The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ជន​កំណាច​ខុស​គេ​ដែល​សម្លាប់​អ្នក​ភូមិ​ទៅ​តុលាការ




បញ្ជូន​ជន​កំណាច​ខុស​គេ​ដែល​សម្លាប់​អ្នក​ភូមិ​ទៅ​តុលាការ

បញ្ជូន​ជន​កំណាច​ខុស​គេ​ដែល​សម្លាប់​អ្នក​ភូមិ​ទៅ​តុលាការ

កំពង់ឆ្នាំងៈ ជន​ដៃ​ដល់​ដែល​ដេញ​កាប់​មនុស្ស​​មួយ​គ្រួសារ​និង​កាប់​តា​ពិការ​ម្នាក់ ស្លាប់ កាល​ពីថ្ងៃ​ទី២២​ មករា​ នៅ​ស្រុក​ទឹក​ផុស ​ត្រូវ​សមត្ថកិច្ច​នគរបាល​ខេត្ត​កំពង់ឆ្នាំង​ចាប់​បញ្ជូន​ទៅ​សាលា​ ដំបូង​ខេត្ត​កាល​ពី​ព្រឹក​ម្សិលមិញ។

លោក ឌុច ចំរើន នាយ​នគរបាល​ព្រហ្ម​ទណ្ឌ​កម្រិត​ធ្ងន់​ខេត្ត​កំពង់ឆ្នាំង​ឲ្យ​ដឹង​ពី​ម្សិល​មិញ​ថា​ជន​ដៃ​ដល់​ដែល​ដេញ​កាប់​គ្រួសារ​មួយ​និង​កាប់​បាន​តែ​លោក​តា​ពិការ​ជើង​ម្នាក់​ស្លាប់​ ឯ​ជីដូន​និង​ចៅ​រត់​គេច​ខ្លួន​រួច​ ត្រូ​វចាប់​ខ្លួន​​បញ្ជូន​ទៅ​សាលា​ដំបូង​ខេត្ត​កាល​ពី​ម្សិល​មិញ។

លោក ​ថ្លែង​ថា​៖​«ជន​​ដៃ​ដល់​ក្រោយ​ពី​ឃុំ​ខ្លួន​សាក​សួរ​រួច​ សមត្ថកិច្ច​បាន​កសាង​សំណុំ​រឿង​បញ្ជូន​ទៅ​តុលាការ​ខេត្ត ដោយ​ចោទ​ប្រ​កាន់​ពី​បទ​ឃាតកម្ម​គិត​ទុក​ជា​មុន»។

លោក ខែម វិបុល​ អធិការ​នគរបាល​ស្រុក​ទឹក​ផុស​រំឭក​ឲ្យដឹង​ថា ជន​ដៃ​ដល់​ឈ្មោះ អ៊ឹម ឆន អាយុ​៤២​ឆ្នាំ ឯ​ជន​រងគ្រោះ​ឈ្មោះ សុខ ចិន អាយុ​៦៧​ឆ្នាំ​ស្លាប់ និង​យាយ ឈុន សឿន​អាយុ​៥៨​ឆ្នាំ ហើយ​និង​ចៅប្រុស ចន ​ណាក់​ អាយុ​៥​ឆ្នាំ​ ទាំងអស់​គ្នា​រស់​នៅ​ភូមិ​កាកាប ឃុំ​ពពក ស្រុក​ទឹក​ផុស​ ខេត្ត​កំពង់ឆ្នាំង។

លោក​ឲ្យ​ដឹង​ទៀត​ថា ជន​ដៃដល់​ពី​ដើម​មក​ចេះ​តែ​ដើរ​រំខាន​អ្នក​ភូមិ ទើប​ម្តាយ​​ចាប់​ដាក់​ច្រវាក់ តែ​បាន​រត់​រួច​ទៅ​នៅ​ក្នុង​ខ្ទម ក្នុង​ចម្ការ​ក្បែរ​ភូមិ​ម្នាក់​ឯង។ ប៉ុន្តែ ដោយ​ជន​នេះ​កាច​សាហាវ​ពេក អ្នក​ភូមិ​ដែល​ទៅ​នៅ​ក្បែរ​នាំ​គ្នា​រើខ្ទម​មក​​នៅ​ក្នុង​ភូមិ​វិញ ដែល​សូម្បី​តែ​ម្តាយ​បង្កើត​ក៏​មិន​ហ៊ាន​រស់​នៅ​ជាមួយ​ដែរ។

លោក អធិការ​បន្ត​ថា មុន​កើត​ហេតុ ជន​រងគ្រោះ សុខ ចិន ជា​ជន​ពិការ​ជើង​បាន​នាំ​ប្រពន្ធ និង​ចៅប្រុស​ទៅ​បាច​ត្រី​ក្នុង​អូរ​មួយ នៅ​ក្បែរ​ខ្ទម​ជននេះ ស្រាប់​តែជន​ដៃ​ដល់​ឃើញ​ក៏​ទាញ​កាំបិត​កកុក​ដង​វែង​ដេញ​កាប់​តែ​ម្តង ធ្វើ​ឲ្យ​ជន​រងគ្រោះ រត់​គេច​ប្រាស​អាយុ​រៀងៗ​ខ្លួន រីឯ​ចៅ​និង​ប្រពន្ធ​គាត់ បាន​រត់​កាត់​វាល​ស្រែ​គេច​រួច​ខ្លួន ​តែ​ជន​រងគ្រោះ​ដែល​ពិការ​រត់​មិន​រួច ត្រូវ​ជន​ល្មើស​កាប់​ចិញ្ច្រាំ​រហូត​ដល់​ស្លាប់។

លោក​ឲ្យ​ដឹងបន្ត​ថា ក្រោយពីកាប់​តា ចិន ស្លាប់​ ជន​ល្មើស​បាន​ដើរ​ទៅ​ដេក​ច្រៀង​នៅ​ក្នុង​ខ្ទម​ និង​និយាយ​ថា មក​ពី​ពួក​គាត់​នាំ​គ្នា​ទៅ​បាច​​ត្រី​នៅក្នុង​អូរ​របស់​គេធ្វើ​ព្រ​ងើយ។

លោក​ប្រាប់ថា​ ជន​សង្ស័យ​មិន​មែន​ឆ្កួតឬ​វិកល​ចរិត​អី​ទេ ​ព្រោះគេ​ចេះ​រស់​នៅ​ម្នាក់​ឯង​ធ្វើ​ស្រែ​ចម្ការ​ដាំ​បាយ ចិញ្ចឹម​មាន់​ទា ដូចគេ​ឯង​ដែរ ​តែ​ជន​នេះ​មាន​ចរិត​កាច​ពី​កំណើត៕

អត្ថបទគួរចាប់អារម្មណ៍