The Phnom Penh Post Search

Search form




Logo of Phnom Penh Post newspaper Phnom Penh Post - បុរស​ប្រមឹក​ម្នាក់​កាប់​កូន​ខ្លួន​ឯង​ដាច់​ក​ស្លាប់​ពីរ​នាក់​និង​អ្នក​ជិត​ខាង​ម្នាក់​ស្លាប់ ម្នាក់​របួស

បុរស​ប្រមឹក​ម្នាក់​កាប់​កូន​ខ្លួន​ឯង​ដាច់​ក​ស្លាប់​ពីរ​នាក់​និង​អ្នក​ជិត​ខាង​ម្នាក់​ស្លាប់ ម្នាក់​របួស

បុរស​ប្រមឹក​ម្នាក់​កាប់​កូន​ខ្លួន​ឯង​ដាច់​ក​ស្លាប់​ពីរ​នាក់​និង​អ្នក​ជិត​ខាង​ម្នាក់​ស្លាប់ ម្នាក់​របួស

កំពង់ចាមៈ បុរស​វ័យ​៣៣​ឆ្នាំ​ម្នាក់​ត្រូវ​បាន​កម្លាំង​សមត្ថកិច្ច​នគរបាល​ស្រុក​ចម្ការ​លើ ចាប់​ឃាត់​ខ្លួន​ភ្លាមៗ​បន្ទាប់​ពី​គាត់​បាន​សម្លាប់​មនុស្ស​បី​នាក់ ដែល​រួម​ទាំង​កូន​ស្រី​វ័យ​ក្មេង​ខ្ចី​របស់​គាត់​ពីរ​នាក់​កាលពី​ល្ងាច​ម្សិលមិញ។

លោក លឹម សុធី អធិការង​ស្រុក​ចម្ការ​លើ ខេត្ត កំពង់ចាម បាន​ប្រាប់​ភ្នំពេញ ប៉ុស្តិ៍​ថា ជនសង្ស័យ​ឈ្មោះ ជ្រិន ជ្រាន អាយុ​៣៣​ឆ្នាំ រស់នៅ​ភូមិ​ជយោ ឃុំ​ជយោ ស្រុក​ចម្ការ​លើ ត្រូវ​បាន​កម្លាំង​សមត្ថកិច្ច​ធ្វើ​ការ​ព័ទ្ធ​ចាប់​ខ្លួន​បាន​ភ្លាមៗ បន្ទាប់​ពី​បាន​កាប់​សម្លាប់​កូន​ស្រី​បង្កើត​របស់​គាត់​ពីរ​នាក់ ដែល​ម្នាក់​មាន​អាយុ​៦ឆ្នាំ និង​ម្នាក់​ទៀត​ទើប​តែ​មាន​អាយុ​ជាង​២ឆ្នាំ និង​បាន​កាប់​អ្នក​ជិត​ខាង​ពីរ​នាក់​ទៀត​បណ្ដាល​ឲ្យ​ម្នាក់​ស្លាប់​នៅ​នឹង​កន្លែង និង​ម្នាក់​រងរបួស​ធ្ងន់។

លោក​បាន​បន្ត​ថា តាម​សម្ដី​របស់​ស្ត្រី​ជា​ប្រពន្ធ​បាន​បញ្ជាក់​ថា ព្រោះ​តែ​ប្ដី​របស់​គាត់​ស្រវឹង​ស្រា ក៏​បណ្ដាល​ឲ្យ​មាន​ទាស់​ពាក្យ​សម្ដី​គ្នា​ជាមួយ​នឹង​គាត់​នៅ​កំពុង​ទទួលទាន​បាយ​ពេល​ល្ងាច ហើយ​ក៏​ឈាន​ដល់​ប្រើ​អំពើ​ហិង្សា ខណៈ​នោះ​ប្ដី​របស់​គាត់​ក៏​ស្ទុះ​ចុះ​ដី​ហើយ​យក​កាំបិត​មក​កាប់​ដាច់​កកូន​ស្រី​ពីរ​នាក់ ហើយ​អ្នក​ជិត​ខាង​ពីរ​នាក់ រួម​មាន​ឈ្មោះ​សាំង អូន ភេទ​ប្រុស អាយុ​២៨​ឆ្នាំ និង​ម្នាក់​ទៀត​ឈ្មោះ​យិន ផាង ភេទ​ប្រុស អាយុ​៣២​ឆ្នាំ ដែល​បាន​ស្ទុះ​ទៅ​ជួយ ក៏​ត្រូវ​បាន​ប្ដី​របស់​គាត់​កាប់​បណ្ដាល​ឲ្យ​ស្លាប់​ម្នាក់​នៅ​ហ្នឹង​កន្លែង និង​ម្នាក់​ទៀត​រងរបួស​ធ្ងន់។

លោក​បាន​បញ្ជាក់​ថា៖ «ឥឡូវ​យើង​កំពុង​កសាង​សំណុំ​រឿង​ចោទ​ប្រកាន់​ជន​សង្ស័យ​ពីបទ​មនុស្ស​ឃាត​ដោយ​ចេតនា និង​មាន​ស្ថាន​ទម្ងន់​ទោស ទោះ​ជា​មាន​អ្នក​ភូមិ​ខ្លះ​អះអាង​ថា​ជន​សង្ស័យ​មាន​ជំងឺ​សរសៃ​ប្រសាទ​ក្ដី ព្រោះ​នេះ​ជា​បទល្មើស​ជាក់ស្ដែង»។

លោក​បាន​បន្ត​ថា ក្រុម​សមត្ថកិច្ច​ក៏​បាន​ជួយ​ដឹក​ជន​រងគ្រោះ​ម្នាក់ ឈ្មោះ យិន ផាង ដែល​រង​បួស​ធ្ងន់ ដោយ​សារ​ជនសង្ស័យ​កាប់ ខណៈ​ដែល​គាត់​ចូល​ទៅ​ជួយ​ឃាត់​នោះ​ទៅ​មន្ទីរ​ពេទ្យ ដើម្បី​សង្គ្រោះ​រួច​ផុតពី​ស្លាប់។

លោក​លាវ សុភា មេ​បញ្ជាការ​កងរាជ​អាវុធហត្ថ​ស្រុក​ចម្ការ​លើ បាន​ប្រាប់​ថា ក្រុម​គ្រួសារ​ជន​រងគ្រោះ ដែល​ត្រូវ​ជន​សង្ស័យ​កាប់​ឲ្យ​ស្លាប់ និង​របួស​នៅ​មិន​ទាន់​បាន​ដាក់​ពាក្យ​ប្ដឹង​នៅ​ឡើយ​ទេ ដោយ​សារ​កំពុង​រវល់​រៀបចំ​ធ្វើ​បុណ្យសព។ ទោះ​ជា​បែប​ណា​ក្ដី​សមត្ថកិច្ច​បាន​ចាប់​ខ្លួន​និង​រៀបចំ​កសាង​សំណុំ​រឿង​ដើម្បី​បញ្ជូន​ទៅ​តុលាការ​ខេត្ត។

លោក​បន្ត​ថា មាន​អ្នក​ភូមិ​មួយ​ចំនួន​អះអាង​ថា ជន​សង្ស័យ​ជា​មនុស្ស​ធ្លាប់​មាន​ជំងឺ​សរសៃ​ប្រសាទ​កាល​ពី​មុន​មក។ តែ​លោក​ថា ៖«យើង​មិន​អាច​ជឿ​បាន​ទេ ថា​ជន​សង្ស័យ​មាន​ជំងឺ​សរសៃ​ប្រសាទ ព្រោះ​គ្មាន​លិខិត​បញ្ជាក់​ពី​គ្រូ​ពេទ្យ​ឬ​ពី​មន្ទីរពេទ្យ​ជំនាញ​ទេ... បើ​ទោះ​ជា​មាន​ជំងឺ​ក្ដី​ក៏​ជនសង្ស័យ​មិន​ត្រូវ​បាន​ដោះលែង​មក​រស់នៅ​ជាមួយ​ក្រុម​គ្រួសារ​វិញ​ដែរ»៕

អត្ថបទគួរចាប់អារម្មណ៍