The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​ម្តាយ​ជំរិត​កូន​ឯង​និង​គូកន​ទៅ​តុលាការ




បញ្ជូន​ម្តាយ​ជំរិត​កូន​ឯង​និង​គូកន​ទៅ​តុលាការ

បញ្ជូន​ម្តាយ​ជំរិត​កូន​ឯង​និង​គូកន​ទៅ​តុលាការ

ភ្នំពេញៈ ស្រ្តី​ជា​ជន​សង្ស័យ​និង​គូកន​រួម​គំនិត​ម្នាក់ ក្នុង​ករណី​យក​កូន​លាក់ ហើយ​ទូរស័ព្ទ​ជំរិត​ទារ​ប្រាក់​ពី​ប្តី ដែល​នគរបាល​ខណ្ឌ​ចំការមន​ចាប់​ខ្លួន ​កាល​ពី​ថ្ងៃទី២៨​ខែ​មករា ​សមត្ថកិច្ច​សម្រេច​បញ្ជូន​ទៅ​សាលា​ដំបូង​រាជធានី​ភ្នំពេញ​កាល​ពី​ម្សិលមិញ​ហើយ។

លោក អ៊ុច សុខុន អធិការ​នគរបាល​ខណ្ឌ​ចំការ​មន​ប្រាប់​ពី​ម្សិលមិញ​ថា ជន​សង្ស័យ​ពីរនាក់​ដែល​ម្នាក់​ជា​ម្តាយ​បង្កើត និង​ម្នាក់​ជា​គូកន​ពាក់ព័ន្ធ​នឹង​ករណី​ចាប់​កូន​ជំរិត​ទារ​ប្រាក់​ពី​ប្តី ខាង​សមត្ថកិច្ច​បាន​បញ្ជូន​ទៅ​តុ​លាការ កាល​ពី​ម្សិលមិញ​ហើយ ​ដោយ​ចោទ​ប្រកាន់​ពី​បទ​ចាប់​ជំរិត។

កាលពីថ្ងៃទី២៨ មករា កម្លាំង​សមត្ថកិច្ច​នគរបាល​ខណ្ឌ​ចំការ​មន បាន​ឃាត់​ខ្លួន​បុរស​ឈ្មោះ​ធឿន ភក្តី អាយុ​​២១​ឆ្នាំ និង​ស្រ្តី​ឈ្មោះ វីន សាវី អាយុ​៤១​ឆ្នាំ ​បន្ត​បន្ទាប់​គ្នា ក្នុង​ករណី​ជាប់​​សង្ស័យ​អ្នក​ទាំង​ពីរ​បាន​យក​កូន​ប្រុស​ខ្លួន​ទៅ​លាក់ រួច​ទូរស័ព្ទ​ទៅ​គំរាម​ជំរិត​ទារ​ប្រាក់​ពី​ឪពុក​បង្កើត​របស់​ក្មេង​រងគ្រោះ​ចំនួន​៤ពាន់​ដុល្លារ​ ដោយ​ឲ្យ​បុរស​ជា​​គូកន​ ជា​អ្នកនិយាយ​ទូរ​ស័ព្ទ​​ដើម្បី​បំភ័ន្ត​ប្តី។

ក្រោយពី​ឃាត់​ខ្លួន ជន​សង្ស័យ​ឆ្លើយ​សារ​ភាព​ចំពោះ​មុខ​សមត្ថកិច្ច​ថា រូបគេ​និង​អតីត​ប្តី​បាន​លែងលះ​គ្នា ប៉ុន្តែ​កូន​ប្រុស​នោះ​គេ​មិន​ឲ្យ​ទៅ​ប្តី​ទេ យក​មក​ចិញ្ចឹម​ខ្លួន​ឯង​ប៉ុន្តែ​ ដោយ​ចង់​សាក​ចិត្ត​ប្តី​ក៏​បែក​គំនិត​ធ្វើ​បែប​នេះ​ទៅ។

មន្រ្តី​នគរបាល រំឭក​ប្រាប់​ថា​ជន​សង្ស័យ​បាន​ផ្តើម​គំនិត​គំរោង​ចាប់​ជំរិត​​នេះ តាំង​ពីថ្ងៃ​ទី២៣ ​ខែ​មករា​មក​ម្ល៉េះ ដោយ​ស្រ្តី​ជាម្តាយ​បង្កើត​របស់​ក្មេង​រង​គ្រោះជា​មេគំនិត។​ ស្រ្តីជា​ម្តាយ​ឈ្មោះ វីន​សាវី ស្នាក់​នៅ​បន្ទប់​ជួល​លេខ​៣ សង្កាត់​ផ្សារ​ដើម​ថ្កូវ ខណ្ឌចំការ​មន ​ជា​អ្នក​​រក​ស៊ី​ដើរ​រាប់​លុយ មាន​កូន​ប្រុស​ឈ្មោះ ​សុខុម តុលា​ អាយុ​៧ឆ្នាំ។ ឯគូកន​ឈ្មោះ ធឿន​ភក្តី ស្នាក់​នៅ​​ផ្ទះ​លេខ​១៤៩ ភូមិ​សន្សំ​កុសល​សង្កាត់​បឹង​ទំពុន ខណ្ឌ​មាន​ជ័យ ជា​ជាង​កាត់​ដេរខោអាវ៕

អត្ថបទគួរចាប់អារម្មណ៍