The Phnom Penh Post Search

Search form




Logo of Phnom Penh Post newspaper Phnom Penh Post - បន្ទាប់​ពី​ស្លាប់​៧​នាក់​អ្នក​ភូមិ​ចង់​លុបអណ្តូង​ទាំង​អស់​ចោល

បន្ទាប់​ពី​ស្លាប់​៧​នាក់​អ្នក​ភូមិ​ចង់​លុបអណ្តូង​ទាំង​អស់​ចោល

អណ្តូង​ក្នុង​ភូមិ​សា​លា​ក្រវាន់​ ​ដែល​បង្ក​ឲ្យ​​មនុស្ស​​​​៧នាក់​​​​ស្លាប់​។
អណ្តូង​ក្នុង​ភូមិ​សា​លា​ក្រវាន់​ ​ដែល​បង្ក​ឲ្យ​​មនុស្ស​​​​៧នាក់​​​​ស្លាប់​។ រូបថត សហ​ការី

បន្ទាប់​ពី​ស្លាប់​៧​នាក់​អ្នក​ភូមិ​ចង់​លុបអណ្តូង​ទាំង​អស់​ចោល

សៀមរាបៈ បន្ទាប់​ពី​មនុស្ស ៧ នាក់​បាន​ស្លាប់​ដោយសារ​តែ​គ្មាន​អ៊ុកស៊ីហ្សែន នៅ​បាត​អណ្តូង​ដែល​មាន​ជម្រៅ ៥ ម៉ែត្រ​នៅ​ពេល​ពួក​គេ​បាន​ចុះ​ទៅ​យក​លុយ​ដែល​ជ្រុះ ៣ ពាន់​រៀល​នៅ​ភូមិ​មួយ​ក្នុង ស្រុក​បន្ទាយស្រី កាល​ពី​ថ្ងៃ​សៅរ៍ អ្នក​ស្រុក​ដែល​ភ័យ​ស្លន់​ស្លោ មាន​គម្រោង​វាយ​កម្ទេច​អណ្តូង​ទឹក​ទាំង​អស់​នៅ​ក្នុង​ភូមិ​ចោល ដើម្បី​ចៀស​វាង​សោកនាដកម្ម​បែប​នេះ​កើត​ឡើង​ទៀត។

លោក ទឹម អ៊ី មេឃុំ រំចេក ក្នុង ស្រុក​បន្ទាយស្រី បាន​ឲ្យ​ដឹង​ថា អ្នក​ដែល​រស់​នៅ​ក្នុង​ឃុំ​នេះ មាន​ការ​ភ័យ​ខ្លាច​ថា ឧបទ្ទវហេតុ​នេះ អាច​កើត​ឡើង​ម្តង​ទៀត។

លោក​បន្ត​ថា៖ «ពួក​គេ​បាន​ស្នើ​ឲ្យ​យើង ប្រើ​ប្រាស់​គ្រឿង​ចក្រ​ជីក​យក​ខ្នោះ​អណ្តូង ហើយ​ចាក់​ដី​លុប​បំពេញ​ដើម្បី​ចៀសវាង​គ្រោះថ្នាក់​ដល់​អ្នក​ផ្សេង​ទៀត»។ នៅ​ក្នុង ឃុំ​រំចេក មាន​អណ្តូង​ទឹក​ប្រមាណ ៣០ ប៉ុន្តែ​មាន​តែ​អណ្តូង​ប្រមាណ ១០ ប៉ុណ្ណោះ​ដែល​អ្នក​ភូមិ​កំពុង​ប្រើ​ប្រាស់​ដោយ​អ្នក​ភូមិ​ជាច្រើន​ទៀត​ប្រើ​ប្រាស់​អណ្តូង​ស្នប់។

លោក​បញ្ជាក់​ថា៖ «យើង​មិន​ទាន់​កំណត់​កាល​បរិច្ឆេទ​នៃ​ការ​វាយ​កម្ទេច​អណ្តូង​ទាំង​នោះ​ទេ ព្រោះ​សមាជិក​គ្រួសារ​របស់​ជន​រងគ្រោះ រវល់​ជាប់​ធ្វើ​បុណ្យ​សព»។

លោក​បន្ត​ថា មិន​មាន​នរណា​ម្នាក់​ដាក់​ពាក្យ​បណ្តឹង​ប្រឆាំង​នឹង​ម្ចាស់​អណ្តូង​ទេ ព្រោះ​ការ​ស្លាប់​នេះ ជា​រឿង​អចេតនា។

រឿង​ដែល​ធ្វើ​ឲ្យ​មនុស្ស​ស្លាប់​ដល់​ទៅ ៧ នាក់ បាន​កើត​ឡើង​កាល​ពី​ព្រឹក​ថ្ងៃ​សៅរ៍ នៅ​ពេល​ដែល​ឪពុក​គ្រួសារ​ក្រីក្រ​មួយ បាន​ជ្រុះ​ដែក​កេះ​នឹង​ប្រាក់ ៣ ពាន់​រៀល​ទៅ​ក្នុង​អណ្តូង​ជម្រៅ ៥ ម៉ែត្រ។ នៅ​ពេល​កូន​របស់​គាត់​បី​នាក់ បាន​ឮ​ថា ជ្រុះ​លុយ ពួក​គេ​ចង់​ទៅ​យក​លុយ​វិញ។ ពួក​គេ​ក៏​បាន​ចុះ​អណ្តូង​ជា​បន្ត​បន្ទាប់​ប៉ុន្តែ​មិន​បាន​ឡើង​មក​វិញ​ទេ។ អ្នក​ជិត​ខាង ៤ នាក់​ទៀត​បាន​ចុះ​ទៅ​ជួយ ហើយ​ក៏​បាន​ស្លាប់​ជា​បន្ត​បន្ទាប់​ដូច​គ្នា។ អាជ្ញាធរ​ជឿ​ថា កម្រិត​អ៊ុកស៊ីហ្សែន​តិច បាន​បង្ក​ឲ្យ​ជន​រងគ្រោះ​ថប់​ដង្ហើម​ស្លាប់។ មនុស្ស ៧ នាក់​ដែល​ស្លាប់​នោះ​មាន​ក្មេង ៤ នាក់។ អ្នក​ភូមិ​ក្នុង​ឃុំ​នេះ​ជាច្រើន ដែល​បាន​សម្ភាស​កាល​ពី​ថ្ងៃ​ម្សិលមិញ បាន​ឯកភាព​ចំពោះ​ការ​ប៉ុន​ប៉ង​លុប​អណ្តូង​ទឹក​ក្នុង​ភូមិ​ទាំង​អស់​ចោល។

អ្នក​ស្រី ពុយ កាំង វ័យ ៤៨​ឆ្នាំ ជា​ម្ចាស់​អណ្តូង​នៅ ភូមិ​សាលា​ក្រវាន់ ឃុំ​រំចេក និង​ជា​សាច់​ញាតិ​របស់​ក្មេង​បី​នាក់​ដែល​ស្លាប់ បាន​ថ្លែង​កាល​ពី​ថ្ងៃ​ម្សិលមិញ​ថា អ្នក​ស្រី​នឹង​កម្ទេច​អណ្តូង​នេះ​ចោល។ «ក្មេង​បី​នាក់​ដែល​បាន​ស្លាប់​ក្នុង​អណ្តូង​នោះ ជា​ក្មួយ​ប្រុស ក្មួយ​ស្រី​របស់​ខ្ញុំ។ ខ្ញុំ​មាន​អារម្មណ៍​រន្ធត់​ចំពោះ​ពួក​គេ។ ខ្ញុំ​ខ្លាច​ថា វា​នឹង​កើត​មាន​ជា​ថ្មី​ចំពោះ​កូន​ខ្ញុំ ឬ​មនុស្ស​ផ្សេង​ទៀត​នៅ​ថ្ងៃ​ណា​មួយ ដូច្នេះ​ខ្ញុំ នឹង​កម្ទេច​វា​ចោល​បន្ទាប់​ពី​ខ្ញុំ​ធ្វើ​បុណ្យ​ហើយ»។

អ្នក​ភូមិ​ម្នាក់​ទៀត​ឈ្មោះ យុក ហើល វ័យ ៦៤​ឆ្នាំ បាន​ថ្លែង​ថា លោក​មាន​គម្រោង​កម្ទេច​អណ្តូង​ចំណាស់ ១០ ឆ្នាំ​របស់​លោក​ចោល​ដោយ​មូល​ហេតុ​ដូច​គ្នា។ «ចៅ​របស់​ខ្ញុំ និង​កូន​ខ្ញុំ ក្នុង​ភូមិ​នេះ​ជា​រឿយៗ លេង​នៅ​ជុំវិញ​អណ្តូង​នេះ ប៉ុន្តែ​ខ្ញុំ មិន​ដែល​គិត​ថា វា​មាន​គ្រោះថ្នាក់​ដល់​ពួក​គេ​ទេ»។

លោក មុយ ណន អធិការ​ស្តីទី ស្រុក​បន្ទាយ​ស្រី បាន​ថ្លែង​ពី​ម្សិលមិញ​ថា៖ «អាជ្ញាធរ​មិន​ហាម​ឃាត់​ពួក​គេ មិន​ឲ្យ​កម្ទេច​អណ្តូង​ចោល​នោះ​ទេ ប៉ុន្តែ​ជា​រឿយៗ យើង​តែង​តែ​ប្រាប់​ពួក​គេ​ឲ្យ​ប្រុង​ប្រយ័ត្ន ព្រោះ​នេះ​ជា​ពេល​គ្រោះថ្នាក់​លើក​ទី​ពីរ​ហើយ សម្រាប់​អ្នក​ភូមិ​នៅ​ស្រុក​នេះ។ មាន​មនុស្ស​ម្នាក់​បាន​ស្លាប់​ក្នុង​អណ្តូង​មួយ​ដែរ កាល​ពី​ពីរ-បី​ឆ្នាំ​កន្លង​មក»៕ NR

អត្ថបទគួរចាប់អារម្មណ៍