The Phnom Penh Post Search

Search form

Logo of Phnom Penh Post newspaper Phnom Penh Post - បី​ថ្ងៃ​គ្រោះថ្នាក់​ស្លាប់ ២០,របួស ៦៣ នាក់




បី​ថ្ងៃ​គ្រោះថ្នាក់​ស្លាប់ ២០,របួស ៦៣ នាក់

បី​ថ្ងៃ​គ្រោះថ្នាក់​ស្លាប់ ២០,របួស ៦៣ នាក់

ភ្នំពេញៈ យ៉ាង​ហោច​មាន​មនុស្ស ២០នាក់ បាន​ស្លាប់​និង ៦៣ នាក់​ទៀត​រង​របួស​ធ្ងន់ និង​ស្រាល ដោយ​សារ​តែ​ករណី​គ្រោះថ្នាក់​ចរាចរណ៍​ក្នុង​រយៈ​ពេល ៣ថ្ងៃ នៃ​ពិធី​បុណ្យ​អុំទូក​ឆ្នាំ​នេះ បើ​ទោះ​ជា​នៅ​ភ្នំពេញ​មិន​មាន​ការ​ប្រារព្ធ​ពិធី​ពេញ​លេញ​និង​អធិក​អធម ក៏​ដោយ ប៉ុន្តែ​ជន​រងគ្រោះ​ភាគ​ច្រើន​ជា​អ្នក​ធ្វើ​ដំណើរ​កម្សាន្ត​និង​ទៅ​អ្នក​លេង​ស្រុក​កំណើត។

ប្រធាន នាយកដ្ឋាន​សណ្តាប់ធ្នាប់ នៃ​ក្រសួង មហាផ្ទៃ​លោក ហ៊ឹម យ៉ាន បាន​ថ្លែង​ប្រាប់​ថា ក្នុង​អំឡុង​ពេល ៣ថ្ងៃ ចាប់​ពី​ថ្ងៃ ទី១៦ ដល់​ថ្ងៃ ទី១៨ វិច្ឆិកា ឆ្នាំ ២០១៣ នេះ​គ្រោះថ្នាក់​ចរាចរណ៍​បាន​កើត​ឡើង​ចំនួន ៩១ ករណី បណ្តាល​ឲ្យ​មនុស្ស ២០នាក់ ស្លាប់ និង ៦៣នាក់ រង​របួស ខណៈ​នៅ​ក្នុង​ឆ្នាំ ២០១២ មាន​កើត​ឡើង​តែ ៨៦ ករណី និង​មាន​មនុស្ស​ស្លាប់ ១៨ នាក់​និង​រង​របួស តែ ៥៥ នាក់។

លោក​បន្ត​ថា៖ «បើ​ធៀប​ទៅ​នឹង​ឆ្នាំ​មុន​ករណី​គ្រោះថ្នាក់​កើន​ឡើង។ ពិធី​បុណ្យ​អុំទូក​មិន​បាន​ប្រារព្ឋ​នៅ​ភ្នំពេញ តែ​ដោយ​មាន​ឱកាស​ឈប់​សម្រាក ប្រជា​ពលរដ្ឋ​ខ្មែរ​ភាគ​ច្រើន​ទៅ​កម្សាន្ត​តាម​រមណីយដ្ឋាន​ផ្សេងៗ និង​បាន​ជួប​គ្រោះថ្នាក់​ចរាចរណ៍»។

តាម​ការ​បញ្ជាក់​ឲ្យ​ដឹង ខេត្ត​ដែល​ជួប​ករណី​ស្លាប់​ច្រើន​ជាង​គេ មាន​ខេត្ត បាត់ដំបង និង​កំពង់ឆ្នាំង ហើយ​មូល​ហេតុ​បង្ក​ឡើង​គឺ មក​ពី​បើកបរ​ក្នុង​ភាព​ស្រវឹង ១៧ ភាគរយ បើកបរ​ហួស​ល្បឿន​កំណត់ ៣៩ ភាគរយ បើកបរ​មិន​គោរព​អាទិភាព ១២ ភាគរយ និង​បើក​បរ​ដោយ​ខ្វះ​ការ​ប្រុង​ប្រយ័ត្ន​ចំនួន ១០ ភាគរយ។

បើ​ផ្អែក​តាម​របាយ​ការណ៍​នាយកដ្ឋាន​សណ្តាប់ធ្នាប់​បង្ហាញ​ដែរ​ថា ក្នុង​រយៈ​ពេល ៨ខែ ក្នុង​ឆ្នាំ​នេះ​គ្រោះថ្នាក់​ចរាចរណ៍​បាន​សម្លាប់​មនុស្ស ១.៣៤៥ និង​បង្ក​របួស​ចំនួន ៥.៣៤៩ នាក់។

ជាមួយ​គ្នា​នេះ​ដែរ កាល​ពី​ថ្ងៃ​ជិត​ត្រង់​ថ្ងៃ​អង្គារ​ម្សិលមិញ​នេះ មនុស្ស ៤នាក់ បាន​រង​របួស​ក្នុង​គ្រោះថ្នាក់​ចរាចរណ៍​នៅ​តាម​ដង​ផ្លូវ នៅ​ក្នុង​ស្រុក កំពង់សិលា ខេត្ត ព្រះ​សីហនុ។ ក្នុង​នោះ​បុរស​ជនជាតិ ចិន ម្នាក់​ជា​អ្នក​បង្ក​បាន​រង​របួស​ធ្ងន់។

លោក កែវ ភិរុណ នាយ​នគរបាល​ចរាចរណ៍​ស្រុក កំពង់សិលា បាន​ឲ្យ​ដឹង​កាល​ពី​ម្សិលមិញ​ថា អ្នក​បើក​បរ​ជនជាតិ​ចិន​បាន​បើក​បរ​ក្នុង​ទិស​ដៅ​ពី​ភ្នំពេញ​ឆ្ពោះ​ទៅ​ក្រុង ព្រះ​សីហនុ ហើយ​បាន​បើក​ចូល​ក្នុង​ចំណែក​ផ្លូវ​អាទិភាព​របស់​រថយន្ត​ក្រុង​ក្រុមហ៊ុន រិទ្ធិ មុនី និង​រថយន្ត ឡង់គ្រីស័រ កំពុង​ប្រកាន់​ស្តាំ​របស់​ខ្លួន។

លោក​បាន​ថ្លែង​ថា៖ «អ្នក​បើកបរ​ជា​ជនជាតិ​ចិន​នោះ បាន​បើក​រំលោភ​មក​លើ​ចំណែក​ផ្លូវ​ម្ខាង​ទៀត ហើយ​បាន​បុក​រះ​រថយន្ត​ក្រុង​និង​រថយន្ត​ទំនើប​មួយ​ទៀត ដែល​បង្ក​ឲ្យ​មាន​គ្រោះថ្នាក់​កើត​ឡើង​តែ​ម្តង»។

លោក​បន្ត​ឲ្យ​ដឹង​ថា សមត្ថកិច្ច​លោក​បាន​រៀបចំ​បញ្ជូន​ជន​រងគ្រោះ​ទៅ​មន្ទីរពេទ្យ​នៅ​ភ្នំពេញ ហើយ​និង​កំពុង​តែ​ធ្វើ​ការ​ស្រាវជ្រាវ​លើ​ករណី​នេះ​ផង​ដែរ៕

អត្ថបទគួរចាប់អារម្មណ៍