The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ជន​សង្ស័យ​ជា​ឃាតករ​អារ-ក​ស្ត្រី​ម្នាក់​ទៅ​តុលាការ

បញ្ជូន​ជន​សង្ស័យ​ជា​ឃាតករ​អារ-ក​ស្ត្រី​ម្នាក់​ទៅ​តុលាការ

បញ្ជូន​ជន​សង្ស័យ​ជា​ឃាតករ​អារ-ក​ស្ត្រី​ម្នាក់​ទៅ​តុលាការ

បាត់ដំបងៈ ជន​សង្ស័យ​ជា​ឃាតករ​ម្នាក់​ក្នុង​ចំណោម ២​នាក់ ត្រូវ​បញ្ជូន​ទៅ​តុលាការ​ខេត្ត​បន្ទាប់​ពី​សមត្ថកិច្ច​កង​រាជ​អាវុធហត្ថ​មូលដ្ឋាន​និង​ខេត្ត​ឃាត់​ខ្លួន​នៅ​ព្រឹក​ថ្ងៃ​សុក្រ​ពាក់​ព័ន្ធ​សំណុំ​រឿង​អារ-ក​សម្លាប់​ស្រ្តី​ម្នាក់​ប្លន់​យក​លុយ​កាល​ពី​រំលង​អធ្រាត្រ​ឆ្លង​ចូល​ថ្ងៃ ទី​២៨ ខែ​មីនា នៅ​ក្នុង ភូមិ​ល្វា ឃុំ​ល្វា ស្រុក​បវេល។

លោក ឡាច ប្រុស នាយ​ការិយាល័យ​ស្រាវជ្រាវ​បទ​ល្មើស​ព្រហ្មទណ្ឌ​កង​រាជ​អាវុធហត្ថ ខេត្ត​បាន​ឲ្យ​ដឹង​ថា ជន​រងគ្រោះ​មាន​ឈ្មោះ ក្រឹម ផូ ភេទ​ស្រី អាយុ ៦៦​ឆ្នាំ មាន​ទីលំនៅ​ក្នុង ភូមិ​ល្វា ឃុំ​ល្វា ស្រុក​បវេល ខេត្ត​បាត់ដំបង។ ចំណែក​ជន​សង្ស័យ​មាន​ឈ្មោះ ផន សុភ័ណ ភេទ​ប្រុស អាយុ ៤០​ឆ្នាំ មាន​ទីលំនៅ​ទល់​មុខ​ផ្ទះ​ស្ត្រី​រងគ្រោះ ត្រូវ​កម្លាំង​កង​រាជ​អាវុធហត្ថ​មូលដ្ឋាន​សហការ​និង​កម្លាំង​ខេត្ត​ចាប់​ខ្លួន​បញ្ជូន​មក​បញ្ជាការដ្ឋាន​កង​រាជ​អាវុធហត្ថ​ខេត្ត។ ប៉ុន្តែ ជន​សង្ស័យ​ម្នាក់​ទៀត​ឈ្មោះ រិទ្ធ រស់​នៅ ខេត្ត​សៀមរាប បាន​រត់​គេច​ខ្លួន​បាត់។

លោក ឡាច ប្រុស បញ្ជាក់​ថា៖ «ជន​សង្ស័យ​បាន​កសាង​សំណុំ​រឿង​បញ្ជូន​ទៅ​តុលាការ​នៅ​ថ្ងៃ​ចន្ទ​រួច​ហើយ ខណៈ​បក្ខពួក​គេ​ម្នាក់​រត់​គេច​ខ្លួន»។

លោក​នាយ​ការិយាល័យ​បន្ត​ថា មុន​ពេល​កើត​ហេតុ​ជន​សង្ស័យ ផន សុភ័ណ បាន​ជួប​ជាមួយ​ឈ្មោះ រិទ្ធ ហើយ​បបួល​គ្នា​ទៅ​ធ្វើ​ការ​នៅ ប្រទេស​ថៃ តែ​ដោយសារ​គ្មាន​លុយ​ធ្វើ​ដំណើរ​យប់​នោះ​ក៏​បែក​គំនិត​នាំ​គ្នា​ចូល​ប្លន់​លុយ​ពី​ស្រ្តី​រងគ្រោះ។ ជន​រងគ្រោះ​បាន​ប្រគល់​លុយ​ឲ្យ​គេ​ហើយ តែ​ពួក​គេ​នៅ​បន្ត​ជំរិត​ទារ​បន្ថែម​ទៀត ដោយ​ស្រ្តី​រងគ្រោះ​មិន​ព្រម​ឲ្យ​ពួក​គេ​ក៏​អារ ក និង​ចាក់​សម្លាប់​ប្លន់​យក​លុយ​តែ​ម្តង។

លោក​ថា នៅ​ចំពោះ​មុខ​សមត្ថកិច្ច​ជន​សង្ស័យ​បាន​សារភាព​ថា ខ្លួន​ជា​អ្នក​នៅ​ចាំ​ផ្លូវ ហើយ​ឈ្មោះ រិទ្ធ ជា​អ្នក​ចូល​ទៅ​ប្លន់​និង​សម្លាប់។​ក្រោយ​ពេល​ប្លន់​បាន​លុយ ឈ្មោះ រិទ្ធ បាន​គេច​ខ្លួន​បាត់ ហើយ​ខ្លួន​គ្រាន់​តែ​ដឹង​ថា ឈ្មោះ​នេះ​គេ​រស់​នៅ​ក្នុង ខេត្ត​សៀមរាប តែ​ប៉ុណ្ណោះ មិន​ស្គាល់​ច្បាស់​លាស់​ទេ។

លោក​បន្ថែម​ថា៖ «ជន​សង្ស័យ​មាន​ទីលំនៅ​ទល់​មុខ​ផ្ទះ​ស្ត្រី​រងគ្រោះ។ រឿង​នេះ​ខ្មោច​ក្នុង​វា​ឲ្យ​ដៃ ទើប​ខ្មោច​ក្រៅ​វា​ហ៊ាន។ ឯ​ជន​សង្ស័យ​បាន​សារភាព​អស់​ហើយ​ថា ខ្លួន​គេ​ពិត​ជា​បាន​ចូល​រួម​សម្លាប់​ជន​រងគ្រោះ​ដើម្បី​យក​លុយ​មែន»៕

អត្ថបទគួរចាប់អារម្មណ៍