The Phnom Penh Post Search

Search form

Logo of Phnom Penh Post newspaper Phnom Penh Post - បញ្ជូន​មន្ត្រី​មណ្ឌល​ជន​ពិការ​ទៅ​ពន្ធនាគារ




បញ្ជូន​មន្ត្រី​មណ្ឌល​ជន​ពិការ​ទៅ​ពន្ធនាគារ

បញ្ជូន​មន្ត្រី​មណ្ឌល​ជន​ពិការ​ទៅ​ពន្ធនាគារ

130408_10a
ឃួន វណ្ណា ដែលត្រូវបានចោទពីបទរំលោភក្មេងស្រីក្រោមអាយុ នប.ជក

បន្ទាយមានជ័យៈ អនុប្រធាន​មណ្ឌល​អភិវឌ្ឍន៍​ជន​ពិការ ៣១៧​ភ្នំ​ឆត្រ នៅ​ភូមិ​ចម្ការ​គ​ស្រុក​ស្វាយ​ចេក ត្រូវ​នគរបាល​ប្រឆាំង​ការ​ជួញ​ដូរ​មនុស្ស​ខេត្ត​បន្ទាយ​មាន​ជ័យ​ចាប់​ខ្លួន បញ្ជូន​ទៅ​សាលា​ដំបូង​ខេត្ត កាល​ពីថ្ងៃ​ទី​៧ ខែ​មេសា និង​ត្រូវ​តុលាការ​បញ្ជូន​បន្ត​ទៅ​ឃុំ​ខ្លួន​នៅ​ពន្ធ​នាគារ ក្រោម​ការ​ចោទ​ពី​បទ​រំលោភ​ក្មេង​ស្រី​ក្រោម​អាយុ​១៤ ឆ្នាំ​ប្រមាណ​២០​នាក់ បន្ទាប់​ពី​មាន​ក្មេង​ស្រី​៣​នាក់​បាន​ចេញ​មុខ​ប្តឹង​ទៅ​សមត្ថកិច្ច។

លោក សិទ្ធិ ឡោះ ស្នង​ការ​រង​នគរបាល​ខេត្ត​ទទួល​បន្ទុក​ផ្នែក​ប្រឆាំង​ការ​ជួញ​ដូរ​មនុស្ស​និង ការពារ​អនីតិជន បាន​ឲ្យ​ដឹង​ថា ជន​សង្ស័យ​ជា​មន្រ្តី​យោធិន​ពិការ ជា​ប្រធាន​មណ្ឌល​អភិវឌ្ឍន៍ជន​ពិការ​តេជោ​ភ្នំ​ឆត្រ​ត្រូវ​សមត្ថកិច្ច ចាប់​បញ្ជូន​ទៅ​សាលា​ដំបូង​ខេត្ត​កាល​ពី​ម្សិលមិញ​បន្ទាប់​ពី​បាន​ឃាត់ និង​ឃុំ​ខ្លួន ក្រោយ​ពេល​សាក​សួរ​នៅ​ស្នងការ​ខេត្ត​រួច។

លោក​ថ្លែង​ថា៖​«ជន​សង្ស័យ​ពាក់​ព័ន្ធ​នឹង​បទ​រំលោភ​សេព​សន្ថវៈ ក្មេង​មិន​គ្រប់​អាយុ ខ្ញុំ​បាន​កសាង​សំណុំ​រឿង​ហើយ​ដើម្បី​ឲ្យ​ចៅក្រម​ស៊ើប​សួរ​និង​ចោទ​ប្រកាន់​បន្ត។ ជន​សង្ស័យ​បាន​ប្រព្រឹត្ត​ល្មើស​លើ​ក្មេង​ស្រី​ក្រោម​អាយុ​១៤​ឆ្នាំ ប្រមាណ​២០​នាក់ ហើយ​ក្មេង​៣​នាក់​ក្នុង​ចំណោម​ក្មេង​រងគ្រោះ​បាន​ចេញ​មុខ​ប្តឹង​សមត្ថកិច្ច​ផ្ទាល់»។

លោកបន្តថា មុន​ការ​ឃាត់​ខ្លួន​ជន​សង្ស័យ ឪពុក​ម្តាយ​ក្មេង​ស្រី​រងគ្រោះ​បាន​ដាក់​ពាក្យ​ប្តឹង​ចោទ​ជន​សង្ស័យ​ឈ្មោះ ឃួន វណ្ណា​អាយុ ៦០ ឆ្នាំ អនុប្រធាន​មណ្ឌល​អភិវឌ្ឍន៍​ជន​ពិការ​ថា បាន​រំលោភ​សេព​សន្ថវៈ​មក​លើ​កូនៗ​ពួកគាត់​ជា​អនីតិជន​ហើយ​ត្រូវ​សមត្ថកិច្ច​ឃាត់​ខ្លួន​ជន​នេះ​នៅ​ក្នុង​ភូមិ​ចម្ការ​គ ឃុំ​-ស្រុក​ស្វាយ​ចេក​ ដោយ​មាន​អង្គការ​អេបផល អាយ​ជី​អ៊ឹម​និង​អង្គ​ការ​វល​វី​សិន​ចូល​រួម​ផង។

លោក ឃឹម​ វ៉ាន់ដូ ​ប្រ​ធាន​គម្រោង​អង្គ​ការ​អេប​ផល បាន​ឲ្យ​ដឹងថា ព្រះ​រាជ​អាជ្ញាសាលា​ដំបូង​ខេត្ត​បាន​សម្រេច​ចោទ​ប្រ​កាន់​ឈ្មោះ  ឃួន វណ្ណា ជា​ផ្លូវ​ការ​ហើយ​កាល​ពី​ម្សិល​មិញ។

លោកបានបញ្ជាក់​ថា៖ «​ឃួន​វណ្ណា ត្រូវ​ព្រះ​រាជ​អាជ្ញា​ចោទ​ប្រកាន់​ពី​បទ​រំលោភ​មាន​ស្ថាន​ទម្ងន់​ទោស​និង បាន​ចេញ​ដី​កា​ឲ្យ​ឃុំ​ខ្លួន​ហើយ។ ក្មេង​ស្រី​រង​គ្រោះ​បី​នាក់ ក្នុង​ចំណោម​ក្មេង​រង​គ្រោះ​២០​នាក់​ មាន​អាយុពី​៩ឆ្នាំ ដល់​១៣​ឆ្នាំ ដែល​ខ្លះ​រង​គ្រោះ​តាំង​ពី​ឆ្នាំ​២០០១​មក​បាន​ដាក់​ពាក្យ​ប្តឹង​ជន ជាប់​ចោទ​រូប​នេះ»។

មន្រ្តីសមាគម​ការពារ​សិទ្ធិ​មនុស្ស​អាដ​ហុក ប្រចាំ​ខេត្ត​បន្ទាយ​មាន​ជ័យ​ឲ្យ​ដឹង​ថា សំណុំ​រឿង​នេះ​ឪពុក​ម្តាយ​ក្មេង​ស្រី​រងគ្រោះ​ធ្លាប់​ដាក់​ប្តឹង​មក អង្គការ​អាដ​ហុក​ម្តង​ហើយ​កាល​ពី​ឆ្នាំ​២០០៨ ហើយ​បាន​ស្ងប់​ទៅ​វិញ​ដោយ​សារ​ពលរដ្ឋ​ខ្លាច​ឥទ្ធិ​ពល​លោក ឃួន វណ្ណា​ប៉ុន្តែ​ខាង​អាដ​ហុក​​នៅ​តែ​បន្ត​តាម​ឃ្លាំ​មើល​រហូត​មក។

មន្រ្តីអាដហុក​បន្ត​ថា អាដ​ហុក​មិន​បាន​ទទួល​បណ្តឹង​ថ្មី​ពាក់​ព័ន្ធ​នឹង​រឿង​នេះ​ទេ ហើយ​រដ្ឋាភិបាល​ក៏​បាន​ធ្វើ​ការងារ​នេះ​ដែរ ដូច្នេះ​អាដហុក​មិន​លូក​ដៃ​ទេ ប៉ុន្តែ នឹង​តាម​ឃ្លាំ​មើល​រឿង​នេះ ព្រោះ​ថា​ឃួន វណ្ណា ជា​អតីត​មន្រ្តី​មាន​ឥទ្ធិពល​ជាប់​សន្តាន​នឹង​មន្រ្តី​ធំៗ៕

អត្ថបទគួរចាប់អារម្មណ៍