The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ជន​សង្ស័យ​ប្លន់​សម្លាប់​អ្នក​រត់​ម៉ូតូ​ឌុប​ទៅ​តុលាការ




បញ្ជូន​ជន​សង្ស័យ​ប្លន់​សម្លាប់​អ្នក​រត់​ម៉ូតូ​ឌុប​ទៅ​តុលាការ

បញ្ជូន​ជន​សង្ស័យ​ប្លន់​សម្លាប់​អ្នក​រត់​ម៉ូតូ​ឌុប​ទៅ​តុលាការ

កណ្តាលៈ នគរបាល​ក្រុង​តាខ្មៅ​កាល​ពី​ថ្ងៃ​ពុធ​ម្សិល​មិញ បាន​បញ្ជូន​ជន​សង្ស័យ​ជា​ចោរ​ប្លន់​ដោយ​យក​កាំបិត​អារក​សម្លាប់​អ្នក​រត់​ម៉ូតូ​ឌុប​ម្នាក់​ទៅ​សាលា​ដំបូង​ខេត្ត​កណ្តាល។

លោកប៊ុត ស៊ឹមបណ្ឌិត អធិការ​នគរបាល​ក្រុង​តា​ខ្មៅ​បាន​ឲ្យ​ដឹង​ថា​ជន​សង្ស័យ​ដែល​ធ្វើ​សកម្មភាព​អារក​សម្លាប់​អ្នក​រត់​ម៉ូតូ​ឌុប​នោះ ឈ្មោះ​ថុល ប៊ុន​ធឿន​អាយុ​១៨​ឆ្នាំ រស់​នៅ​ភូមិ​ទួល​ក្រសាំង ឃុំ​រកា​ខ្ពស់​ស្រុក​ស្អាង ខេត្ត​កណ្តាល មុខ​របរ​មិន​ពិត​ប្រាកដ។ រីឯ​ជន​រង​គ្រោះ​ក្នុង​អំពើ​ឃាតកម្ម​នោះ​ឈ្មោះ ឆន់ ប៉ុន ហៅ ស អាយុ ២៩ ឆ្នាំ ជា​ប្រជា​ការពារ ភូមិ​ដើម​មៀន​ឆ្លៀត​រត់​ម៉ូតូ​ឌុប​នៅ​ពេល​ទំនេរ។

លោក​បាន​ឲ្យ​ដឹង​ទៀត​ថា៖​«យើង​សម្រេច​បញ្ជូន​ជន​សង្ស័យ​ម្នាក់​នេះ​ទៅ​តុលាការ ដោយ​ចោទ​ប្រកាន់​ពី​បទ​ឃាតកម្ម​គិត​ទុក​ជា​មុន ព្រោះ​ជន​សង្ស័យ​បាន​ប្រព្រឹត្ត​ជាក់​ស្តែង»។

លោក​បាន​បន្ដ​ថា​ហេតុ​ការណ៍​នេះ​បាន​កើត​ឡើង​កាល​ពី​យប់​ថ្ងៃ​ទី​១៧ ខែ​ធ្នូ នៅ​ចំណុច​ផ្លូវ​លេខ ២១១​ក្នុង​ភូមិ​ព្រៃ​រាំង​សង្កាត់​កំពង់​សំណាញ់ ក្រុង​តាខ្មៅ ក្បែរ​បន្ទាយ​យោធា​ខេត្ត​កណ្តាល។

ជន​សង្ស័យ​សារភាព​នៅ​ប៉ុស្តិ៍​ប៉ូលិស​ថា មុន​កើត​ហេតុ រូបគេ​បាន​ឈរ​រង់​ចាំ​ម៉ូតូ​ឌុប មាន​កាំបិត​សៀត​នៅ​ក្នុង​ខោ​ជា​ស្រេច ក្នុង​គោល​បំណង​ហៅ​ម៉ូតូ​ឌុប​យក​ទៅ​ប្លន់ ដើម្បី​យក​ទៅ​លក់​បាន​លុយ​ទិញ​ខោអាវ​ថ្មី។

លោក​បាន​ឲ្យ​ដឹង​ទៀត​ថា​បន្ទាប់​ពី​ឡើង​ម៉ូតូ ទៅ​ដល់​ចំណុច​កើត​ហេតុ​ជន​សង្ស័យ​បាន​ដក​កាំបិត​អារក​ជន​រង​គ្រោះ បណ្តាល​ឲ្យ​ដាច់​បំពង់​ក ជន​រង​គ្រោះ​បាន​រត់​ចេញ​ពី​ម៉ូតូ​និង​ស្រែក​ហៅ​ឲ្យ​គេ​ជួយ ក៏​ដួល​ដាច់​ខ្យល់​ស្លាប់​តែ​ម្តង រីឯ​ជន​សង្ស័យ​វិញ ក៏​រត់​ចូល​ទៅ​ក្នុង​បឹង​ឈូក​បាត់។

បន្ទាប់​ឡើង​ដើរ​លើ​ថ្នល់​វិញ ដោយ​ដោះ​អាវ​និង​ដោះ​ស្បែក​ជើង​លុះ​ដើរ​មក​ដល់ មជ្ឈមណ្ឌល​កុមារ​អារុណ​រះ​ទួល​ក្រសាំង ក៏​ត្រូវ​កម្លាំង​នគរបាល​ប៉ុស្តិ៍​រកា​ខ្ពស់ ឃាត់​ខ្លួន​តែ​ម្តង៕

អត្ថបទគួរចាប់អារម្មណ៍