​សកម្មភាព។

លោក​ថ្លែង​ទៀត​ថា៖ «ជន​សង្ស័យ​បាន​ព្យាយាម​រត់​គេច​ពី​សមត្ថកិច្ច​តែ​ត្រូវ​បាន​សមត្ថកិច្ច​តាម​បាញ់​របួស​ជើង​រត់​លែង​រួច តែ​ភ្លាមៗ​ក៏​ត្រូវ​បាន​បញ្ជូន​ទៅ​ព្យាបាល​នៅ​មន្ទីរពេទ្យ»។

លោក​ស្នងការ​រង​បន្ត​ថា៖ «យើង​នឹង​បញ្ជូន​ជន​សង្ស័យ​រូប​នេះ ទៅ​តុលាការ​បន្ទាប់​ពី​គេ​ធូរ​ស្បើយ​បន្តិច​ពី​របួស។ យើង​បាន​ចោទ​ជន​នេះ​ពី​បទ​មនុស្ស​ឃាត​គិត​ទុក​ជា​មុន​យ៉ាង​សាហាវ​បំផុត ដែល​នេះ​ជា​ទោស​ឧក្រិដ្ឋ»៕

អត្ថបទគួរចាប់អារម្មណ៍