The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ជន​ដៃ​ដល់​កាប់​គូ​ទំនាស់​៣​ពូថៅ​ទៅ​តុលាការ




បញ្ជូន​ជន​ដៃ​ដល់​កាប់​គូ​ទំនាស់​៣​ពូថៅ​ទៅ​តុលាការ

បញ្ជូន​ជន​ដៃ​ដល់​កាប់​គូ​ទំនាស់​៣​ពូថៅ​ទៅ​តុលាការ

បន្ទាយមានជ័យៈ បុរស​ដែល​កាប់​បុរស​ម្នាក់​ទៀត ៣ ពូថៅ ខណៈ​កំពុង​ឈរ​និយាយ​ទូរស័ព្ទ កាលពី​ថ្ងៃ​អង្គារ នៅ​ក្រុង​សិរីសោភ័ណ ត្រូវ​ស្នងការ​នគរបាល​ខេត្ត បញ្ជូន​ខ្លួន​ទៅ​សាលា​ដំបូង​ខេត្ត​បន្ទាយមានជ័យ កាលពី​ព្រឹក​ម្សិលមិញ​ពីបទ​ហិង្សា​ដោយ​ចេតនា។

លោក ជូ ផារិន នាយ​ការិយាល័យ​ព្រហ្មទណ្ឌ​កម្រិត​ស្រាល នៃ​ស្នងការ​នគរបាល​ខេត្ត​បន្ទាយ​មានជ័យ បាន​ឲ្យ​ដឹង​ថា ជន​សង្ស័យ​ជា​ជន​ដៃ​ដល់ ដែល​បាន​កាប់​ជន​រងគ្រោះ​៣​ពូថៅ ឲ្យ​រង​របួស​ធ្ងន់​នោះ ត្រូវ​បាន​បញ្ជូន​ទៅ​តុលាការ​ខេត្ត​ហើយ កាលពី​ម្សិលមិញ។ លោក​បន្ត​ថា៖ «ខ្ញុំ​បាន​រៀបចំ​សំណុំ​រឿង​បញ្ជូន​ទៅ​តុលាការ បន្ទាប់​ពី​ឃាត់​ខ្លួន​បាន ១ យប់ ដោយ​ត្រូវ​ចោទ​ប្រកាន់​ពីបទ​ហិង្សា​ដោយ​ចេតនា មាន​ស្ថាន​ទម្ងន់​ទោស»។

លោក​រ៉ែម វីរៈ អធិការ​នគរបាល​ក្រុង​សិរីសោភ័ណ រំឭក​ថា ហេតុការណ៍​នេះ កើត​ឡើង ពីថ្ងៃ​អង្ការ ដែល​ជនរងគ្រោះ មាន​ឈ្មោះ ទុយ សឿន​ភេទ​ប្រុស​អាយុ ៤៨ ឆ្នាំ។ រីឯ​ជន​សង្ស័យ​ឈ្មោះ មៀត សីគុយ ភេទ​ប្រុស​អាយុ ២៩ ឆ្នាំ​រស់នៅ​ភូមិ​ទំនប់​ជ្រៃ សង្កាត់​ទឹកថ្លា ក្រុង​សិរីសោភ័ណ។ លោក​និយាយ​ថា៖ «ជន​រងគ្រោះ ត្រូវ​ជន​សង្ស័យ​កាប់​ចំ​ថ្ពាល់​១​ពូថៅ​យ៉ាង​ដំណំ​ដួល ហើយ​ត្រូវ​ជន​សង្ស័យ កាប់​ទៅ​លើ​ជើង​និង​ដៃ​ទៀត ហើយ​ត្រូវ​សាច់​ញាតិ​បញ្ជូន​ទៅ​មន្ទីរ​ពេទ្យ​ជា​បន្ទាន់»។ លោក​ឲ្យ​ដឹង​ទៀតថា ជន​សង្ស័យ និង​ជន​រងគ្រោះ មានទំនាស់​ពាក្យ​សម្ដី​នឹង​គ្នា ដោយ​សារ​តែ​រឿង​ដី​ធ្លី ដែល​ពួក​គេ បាន​ឈ្លោះ​ប្រកែក​គ្នា​កាលពី​ថ្ងៃទី​១០ ខែ​ធ្នូ​ឆ្នាំ​២០១២ ពាក់ព័ន្ធ​នឹង​ព្រំ​ដី​ផ្ទះ​ជាប់​គ្នា ហើយ​ប្រហែល​ជា​ជន​សង្ស័យ​មាន​គំនុំ​ចាប់​តាំង​ពី​ពេល​នោះ​មក។ ដោយ​ឃើញ​គូទំនាស់​និយាយ​ទូរស័ព្ទ​ឌឺដង​ដាក់​ខ្លួន ជន​សង្ស័យ​ក៏​មាន​កំហឹង រត់​ចូល​ទៅ​ក្នុង​ផ្ទះ​របស់​ខ្លួន យក​ពូថៅ​រត់​សំដៅ​ទៅ​កាប់​ជន​រងគ្រោះ។ ដោយ​មិន​អាច​តដៃ​បាន ជន​រងគ្រោះ​ក៏​បាន​ដួល​ទៅ​លើ​ដី។ ពេល​នោះ​ប្រជា​ពលរដ្ឋ​ជាច្រើន​នាក់ បាន​នាំ​គ្នា​រត់​ទៅ​ជួយ រួច​ចាប់​ជន​ដៃ​ដល់​ប្រគល់​ឲ្យ​នគរបាល​ប៉ុស្តិ៍​ទឹក​ថ្លា​តែ​ម្ដង។

បើ​តាម​មន្ត្រី​សមត្ថកិច្ច ក្រោយ​ឃាត់​ខ្លួន​ជនសង្ស័យ គេ​បាន​ឆែកឆេរ​រក​ឃើញ​ថ្នាំ​គ្រាប់ ស ចំនួន​២​កញ្ចប់ ក្នុង​នោះ​១​កញ្ចប់​មាន​ថ្នាំ​ចំនួន ៤៦​គ្រាប់ និង​១​កញ្ចប់​ទៀត​មាន​ថ្នាំ​៤៧​គ្រាប់ សរុប​៩៣​គ្រាប់​ជា​ថ្នាំ​សរសៃ​ប្រសាទ​នៅ​លើ​ខ្លួន​ជន​សង្ស័យ៕

អត្ថបទគួរចាប់អារម្មណ៍