The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ជន​ដៃ​ដល់​សម្លាប់​ស្រី​ស្នេហ៍​ខ្លួន​ទៅ​តុលាការ




បញ្ជូន​ជន​ដៃ​ដល់​សម្លាប់​ស្រី​ស្នេហ៍​ខ្លួន​ទៅ​តុលាការ

បញ្ជូន​ជន​ដៃ​ដល់​សម្លាប់​ស្រី​ស្នេហ៍​ខ្លួន​ទៅ​តុលាការ

តាកែវៈ បុរស​ពោះ​ម៉ាយ​ដែល​បាន​ល្បួង​ស្រី​ស្នេហ៍​ចូល​ព្រៃ​ហើយ​វាយ​សម្លាប់​ព្រោះ​ខឹង​មិន​ព្រម​រួម​រស់​ជាមួយ​និង​ប្លន់​យក​ទ្រព្យ​សម្បត្តិ កាល​ពី​១ខែ​មុន ត្រូវ​ស្នង​ការ​នគរបាល​ខេត្ត​តាកែវ​ចាប់​បញ្ជូន​ទៅ​សាលា​ដំបូង​ខេត្ត​កាល​ពី​រសៀល​ម្សិល​មិញ បន្ទាប់​ពី​សមត្ថកិច្ច​ស្រុក​ត្រាំកក់​ស្រាវ​ជ្រាវ​ចាប់​ខ្លួន​បាន​ពី​ថ្ងៃ​ទី​១​ខែ​មករា។

លោក សួន ថុន ស្នងការ​រង​នគរបាល​ខេត្ត​បាន​​ឲ្យ​ដឹង​ថា ជន​សង្ស័យ​ជា​ឃាតក​ដែល​ត្រូវ​បាន​ចាប់​ខ្លួន​និង​បញ្ជូន​មក​ស្នង​ការ កាល​ពី​ថ្ងៃ​ទី១ មករា​នោះ ខាង​ជំនាញ​បាន​រៀប​ចំ​សំណុំ​ឯកសារ​យោង​ទៅ​តាម​ចម្លើយ​សារភាព​របស់​ជន​នោះ​រួច​រាល់​ហើយ។

លោក​បញ្ជាក់​ថា៖ «យើង​បាន​បំពេញ​សំណុំ​រឿង​បញ្ជូន​ជន​សង្ស័យ​ទៅ​កាន់​តុលាការ​នៅ​រសៀល​ថ្ងៃ​ពុធ ពាក់​ព័ន្ធ​បទ​ឃាតកម្ម»។

លោក ចេង ចន្រ្តា អធិការ​រង​នគរបាល​ស្រុក​ត្រាំកក់​ឲ្យ​ដឹង​ថា ជន​សង្ស័យ​ត្រូវ​សមត្ថកិច្ច​ចាប់​ខ្លួន​យោង​តាម​វត្ថុ​តាង​ដែល​ប្រមូល​បាន​នៅ​ក្បែរ​សាកសព​ស្រ្តី​រង​គ្រោះ​នៅ​ក្នុង​ព្រៃ រួម​មាន​ក្រដាស​១​សន្លឹក និង​ស៊ីម​ទូរស័ព្ទ​មួយ។

លោកថ្លែងថា ៖ «វត្ថុ​តាង​ក្រដាស​និង​ស៊ីម​ទូរស័ព្ទ​នោះ​ជា​របស់​ស្រ្តី​រង​គ្រោះ​នៅ​រុំ​ជាប់​នឹង​ខ្សែ​កាត​ពាក់​ក​សម្គាល់​ខ្លួន​ដែល​ជន​សង្ស័យ​មិន​បាន​ប្រមូល​អស់​ក្រោយ​សម្លាប់​នាង» ។

លោករំឭក​ថា ស្រ្តី​រង​គ្រោះ​ឈ្មោះ​ជួង​ចាន់​ធី ហៅ ជឿន ចាន់ធី អាយុ​២៩​ឆ្នាំ មាន​ប្តី​ឈ្មោះ អ៊ុន ភឿន អាយុ​៣១​ឆ្នាំ​និង​កូន​២​នាក់ កូន​ស្រី​អាយុ​៧ឆ្នាំ ប្រុស​អាយុ​៥ឆ្នាំ​ជា​កម្មការិនី​កាត់​ដេរ​នៅ​ភូមិ​ដូង​កុក សង្កាត់​បឹង​ធំ ខណ្ឌ​ពោធិ៍​សែន​ជ័យ រាជធានី​ភ្នំពេញ។

លោកប្រាប់ថា ស្រ្តី​រង​គ្រោះ​បាន​បាត់​ខ្លួន​កាល​ពី​ថ្ងៃ​ទី១ ខែ​ធ្នូ រហូត​ដល់​អ្នក​ភូមិ​ប្រទះ​ឃើញ​តែ​គ្រោង​ឆ្អឹង​នៅ​ក្នុង​ព្រៃ ថ្ងៃ​ទី​២៧ ធ្នូ​ឆ្នាំ​២០១២ ព្រម​ទាំង​បាត់​ម៉ូតូ​១​គ្រឿង ម៉ាក​សង់​០៨ និង​គ្រឿង​អលង្ការ​ជាប់​នឹង​ខ្លួន។​រីឯ​ជន​សង្ស័យ​ឈ្មោះ ស៊ុន ថែន អាយុ​៣២​ឆ្នាំ ​រស់​នៅ​ភូមិ​ប្រជុំ ឃុំ​ស្រែន​នោង ស្រុក​ត្រាំ​កក់ ខេត្ត​តាកែវ ជា​ជាង​ផ្សារ​ដែក​និង​ធ្វើ​ស្រែ។

លោក​អធិការ​រង​បន្ត​ថា ជន​សង្ស័យ​សារភាព​ថា មូល​ហេតុ​ដែល​គេ​សម្លាប់​នាង​ព្រោះ​ខ្លួន​បាន​សុំ​រស់​នៅ​ជាមួយ​គ្នា​មួយ​ជីវិត ខណៈ​ខ្លួន ជា​ពោះ​ម៉ាយ ប៉ុន្តែ​ត្រូវ​ស្រ្តី​រង​គ្រោះ​បដិសេធ ហេតុ​នេះ​ហើយ​ក៏​សម្លាប់​តែ​ម្តង​ទៅ។

ស្រ្តី ជួង សុខឃឿន ជា​បង​បង្កើត​និយាយ​ថា ប្អូន​ស្រី​នាង​បាន​រាប់​អាន​ជាមួយ​ក្មួយ​របស់​ជន​សង្ស័យ ដែល​ត្រូវ​ក្មួយ​នោះ​ណែនាំ​ឲ្យ​នាង​ស្គាល់​បន្ត។

អ្នកស្រី សុខឃឿន បន្ត​ថា៖«កាល​ពី​ប្អូន​ខ្ញុំ​មាន​ទំនាក់​ទំនង​ជន​សង្ស័យ ពេល​ខ្លះ​នាង​ប្រាប់​ថា ទៅ​ដេក​ផ្ទះ​មិត្ត​ភក្តិ តែ​ក្រុម​គ្រួសារ​មិន​ចាប់​អារម្មណ៍​ទេ»៕

អត្ថបទគួរចាប់អារម្មណ៍