The Phnom Penh Post Search

Search form

Logo of Phnom Penh Post newspaper Phnom Penh Post - បញ្ជូន​អ្នក​ប្រើ​លុយ​ក្លែង​ក្លាយ​នៅ​តាកែវ​២​នាក់​ទៅ​តុលាការ




បញ្ជូន​អ្នក​ប្រើ​លុយ​ក្លែង​ក្លាយ​នៅ​តាកែវ​២​នាក់​ទៅ​តុលាការ

បញ្ជូន​អ្នក​ប្រើ​លុយ​ក្លែង​ក្លាយ​នៅ​តាកែវ​២​នាក់​ទៅ​តុលាការ

តាកែវៈ ជន​សង្ស័យ​ ២ នាក់​ដែល​ពាក់ព័ន្ធ​នឹង​ការ​ចាយ​ប្រាក់​ក្លែង​ក្លាយ​ត្រូវ​ស្នងការ​ដ្ឋាន នគរបាល​ខេត្ត​បញ្ជូន​ទៅ​សាលា​ដំបូង​ខេត្ត​តាកែវ​ កាល​ពី​រសៀល​ម្សិលមិញ បន្ទាប់​ពី​ពួក​គេ​យក​ក្រដាស​ប្រាក់​ប្រភេទ​មួយ​ម៉ឺន​រៀល​ក្លែងក្លាយ​ដើរ​ទិញ ​ទំនិញ​ពី​អ្នក​លក់​ដូរ​ តាំង​ពី​ស្រុក​ដូន​កែវ​ រហូត​មក​ដល់​ស្រុក​សំរោង​ ហើយ​ក៏​ត្រូវ​សមត្ថកិច្ច​ឃាត់​ខ្លួន ​កាល​ពី​ថ្ងៃ​ទី​២៤ ​កុម្ភៈ​ តែ​ម្តង។

លោក​ស្នងការរង សួន​ ផុន​ ទទួល​បន្ទុក​ផ្នែក​ព្រហ្មទណ្ឌ​បាន​ឲ្យ​ដឹង​ថា​ ជន​សង្ស័យ​ដែល​សមត្ថកិច្ច​ឃាត់​ខ្លួន​បញ្ជូន​ទៅ​ស្នងការ​នោះ​ ត្រូវ​បញ្ជូន​បន្ត​ទៅ​សាលា​ដំបូង​ខេត្ត​តាកែវ កាល​ពី​រសៀល​ថ្ងៃ​ចន្ទ​ម្សិលមិញ។ លោក​ថ្លែង​ថា​ ៖ «ជនសង្ស័យ​ត្រូវ​កសាង​សំណុំ​រឿង និង​ចោទ​ប្រកាន់​ពី​បទ​ប្រើប្រាស់​លុយ​ក្លែងក្លាយ»។

លោក មឿង សារុន អធិការ​នគរបាល​ស្រុក​សំរោង​ឲ្យ​ដឹង​ថា ជន​សង្ស័យ​ត្រូវ​បាន​ឃាត់​ខ្លួន ខណៈ​កំពុង​ដើរ​ទិញ​ទំនិញ​ពី​ពលរដ្ឋ​អ្នក​លក់​ដូរ​តាម​ភូមិ ដោយ​ពួក​គេ​ដើរ​ទិញ​តាំង​ពី​ស្រុក​ដូន​កែវ រហូត​ដល់​ស្រុក​សំរោង ​ដោយ​ប្រជាពលរដ្ឋ​មាន​ការ​សង្ស័យ​ហើយ​រាយការណ៍​ប្រាប់​សមត្ថកិច្ច ទើប​កម្លាំង​នគរបាល​លោក​ធ្វើ​ការ​ឃាត់​ខ្លួន​តែ​ម្តង។

លោក​បន្ត​ថា ពួ​កគេ​មាន​ប្រាក់​ប្រភេទ​១ម៉ឺន​រៀល​ក្លែងក្លាយ​ទាំង​អស់​៦៥៧​សន្លឹក និង​ទើប​តែ​ចាយ​អស់​ប៉ុន្មាន​ម៉ឺន​រៀល​តែ ប៉ុណ្ណោះ​ក៏​ត្រូវ​ចាប់​ខ្លួន​តែ​ម្តង។

លោក​ប្រាប់​ថា ជនសង្ស័យ​ម្នាក់​ឈ្មោះ អ៊ុង ភា ភេទ​ប្រុស អាយុ​៣៨​ឆ្នាំ រស់​នៅ​ភូមិ​ត្រពាំង​អង្គ សង្កាត់​រកា​ក្រៅ ក្រុង​ដូន​កែវ និង​ឈ្មោះ សាយ ដា ភេទ​ប្រុស អាយុ​៣៣​ឆ្នាំ រស់នៅ​ភូមិ-ឃុំ​អង្គតាសោម ស្រុក​ត្រាំកក់ នៅ​ខេត្ត​តាកែវ ដូច​គ្នា។

តាម​ចម្លើយ​ជន​សង្ស័យ​ប្រាប់ សមត្ថកិច្ច​ថា ពួក​គេ​បាន​ជិះ​ម៉ូតូ​ដើរ​ចាយ​លុយ​ក្លែងក្លាយ​តាម​ផ្លូវ​ជាតិ​លេខ​២ ចាប់ពី​ក្រុង​ដូន​កែវ រហូត​ដល់​ក្រុង​សំរោង គឺ​បន្ទាប់​ពី​ពួក​គេ​បាន​យក​លុយ​ក្លែងក្លាយ​នេះ​ពី​ឈ្មោះ នី​ នៅ​ភ្នំពេញ តែ​ជន​នោះ​គេ​ទូរស័ព្ទ​មិន​ចូល​ទេ​ តែ​បើ​គេ​ចង់​ហៅ​មក​ពួក​គេ​វិញ​បាន ហើយ​ពួក​គេ​បាន​នាំ​យក​លុយ​ក្លែង​ក្លាយ​មក​ចាយ​នេះ ​ដើម្បី​ដូរ​យក​លុយ​សុទ្ធ​មក​វិញ៕

អត្ថបទគួរចាប់អារម្មណ៍