បាត់ដំបងៈ មនុស្ស ៨ នាក់ត្រូវបានសមត្ថកិច្ចស្រុកគាស់ក្រឡជួយសង្គ្រោះ និងបញ្ជូនទៅព្យាបាលបន្ទាន់នៅមន្ទីរពេទ្យបង្អែកឃុំ និងស្រុកបន្ទាប់ពីមានអាការក្អួតចង្អោរធ្ងន់ធ្ងរសង្ស័យថាពុលមីកញ្ចប់របស់ថៃ។
តាមរបាយការណ៍ប៉ូលិសហេតុការណ៍នេះបានកើតឡើងនៅយប់រំលងអធ្រាត្រឈានចូលថ្ងៃទី ៦ ខែធ្នូ ឆ្នាំ ២០១៥ នៅចំណុចភូមិគោករការ ឃុំដូនបា ស្រុកគាស់ក្រឡហើយអ្នកទាំង ៨ នាក់នោះមានអាយុចន្លោះពី ១៥ ទៅ ៤២ ឆ្នាំ។
អធិការស្រុកគាស់ក្រឡលោក ឆាង វណ្ណឆៃ បានឲ្យដឹងថានៅយប់ថ្ងៃកើតហេតុអ្នកទាំងនោះបានជួបជុំគ្នាសម្រាកនៅក្រោលគោ និងបានឆុងមីកញ្ចប់ថៃហូបជុំគ្នានៅម៉ោង ១១ យប់។ ជាងកន្លះម៉ោងក្រោយមកពួកគេក៏ចាប់ផ្តើមក្អួតចង្អោរវិលមុខធ្ងន់ធ្ងរហើយត្រូវបានអ្នកជិតខាងរាយការណ៍មកប៉ុស្តិ៍ដើម្បីសុំជំនួយទើបសមត្ថកិច្ចបញ្ជូនពួកគេទៅមន្ទីរពេទ្យឃុំ និងស្រុកសង្គ្រោះភ្លាមៗនៅយប់ឈានចូលថ្ងៃបន្ទាប់។
លោកនិយាយថា៖ «ភ្លាមៗគឺធ្ងន់ធ្ងរតែក្រោយមកបានទទួលការព្យាបាលពួកគេក៏ធូរស្រាលខ្លះប៉ុន្តែនៅសម្រាកមន្ទីរពេទ្យខ្លះនៅឡើយគឺបន្តព្យួរសេរ៉ូមនៅផ្ទះ»។ សមត្ថកិច្ចរកឃើញថាមូលហេតុនៃការពុលនេះគឺបណ្តាលមកពីការបរិភោគមីថៃតែក៏មកពីទឹកកខ្វក់ដែលដាំឆុងមីផងដែរ៕
