The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​មេ​សន្តិសុខ​វាយ​កម្មករ​ទៅ​តុលាការ




បញ្ជូន​មេ​សន្តិសុខ​វាយ​កម្មករ​ទៅ​តុលាការ

បញ្ជូន​មេ​សន្តិសុខ​វាយ​កម្មករ​ទៅ​តុលាការ

121231_09b
កម្មកររោងចក្រ SL ដែលរងការវាយដំពីកងសន្តិសុខរោងចក្រ សហការី

ភ្នំពេញៈ បុរស​ជា​មេ​កង​សន្តិសុខ​រោង​ចក្រ​កាត់​ដេរ SL ដែល​នគរបាល​ខណ្ឌ​មាន​ជ័យ​ឃាត់​ខ្លួន​កាល​ពី​ម្សិល​មិញ​តាម​បណ្តឹង​របស់​កម្មករ​៣​នាក់​ដែល​បាន​ប្តឹង​ចោទ​ពី​បទ​បង្ក​របួស​ស្នាម ត្រូវ​បញ្ជូន​ទៅ​សាលា​ដំបូង​ភ្នំពេញ​នៅ​ថ្ងៃ​ចន្ទ​នេះ។

លោក ជិម ស៊ីថា អធិការ​រង​នគរបាល​ខណ្ឌ​មាន​ជ័យ​បាន​ឲ្យ​ដឹង​ពី​ម្សិល​មិញ​ថា មេកង​សន្តិសុខ​នៅ​រោង​ចក្រ SLឈ្មោះ​ហេង អាយុ​៣០​ឆ្នាំ ត្រូវ​បាន​ឃាត់​ខ្លួន​តាម​បណ្តឹង​របស់​កម្មករ​និង​ត្រូវ​បញ្ជូន​ខ្លួន​ទៅ​សាលា​ដំបូង​រាជធានី​នៅ​ថ្ងៃ​ចន្ទ​នេះ។

លោកប្រាប់ថា ៖ «មេ​សន្តិសុខ​ម្នាក់​នេះ​ត្រូវ​កម្មករ​គប់​នឹង​ដុំ​ថ្ម​ក្រោយ​ពី​បាន​វាយ​កម្មករ​បី​នាក់ ហើយ​ទម្រាំ​ចូល​យក​ចេញ​មក​ក្រៅ​បាន ត្រូវ​ប្រើ​ពេល​ជិត​៣​ម៉ោង​ព្រោះ​តែ​ការ​រារាំង​ពី​ក្រុម​កម្មករ​រាប់​រយ​នាក់​និង​ត្រូវ​មាន​ការ​សម្រប​សម្រួល​ពី​សហជីព​ក្នុង​រោង​ចក្រ​ផង»។

លោករំឭកថា ហេតុ​ដែល​មេ​សន្តិសុខ​នេះ​វាយ​កម្មករ កើត​ឡើង​កាល​ពី​យប់​ថ្ងៃ​ទី​២៩ ធ្នូ នៅ​ក្នុង​រោង​ចក្រ​កាត់​ដេរ SL នៅ​ម្តុំ​ស្ទឹង​មាន​ជ័យ ប៉ុន្តែ លោក​មិន​ដឹង​ថា ខាង​ណា​បង្ក​ហិង្សាលើ​ខាង​ណា​មុន​ទេ ព្រោះ​ពួក​គេ​អះ​អាង​តែ​រៀងៗ​ខ្លួន។

កម្មករ ស៊ុំ សំណាង អាយុ​១៩ឆ្នាំ ដែល​អះ​អាង​ថា បាន​រង​ការ​វាយ​ដំ​ម្នាក់ ក្នុង​ចំណោម​កម្មករ​៣​នាក់ បាន​ប្រាប់​ថា ពួកគេ​៣​នាក់ មាន​ឈ្មោះ ហួរ និង​ឈ្មោះ​ថេន ត្រូវ​សន្តិសុខ​រោង​ចក្រ​៥​នាក់ មក​គំរាម​វាយ​ខណៈ​ពួកគេ​កំពុង​ដើរ តែ​គេ​បាន​សួរ​ទៅ​វិញ​ថា​មាន​រឿង​អី​និយាយ​គ្នា​តាម​សម្រួល​ទៅ ស្រាប់​តែ​កង​សន្តិសុខ​ទាំង​នោះ​ស្ទុះ​មក​វាយ​ពួកគេ​គ្មាន​ត្រា​ប្រណី​តែ​ម្តង ហើយ​រូប​គេ​ក៏​រត់​ទៅ​ប្រាប់​តំណាង​សហជីព​រោង​ចក្រ​ឲ្យ​មក​ជួយ​ឃាត់។

លោកបន្តទៀត​ថា ក្រោយ​មក​ស្រាប់​តែ​មេ​សន្តិសុខ​ឈ្មោះ​ហេង ទៅ​សួរ​រក​អ្នក​ដែល​បាន​ឃើញ​ហេតុ​ការណ៍ ខ្លួន​ក៏​អះ​អាង​ថា​«ជា​អ្នក​បាន​ឃើញ» ហើយ​ក៏​ត្រូវ​ឈ្មោះ ហេង ហៅ​ចូល​បន្ទប់​ទៅ​សួរ​នាំ តែ​បែរ​ជា​ត្រូវ​គេ​វាយ​តែ​ម្តង។

លោក​ប្រាប់​ថា ៖ «ពេល​ខ្ញុំ​ចូល​ដល់​ក្នុង​បន្ទប់ ហេង បិទ​ភ្លើង​ហើយ​ស្ទុះ​មក​ទាត់​ធាក់​ខ្ញុំ​នឹង​ស្បែក​ជើង​ត្រូវ​ដើម​ទ្រូង ចុង​ដង្ហើម​និង​​ពោះ ខ្ញុំ​ក៏​រត់​ចេញ​មក​វិញ ហើយ​ត្រូវ​ប្រពន្ធ​មេ​សន្តិសុខ​នោះ​ដេញ​តាម​ចាប់​ទៀត តែ​ខ្ញុំ​ប្រឹង​រត់​បាន​រួច»។

លោក​ប្រាប់​ថា ភ្លាម​នោះ​ខាង​ថៅកែ​រោង​ចក្រ​បាន​ដឹក​ពួកគេ​ទៅ​ឆ្លុះ​អេកូ​មើល​ម្តង​ហើយ តែ​ពី​ម្សិល​ដោយ​ឈឺ​ពេក ក៏​ទៅ​ឆ្លុះ​មើល​ម្តង​ទៀត​នៅ​គ្លីនិក​លឹម កាំង ហើយ​ថៅកែ​រោង​ចក្រ​ធានា​ចេញ​ថ្លៃ​ព្យាបាល​រហូត​ជា ទើប​ឲ្យ​ចូល​ធ្វើ​ការ​វិញ​និង​សន្យា​បើក​លុយ​ឲ្យ​ដដែល។

លោក សំណាង ប្រាប់ថា៖ «ខ្ញុំដាក់​ពាក្យ​ប្តឹង​ទៅ​ប៉ុស្តិ៍​ស្ទឹង​មាន​ជ័យ និង​ទារ​សង​ជំងឺ​ចិត្ត​១០​លាន​រៀល ពី​មេ​កង​សន្តិសុខ​នោះ រីឯ​២​នាក់​ទៀត​ទារ​ម្នាក់​ៗ​ចំនួន​៥​ពាន់​ដុល្លារ»។

លោកសុខ ដាណយផារៈខាន់ តំណាង​សហជីព​សេរីកម្មករ​ប្រចាំ​រោង​ចក្រ SL បាន​ឲ្យ​ដឹង​ថា ចាប់​ពី​យប់​មាន​ជម្លោះ​វាយ​ដុំ​មក​រហូត​ដល់​ព្រឹក​ថ្ងៃ​ម្សិល​មិញ ក្រុម​កម្មករ​នៅ​ឈរ​តវ៉ា​ទាម​ទារ​ឲ្យ​ថៅកែ​បញ្ឈប់​មេ​សន្តិសុខ​និង​កង​សន្តិសុខ​ក្នុង​រោង​ចក្រ​ឲ្យ​អស់​ក្នុង​រយៈពេល​៥​ថ្ងៃ​ទើប​កម្មករ​សុខ​ចិត្ត ហើយ​ទាម​ទារ​ឲ្យ​ថៅកែ​រក​យុត្តិធម៌​ឲ្យ​កម្មករ​៣​នាក់​នោះ​ផង។

ចំណែក​ខាង​រោងចក្រ បាន​សុំ​ពន្យារ​ពេល​ព្រោះ​មិន​អាច​ផ្លាស់​ប្តូរ​ទាន់។

លោក ស ម៉ូរ៉ា ប្រធាន​សហជីព​កម្មករ​ចំណី​អាហារ​និង​សេវាកម្ម​កម្ពុជា​លើក​ឡើង​ថា បើ​សន្តិសុខ​នោះ​ជា​បុគ្គលិក​របស់​រោង​ចក្រ គឺ​ត្រូវ​ខាង​រោង​ចក្រ​ចាត់​វិធាន​ការ​លើ​បុគ្គល​នោះ​និង​ចាត់​វិធាន​ការ​តាម​ផ្លូវ​ច្បាប់ ព្រោះ​ជា​បទ​ល្មើស​ព្រហ្ម​ទណ្ឌ។ តែ​បើ​ជា​សន្តិសុខ​ឯក​ជន គឺ​ក្រុម​ហ៊ុន​សន្តិសុខ​នោះ ដោះ​ស្រាយ​ឲ្យ​អ្នក​រង​គ្រោះ​និង​ត្រូវ​បញ្ឈប់​បុគ្គល​នោះ​ហើយ​ចាត់​វិធាន​ការ​តាម​ផ្លូវ​ច្បាប់។

លោក យិន វេងកា មេធាវី​ខាង​រោង​ចក្រ​បាន​ប្រាប់​ថា រឿង​នេះ​ថៅកែ​រោង​ចក្រ​បាន​ជួយ​ចេញ​ថ្លៃ​ព្យាបាល​ដល់​កម្មករ​ទាំង​៣​នាក់​ហើយ ហើយ​ជន​សង្ស័យ​ក៏​ត្រូវ​សមត្ថកិច្ច​យក​ទៅ​ដោះ​ស្រាយ​តាម​ផ្លូវ​ច្បាប់​ហើយ​ដែរ។ លោក​បញ្ជាក់​ថា៖ «ធម្មតា​អ្នក​ប្រព្រឹត្ត​ត្រូវ​ចេញ​សំណង​ទៅ​ជន​រង​គ្រោះ ហើយ​ថៅកែ​ត្រូវ​ប្តឹង​ពី​សន្តិសុខ​នោះ​ផង​ដែរ ព្រោះ​ជា​សន្តិសុខ​ឯក​ជន​ជួល​មក តែ​វា​កើត​នៅ​ក្នុង​រោង​ចក្រ ដូច្នោះ​បាន​ជា​ខាង​ថៅកែ​រោង​ចក្រ​ជួយ​មើល​ការ​ខុស​ត្រូវ»៕

អត្ថបទគួរចាប់អារម្មណ៍