The Phnom Penh Post Search

Search form




Logo of Phnom Penh Post newspaper Phnom Penh Post - បញ្ជូន​អ្នក​កាសែត​បើក​ឡាន​កិន​កូន​ក្រឡា​បញ្ជី​ស្លាប់​ទៅ​តុលាការ




បញ្ជូន​អ្នក​កាសែត​បើក​ឡាន​កិន​កូន​ក្រឡា​បញ្ជី​ស្លាប់​ទៅ​តុលាការ

បញ្ជូន​អ្នក​កាសែត​បើក​ឡាន​កិន​កូន​ក្រឡា​បញ្ជី​ស្លាប់​ទៅ​តុលាការ

ក្រចេះ ជន​សង្ស័យ​ដែល​ថា​ជា​ចាង​ហ្វាង​កាសែត​ក្នុង​ស្រុក​មួយ​ដែល​បាន​បើក​ឡាន​កិន​កូន​ក្រឡា​បញ្ជី​តុលាការ​ខេត្ត​ក្រចេះ​ស្លាប់ ត្រូវ​ស្នង​ការ​នគរបាល​ខេត្ត​បញ្ជូន​មក​សាលា​ដំបូង​ខេត្ត​កាល​ពី​ព្រឹក​ម្សិល​មិញ បន្ទាប់​ពី​បាន​បង្ក​ហេតុ​កាល​ពី​ថ្ងៃ​ទី១៤ មករា ក្នុង​បរិវេណ​តុលាការ។

លោក ជួង ស៊ាងហាក់ ស្នងការ​នគរបាល​ខេត្ត​ក្រចេះ​ប្រាប់​ថា៖​«លោក​មិន​អាច​បំភ្លឺ​ពី​ករណី​នេះ​បាន​ទេ ព្រោះ​អី​ជន​សង្ស័យ​បញ្ជូន​ទៅ​តុលាការ​ហើយ ដូច្នេះ​វា​ជា​សមត្ថកិច្ច​របស់​តុលាការ»។

ព្រះ​រាជអាជ្ញា​ដែល​កាន់​សំណុំ​រឿង​នេះ លោក ចាប សួររស្មី មិន​អាច​ទាក់​ទង​បាន​ទេ​ពី​ថ្ងៃ​ពុធ។

លោក លាស់ នី ក្រឡាបញ្ជី​នៃ​សាលា​ដំបូង​ខេត្ត ជា​ឪពុក​កុមារា​រង​គ្រោះ​ប្រាប់​ថា ជន​សង្ស័យ​ត្រូវ​សមត្ថកិច្ច​នាំ​ខ្លួន​ទៅ​សាក​សួរ​នៅ​សាលា​ដំបូង​កាល​ពី​ម្សិល​មិញ​មិន​ដឹង​ថា លោក​ព្រះ​រាជ​អាជ្ញា​ចាត់​ការ​យ៉ាង​ម៉េច​ទេ។

លោក​បន្ត​ថា៖ «ខ្ញុំ​បាន​ទារ​សំណង​១ម៉ឺន​ដុល្លារ ប៉ុន្តែ ប្រពន្ធ​ជន​សង្ស័យ​ប្រកែក​និង​សុំ​សង​ត្រឹម​២ពាន់​ដុល្លារ តែ​ខ្ញុំ​មិន​ព្រម​ព្រោះ​កូន​ខ្ញុំ​ស្លាប់​មួយ​ទាំង​មូល»។

លោក​អះអាង​ថា លោក​ព្រម​បញ្ចុះ​មក​នៅ​ត្រឹម​៥ពាន់​ដុល្លារ​ហើយ បើ​ខាង​ភាគី​បង្ក​មិន​ព្រម​ករណី​នេះ​នឹង​ប្រគល់​ឲ្យ​ច្បាប់​ចាត់​ការ ព្រោះ​ជីវិត​កូន​ម្នាក់​មិន​អាច​ដូរ​ប្រាក់​២ពាន់​ដុល្លារទេ​។

លោក​បន្ត​ថា កូន​ប្រុស​២​នាក់ អា​ប្អូន​ស្លាប់​នេះ​ឈ្មោះ ស៊ាវ ហ្វុង អាយុ​៣​ឆ្នាំ គេ​ទាំង​២នាក់​កំព្រា​ម្តាយ ព្រោះ​លោក​និង​ប្រពន្ធ​លែង​លះ​គ្នា ហើយ​កូន​លោក​ជា​អ្នក​មើល​ថែ​រស់​នៅ​ក្នុង​សាលា​ដំបូង​ខេត្ត តែ​អកុសល​កូន​ត្រូវ​ស្លាប់។

លោក​ឲ្យ​ដឹង​ថា នៅ​ថ្ងៃ​កើត​ហេតុ លោក​បាន​ឡើង​ទៅ​ជាន់​លើ​ដើម្បី​រៀប​ចំ​បន្ទប់​ធ្វើ​ការ ហើយ​បាន​ឮ​គេ​ស្រែក ក៏​ចុះ​មក​មើល ឃើញ​កូន​ត្រូវ​រថយន្ត​កិន​បែក​ក្បាល​សល់​តែ​ដង្ហើម លោក​បាន​ស្ទុះ​ស្ទារ​ដឹក​កូន​ទៅ​សង្គ្រោះ​ដែរ តែ​វា​បាន​ស្លាប់​នៅ​តាម​ផ្លូវ។

កាល​ពី​ល្ងាច​ថ្ងៃ​ទី១៥ មករា កន្លង​ទៅ​មាន​ការ​សម្រុះ​សម្រួល ពី​លោក​ព្រះ​រាជ​អាជ្ញា​រង និង​អភិបាល​ស្រុក​ក្រចេះ រួម​ទាំង​ប្រពន្ធ​ជន​សង្ស័យ​ផង​ដើម្បី​បញ្ចប់​រឿង​នេះ ប៉ុន្តែ​មិន​ត្រូវ​រ៉ូវ​គ្នា​លើ​ការ​ផ្តល់​សំណង។

អ្នកស្រី មួយ ឡេង អាយុ​៤០​ឆ្នាំ នៅ​ភូមិ​មេមត់ ស្រុក​មេមត់ ប្រពន្ធ​ជន​ជាប់​សង្ស័យ​ប្រាប់​ថា នាង​សុំ​ផ្តល់​សំណង​ឲ្យ​ឪពុក​ក្មេង​រងគ្រោះ​២ពាន់​ដុល្លារ ប៉ុន្តែ​គាត់​មិន​ព្រម គាត់​ទារ​៥​ពាន់​ដុល្លារ បើ​មិន​ព្រម​ក៏​គិត​ទៀត​ទៅ។

អ្នកស្រី មួយ ឡេង ប្រាប់ថា នាង​គ្មាន​លទ្ធភាព​រក​លុយ​៥ពាន់​ដុល្លារ​បាន​ទេ គឺ​សុំ​សង​ចំនួន​២ពាន់​ដុល្លារ តែ​បើ​គាត់​មិន​ព្រម​នាង​មិន​ដឹង​គិត​យ៉ាង​ម៉េច​ដែរ។​ព្រោះ​ភ្លាមៗ​គាត់​បាន​ចេញ​ថ្លៃ​ដឹក​និង​ព្យាបាល​អស់​៧០០​ដុល្លារ និង​ជួយ​រៀប​ចំ​បុណ្យ​សព​អស់​ប្រាក់​១៥​ម៉ឺន​រៀល​ផង​ដែរ។

កាល​ពីថ្ងៃ​ទី១៤ មករា នៅ​ក្នុង​បរិវេណ​សាលា​ដំបូង​ខេត្ត​ក្រចេះ ឈ្មោះ ជា លីហ៊ាង អាយុ​៤១​ឆ្នាំ នៅ​ភូមិ ឃុំ-​ស្រុក​មេមត់ ជា​ចាង​ហ្វាង​កាសែត​បាន​បើក​រថយន្ត​កាមរី​គូទ​ស្វិត ពាក់​ស្លាក​លេខ ភ្នំពេញ​2A-9604 ទៅ​កិន​កូន​ប្រុស​លោក​ក្រឡា​បញ្ជី​លាស់ នី រង​របួស​ជា​ទម្ងន់ ត្រូវ​បញ្ជូន​ទៅ​មន្ទីរ​ពេទ្យ​ខេត្ត​សង្គ្រោះ តែ​បាន​ស្លាប់​តាម​ផ្លូវ​ពេល​បញ្ជូន​បន្ត​ទៅ​មន្ទីរ​ពេទ្យ​នៅ​ភ្នំពេញ៕

អត្ថបទគួរចាប់អារម្មណ៍