The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ក្រុម​ឧកញ៉ា​គ្រឿង​ញៀន​ទៅ​តុលាការ

បញ្ជូន​ក្រុម​ឧកញ៉ា​គ្រឿង​ញៀន​ទៅ​តុលាការ

បញ្ជូន​ក្រុម​ឧកញ៉ា​គ្រឿង​ញៀន​ទៅ​តុលាការ

121129_10
ឧកញ៉ាគ្រឿងញៀន តាន់ សេងហាក់ព្រមទាំងបក្ខពួក និងវត្ថុតាងដែលសមត្ថកិច្ចរឹបអូស

ភ្នំពេញៈ ក្រុម​ឧកញ៉ា​ពាក់​ព័ន្ធ​គ្រឿង​ញៀន​ដែល​សមត្ថកិច្ច​ឡោម​ព័ទ្ធ​ចាប់​កាល​ពី​ថ្ងៃ​អង្គារ​ត្រូវ​នគរបាល​នៃ​មន្ទីរ​ប្រឆាំង​គ្រឿង​ញៀន​ចាត់​បញ្ជូន​ទៅ​ស៊ើប​សួរ​នៅ​សាលា​ដំបូង​រាជធានី​ភ្នំពេញ នៅ​ថ្ងៃ​ព្រហស្បតិ៍​នេះ។

លោក​ឧត្តម​សេនីយ៍ ខៀវ សាម៉ន ប្រធាន​នាយក​ដ្ឋាន​ប្រឆាំង​គ្រឿង​ញៀន​នៃ​ក្រសួង​មហាផ្ទៃ​បាន​ឲ្យ​ដឹង​ពី​ម្សិល​មិញ​ថា តាម​នីតិវិធី​ជន​សង្ស័យ​គ្រឿង​ញៀន​ដែល​សមត្ថកិច្ច​នគរបាល​ឃាត់​ខ្លួន កាល​ពី​ថ្ងៃ​ទី​២៧ វិច្ឆិកា នឹង​ត្រូវ​បញ្ជូន​ទៅ​សាលា​ដំបូង​រាជធានី​ភ្នំពេញ​នៅ​ថ្ងៃ​ព្រហស្បត៍​នេះ​បន្ទាប់​ពី​សមត្ថកិច្ច​ធ្វើ​ការ​សាក​សួរ​រួច​រាល់។

លោក​បន្ត​ឲ្យ​ដឹង​ទៀត​ថា តាម​នីតិវិធី​ការ​ឃុំ​ខ្លួន​មិន​ឲ្យ​លើស​ពី​៤៨​ម៉ោង​ទេ ប៉ុន្តែ​បើ​មាន​ការងារ​ច្រើន​អាច​នឹង​ពន្យារ​ពេល​១០​ឬ​២០​ម៉ោង បន្ត​ទៀត​ទៅ​តាម​ការ​ងារ​ជាក់​ស្តែង។

លោក​បន្ត​ឲ្យ​ដឹង​ថា៖ «បើ​ទោះ​ជន​សង្ស័យ​ត្រូវ​កម្លាំង​សមត្ថកិច្ច​ចាប់​ឃាត់​ខ្លួន​ទាំង​ជាង​១០​នាក់​ក្តី ប៉ុន្តែ ក្នុង​ចំណោម​ពួក​គេ​អាច​នឹង​ត្រូវ​ដោះ​លែង​វិញ បន្ទាប់​ពី​ស៊ើប​សួរ​ដឹង​ថា​នរណា​ពាក់​ព័ន្ធ​និង​មិន​ពាក់​ព័ន្ធ ព្រោះ​កម្រិត​នៃ​ពួកគេ​ជួន​កាល​អ្នក​ខ្លះ​ជា​សិស្ស ឬ​ជា​កូន​ក្មេង​មិន​ទាន់​គ្រប់​អាយុ​និង​អ្នក​ខ្លះ​មិន​ស្ថិត​នៅ​ក្នុង​រង្វង់​ប្រតិបត្តិ​ការ​នោះ ដូច្នេះ​នឹង​ត្រូវ​ឲ្យ​ពួកគេ​ត្រឡប់​ទៅ​ផ្ទះ​វិញ»។

លោក​បញ្ជាក់​ប្រាប់​ថា ជួន​កាល​ជន​សង្ស័យ​អាច​ជាប់​ពាក់​ព័ន្ធ​ទាំង​អស់​ក៏​មាន​ឬ​ជួន​កាល​អ្នក​នោះ​មាន​ជាប់​ពាក់​ព័ន្ធ​នឹង​រឿង​ផ្សេង​ទៀត​ដែល​នាំ​ឲ្យ​សមត្ថកិច្ច​ឈាន​ទៅ​រក​ឃើញ​មុខ​សញ្ញា​មួយ​ផ្សេង​ទៀត។ ដូច្នេះ​ប្រសិន​គេ​បាន​រាយ​ការណ៍​ស្មោះ​ត្រង់​ប្រាប់​សមត្ថកិច្ច​បែប​នេះ​នឹង​អាច​ធ្វើ​ការ​ជាមួយ​បាន​យូរ​អង្វែង​សមត្ថកិច្ច​អាច​បញ្ជូន​គេ​ឲ្យ​ត្រឡប់​ទៅ​ផ្ទះ​វិញ។​ដូច្នេះ​មិន​មែន​មាន​ន័យ​ថា ជន​សង្ស័យ​ដែល​ចាប់​ខ្លួន​ទាំង​អស់​នោះ សុទ្ធ​តែ​ត្រូវ​នាំ​ខ្លួន​ទៅ​តុលាការ​ទាំង​អស់​គ្នា​នោះ​ទេ។

គួររំឭក​ដែរ​ថា កាល​ពី​ថ្ងៃ​ទី២៧ ខែ​វិច្ឆិកា​សមត្ថកិច្ច​ចម្រុះ បាន​ឆ្មក់​ចូល​ចាប់​ឃាត់​ខ្លួន​នៅ​ភូមិ​គ្រឹះ​របស់​ឧកញ៉ា តាន់ សេង​ហាក់ មាន​ទាំង​ប្រពន្ធ និង​កូន​៥​នាក់ រួម​មាន​ឈ្មោះ ឡុង នារី ជា​ប្រពន្ធ តាន់ សូលាន អាយុ​២០​ឆ្នាំ, តាន់ សុភ័ក្រ អាយុ​២៥​ឆ្នាំ​និង​តាន់ ភារុន អាយុ​២៧​ឆ្នាំ ជាមួយ​នឹង​ជន​ពាក់​ព័ន្ធ​១១​នាក់​ទៀត​ស្ថិត នៅ​ភូមិ​ពោង​ពាយ សង្កាត់​ភ្នំពេញ​ថ្មី ខណ្ឌ​សែន​សុខ ដោយ​ធ្វើ​ការ​រឹប​អូស​បាន​វត្ថុ​តាង​មាន​ថ្នាំ​កូកា​អ៊ីន​មួយ​កញ្ចប់​ធំ ថ្នាំ​មេតំ​ហ្វេតា​មីន​ច្រក​ក្នុង​ថង់​ប្លាស្ទិក​ទំហំ​ប៉ុន​បាត​ដៃ ចំនួន​៥​ថង់ និង​ថ្នាំ​ម៉ាទឹក​កក​ច្រក​ក្នុង​ថង់​តូចៗ​មួយ​ចំនួន​ទៀត។ ដប​ទឹក​សុទ្ធ​ជា​ឧបករណ៍​សម្រាប់​ជក់​ចំនួន​១០ កំប៉ុង​ហ្គាស​១​ទូរស័ព្ទ​ចល័ត​ចំនួន​៩​គ្រឿង អាយ​ផេត​១គ្រឿង ម៉ាស៊ីន​ថត​ឌីជីថល​ចំនួន ៤ គ្រឿង ​ម៉ូតូ​៩​គ្រឿង​និង​គ្រាប់​កាំភ្លើង​រ៉ូឡូ​១០​គ្រាប់ រថយន្ត​ម៉ាក K.iA ពណ៌ស​ពាក់​ស្លាក ភ្នំពេញ 2R-​7453 លិខិត​ឆ្លង​ដែន​២​ច្បាប់ ប្រាក់​២៥០០​ដុល្លារ លុយ​ខ្មែរ​ថ្មី​១ដុំ និង​គ្រឿង​អលង្ការ​មួយ​ចំនួន​ទៀត។

ក្រោយ​មក​មន្រ្តី​ការិយា​ល័យ​នៃ​មន្ទីរ​ប្រឆាំង​គ្រឿង​ញៀន​និង​ព្រះ​រាជ​អាជ្ញារង​ដែល​បាន​ចុះ​ទៅ​អនុវត្ត​ការ​ងារ​ផ្ទាល់ បាន​ឯកភាព​សម្រេច​ដោះ​លែង​កូន​ប្រុស​របស់​ជន​សង្ស័យ តាន់ សេង​ហាក់ ២នាក់ និង​កម្មករ​ដែល​គេ​ជួល​ឲ្យ​កាប់​ដូង ២​នាក់​ទៀត៕

អត្ថបទគួរចាប់អារម្មណ៍