The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូនក្រុម​ពាក់​ព័ន្ធ​គ្រឿង​ញៀន​៨​នាក់​ទៅ​តុលាការ​ភ្នំពេញ




បញ្ជូនក្រុម​ពាក់​ព័ន្ធ​គ្រឿង​ញៀន​៨​នាក់​ទៅ​តុលាការ​ភ្នំពេញ

បញ្ជូនក្រុម​ពាក់​ព័ន្ធ​គ្រឿង​ញៀន​៨​នាក់​ទៅ​តុលាការ​ភ្នំពេញ

ភ្នំពេញៈ ជនសង្ស័យ​ពាក់​ព័ន្ធ​ការ​ជួញ​ដូរ​និង​ចែក​ចាយ​គ្រឿង​ញៀន​ចំនួន​៨នាក់​ដែល សមត្ថកិច្ច​ចម្រុះ​រាជធានី​ភ្នំពេញ​ចាប់​ឃាត់​ខ្លួន​កាល​ពី​ថ្ងៃ​ទី១៥​និង ថ្ងៃ​ទី​១៧​ខែ​កុម្ភៈ ​បាន​បញ្ជូន​ទៅ​សាលា​ដំបូង​រាជធានី​ភ្នំពេញ នៅ​ល្ងាច​ម្សិល​មិញ ៤​នាក់​ រី​ឯ​៤​នាក់​ទៀត​ត្រូវ​បញ្ជូន​​ទៅ​ថ្ងៃ​អង្គារនេះ។

លោកវរសេនីយ៍ឯក ខេង ​ទី​តូ​ មន្រ្តី​នាំ​ពាក្យ​កង​រាជ​អាវុធ​ហត្ថ​លើ​ផ្ទៃ​ប្រទេស​កាល​ពី​ម្សិល​មិញ បាន​ឲ្យ​ដឹង​ថា​ សមត្ថកិច្ច​សម្រុះ​បាន​ចុះ​ឃាត់​ខ្លួន​ជន​សង្ស័​យ​បាន​៨​នាក់​ នៅ​កន្លែង​​ផ្សេង​គ្នា និង​ក្នុង​ពេល​ខុស​គ្នា ពាក់​ព័ន្ធ​នឹង​ករណី​គ្រឿង​ញៀន ហើយ​ឥឡូវ​អ្នក​ទាំង​៨​នាក់​នោះ​ត្រូវ​ខាង​ជំនាញ​បញ្ចប់​ការ​ស៊ើប​សួរ​និង កសាង​សំណុំ​រឿង​រួច​រាល់​ហើយ។

លោកបញ្ជាក់ថា៖ «ជន​ទាំង​៨នាក់​ ដែល​មាន​ស្ត្រីម្នា​ក់​ផង​នោះ សមត្ថកិច្ច បាន​បញ្ចប់​នីតិវិធី​រួច​ហើយ។ ក្នុង​ចំណោម​​នោះ​មាន​៤​នាក់​ដែល​បាន​ឃាត់​ខ្លួន​មុន​ត្រូវ​បញ្ជូន​ទៅ តុលាការ​នៅ​ល្ងាច​ថ្ងៃទី​១៨​ ខែកុម្ភៈ និង​៤នាក់​ទៀត​ដែល​ឃាត់​ខ្លួន​នៅ​ខណ្ឌ​ទួល​គោក នឹង​បញ្ជូន​ទៅ​តុលាការ​នៅ​ថ្ងៃទី​១៩ ខែកុម្ភៈ»។

លោក​ ខេង ទី​តូ​ ប្រាប់​ឲ្យដឹង​ថា​ជន​សង្ស័យ​ទាំង​៨នាក់ ក្រោយ​ការ​ឃាត់​ខ្លួន​សមត្ថកិច្ច​រឹប​អូស​បាន​ថ្នាំ​ញៀន​សរុប ៣៣​កញ្ចប់​ដែល​ជា​វត្ថុតាង​ជាក់​ស្តែង។ ពួកគេ​ត្រូវ​សមត្ថកិច្ច​ចម្រុះ​កង​រាជ​អាវុធ​ហត្ថ​រាជធានី​ភ្នំពេញ និង​សមត្ថកិច្ច​នគរបាល​ខណ្ឌ​ទួល​គោក​និង​ខណ្ឌ​ពោធិ៍​សែន​ជ័យ ឃាត់​ខ្លួន​ក្នុង​ប្រតិបត្តិ​ការ​របស់​កម្លាំង​សមត្ថកិច្ច​ចម្រុះ​ធ្វើ​ឡើង​ផ្ទួនៗ​គ្នា​ទៅ​លើ​ក្រុម​ជន​ចែក​ចាយ​និង​ជួញ​ដូរ​គ្រឿង​ញៀន​នៅ​តាម​ផ្លូវ​លំ​ម្តុំ​ក្បែរ​អង់តែន​ទួល​គោក​ស្ថិត​នៅ​ក្នុង​ខណ្ឌ​ទួល​គោក។ លោក​ថាមិន​បាន​ចាំ​ឈ្មោះ​ជន​សង្ស័យ​ទេ តែ​ថា សមត្ថកិច្ច​បាន​ឃាត់​ខ្លួន​​នៅ​ថ្ងៃទី​១៧ ​កុម្ភៈ និង​ដក​ហូត​វត្ថុ​តាង​គ្រឿង​ញៀន​ម៉ាទឹកកក​ចំនួន​២៣​កញ្ចប់​តូច​និង​ឃាត់​ខ្លួន​ជន​សង្ស័យ​៤​នាក់។

ដោយឡែក​មន្រ្តី​នគរបាល​ខណ្ឌ​ពោធិ៍សែន​ជ័យ​ក៏​រំឭក​ឲ្យដឹង​ដែរ​ថា កម្លាំង​នគរបាល​ខណ្ឌ​និង​កង​រាជ​អាវុធ​ហត្ថ​រាជធានី​ភ្នំពេញ​កាល​ពី​យប់​ថ្ងៃ​ទី១៥ ខែ​កុម្ភៈ ​ឆ្នាំ​២០១៣ បាន​ចុះ​ឃាត់​ខ្លួន​ជន​សង្ស័យ​ច​៤​នាក់​ជា​បន្ត​បន្ទាប់​ពី​បទ​លក់​និង​ចែក​ចាយ គ្រឿង​ញៀន។ ដោយ​ក្នុង​ប្រតិបត្តិការ​នោះ សមត្ថកិច្ច​ដក​ហូត​បាន​សម្ភារ​សម្រាប់ សេព​និងថ្នាំ​ញៀន​១០​កញ្ចប់ ប្រភេទ​ម្សៅស៕

អត្ថបទគួរចាប់អារម្មណ៍