The Phnom Penh Post Search

Search form




Logo of Phnom Penh Post newspaper Phnom Penh Post - ប៉ូលិស​ម្នាក់​ស្លាប់​ក្នុង​ពេល​ការពារ​គណៈប្រតិភូ​មកពី​ឡាវ

ប៉ូលិស​ម្នាក់​ស្លាប់​ក្នុង​ពេល​ការពារ​គណៈប្រតិភូ​មកពី​ឡាវ

ប៉ូលិស​ម្នាក់​ស្លាប់​ក្នុង​ពេល​ការពារ​គណៈប្រតិភូ​មកពី​ឡាវ

ភ្នំពេញៈ ប៉ូលិស​ចរាចរណ៍​ម្នាក់​បាន​ទទួល​មរណភាព​ដោយសារ​គាំង​បេះដូង​កាលពី​ម្សិលមិញ​ខណៈ​កំពុង​ឈរ​ការពារ​សុវត្ថិភាព​គណៈប្រតិភូ​ដឹកនាំ​ដោយ​លោក​នាយក​រដ្ឋមន្ត្រី​ ហ៊ុន សែន មកពី​ឡាវ។

តាម​គេហទំព័រ​សាលា​រាជធានី​ភ្នំពេញ​ឱ្យ​ដឹង​ថា «លោក យ៉ា បូរ៉ា មន្ត្រី​នគរបាល​សណ្តាប់ធ្នាប់ និង​ចរាចរណ៍​ខណ្ឌ​ ៧ ​មករា​បាន​ខ្យល់គ​រដួល​ស្លាប់​នៅ​ម៉ោង​ ៤ រសៀល​ម្សិលមិញ​ខណៈ​កំពុង​ឈរ​ការពារ​សុវត្ថិភាព​ជូន​ថ្នាក់ដឹកនាំ​រាជរដ្ឋាភិបាល​អញ្ជើញ​ត្រឡប់​ពី​បំពេញ​ទស្សនកិច្ច​នៅ​ប្រទេស​ឡាវ»។

គេហទំព័រ​បន្ត​ថា​តាម​សាក្សី​នៅ​ម៉ោង​កើត​ហេតុ​ខណៈ​លោក យ៉ា បូរ៉ា កំពុង​ការពារ​សុវត្ថិភាព និង​សម្រួល​ចរាចរណ៍​នៅ​ចំណុច​ក្តាន់​ពីរ​តាម​បណ្ដោយ​មហាវិថី​សហព័ន្ធរុស្ស៊ី​ក្នុង​ខណ្ឌ​ ៧ ​មករា​ស្រាប់តែ​ដួល​ទាំង​ជំហរ​មិន​ដឹង​មូលហេតុ។

ក្រោយ​ឃើញ​ដួល​ភ្លាម​ពលរដ្ឋ​នៅ​ក្បែរ​នោះ​បាន​ជួយ​ដឹក​បញ្ជូន​ទៅ​មន្ទីរពេទ្យ​តាម​រ៉ឺម៉ក​ម៉ូតូ​កង់​បី​តែ​លោក​បាន​ស្លាប់​នៅពេល​ទៅ​ដល់​មន្ទីរពេទ្យ។

ប្រធាន​ប៉ូលិស​ចរាចរណ៍​នៅ​ខណ្ឌ ៧ មករា​លោក សុខ ឡាយ ប្រាប់​ភ្នំពេញ​ប៉ុស្តិ៍​ថា​លោក យ៉ា បូរ៉ា អាយុ ៥៥ ឆ្នាំ​បាន​ស្លាប់​ពេល​បញ្ជូន​ទៅ​ដល់​ពេទ្យ​កាល់ម៉ែត​ភ្លាម។

លោក​បន្ត​ថា​គាត់​មក​ធ្វើការ​​មិន​ដែល​ឈប់​ទេ​ខណៈ​ភរិយា​គាត់​ថា​សុខភាព​ប្តី​ល្អ​ធម្មតា​។ យ៉ាង​ណា​ក៏ដោយ​លោក​ថា​ខាង​ប៉ូលិស​នឹង​គិតគូរ​ផ្តល់​ថវិកា​ធ្វើ​បុណ្យ​ដើម្បី​ចែករំលែក​ការ​លំបាក​ក្រុម​គ្រួសារ៕

អត្ថបទគួរចាប់អារម្មណ៍