The Phnom Penh Post Search

Search form




Logo of Phnom Penh Post newspaper Phnom Penh Post - ប៉ូលិស​ចាប់​ខ្លួន​ស្រ្តី​ម្នាក់​និង​គូកន​ដែល​ជំរិត​កូន​ឯង




ប៉ូលិស​ចាប់​ខ្លួន​ស្រ្តី​ម្នាក់​និង​គូកន​ដែល​ជំរិត​កូន​ឯង

ប៉ូលិស​ចាប់​ខ្លួន​ស្រ្តី​ម្នាក់​និង​គូកន​ដែល​ជំរិត​កូន​ឯង

130130_10
អ្នកស្រី វីន សាវី អាយុ ៤១ ឆ្នាំ ជាប់ចោទពីបទជំរិតកូនប្រុសខ្លួនឯង ម៉ៃ វីរៈ

ភ្នំពេញៈ ស្ត្រី​ម្នាក់​និង​អ្នក​រួម​គំនិត​រៀប​គម្រោង​ចាប់​ជំរិត​កូន​ប្រុស ខ្លួន​ឯង​ម្នាក់ ទារ​ប្រាក់​ចំនួន ៤​ពាន់​ដុល្លារ​ពី​ប្តី ត្រូវ​សមត្ថកិច្ច​នគរបាល​ចាប់​ឃាត់​ខ្លួន កាល​ពី​ថ្ងៃ​ទី២៨​ខែ​មករា បន្ទាប់​ពី​សមត្ថកិច្ច​ឆែក​រក​ឃើញ​អ្នក​ពាក់​ព័ន្ធ​តាម​​រយៈ​លេខ​ទូរស័ព្ទ។

លោក ហ៊ាង ថារ៉េត អធិការរង​នគរបាល​ខណ្ឌ​ចំការមន​បាន​ឲ្យ​ដឹង​ថា ជន​សង្ស័យ​ទាំង​២​នាក់ ដែល​ពាក់​ព័ន្ធ​នឹង​រឿង​យក​កូន​ទៅ​លាក់​ទុក រួច​ឲ្យគូ​កន​ទូរស័ព្ទ​ជំរិត​ទារ​ប្រាក់​ពីប្តី ឥឡូវ​កំពុង​តែ​ដាក់​ឃុំ​នៅ​អធិការដ្ឋាន​នគរបាល​ខណ្ឌ​ចំការមន។

លោកប្រាប់ថា៖«យើង​កំពុង​តែ​សាកសួរ ដើម្បី​កសាង​សំណុំ​រឿង​បញ្ជូន​ពួកគេ​ទៅ​តុលាការ»។

មន្រ្តីនគរបាលរូប​នេះ ឲ្យដឹង​ថា​ជន​សង្ស័យ​ទាំង​២នាក់​ត្រូវ​សមត្ថកិច្ច​នគរបាល​ឃាត់​ខ្លួន ជាបន្ត​បន្ទាប់​ខណៈ​សំណុំ​រឿង​បំភ័ន្ត​ចាប់​ជំរិត​កូន​ខ្លួន​ឯង​បាន​បែក​ការ។

តាមចម្លើយ​ជន​សង្ស័យ ថា​ពួក​គេ​បាន​រៀប​គម្រោង​ចាប់​ជំរិត​នេះ​នៅ​ថ្ងៃ​ទី២៣ ខែ​មករា ដោយ​ស្រ្តី​ជន​សង្ស័យ​ជា​ម្តាយ​បង្កើត​របស់​ក្មេង​រងគ្រោះ​ជា​អ្នក​ផ្តើម​ឡើង។

ស្រ្តីជាប់ចោទ​ឈ្មោះ វីន សាវី​អាយុ​៤១​ឆ្នាំ​ ស្នាក់​នៅ​បន្ទប់​ជួល​លេខ​៣​ សង្កាត់​ផ្សារ​​ដើម​ថ្កូវ​ខណ្ឌ​ចំការមន ជា​អ្នក​ដើររាប់​លុយ​និង​មាន​កូន​ប្រុស​ម្នាក់​ឈ្មោះ សុខុម តុលា អាយុ​៧ឆ្នាំ តែ​បាន​លែង​លះ​ប្តី ឯ​គូកន​សម​គំនិត ឈ្មោះ ធឿន ​ភក្តី​ អាយុ២១​ឆ្នាំ​​ ស្នាក់​នៅ​​ផ្ទះលេខ​១៤៩ ​ផ្លូ​វបេតុង ​ភូមិ​សន្សំកុសល ​សង្កាត់​បឹង​ទំពុន ​ខណ្ឌ​មាន​ជ័យ​ មុ​ខរបរជា​ជាង​កាត់​ដេរ​ខោអាវ។

គម្រោង​ការ​ជំរិត​កូន​ខ្លួន​ឯង​នេះ មន្រ្តី​នគរ​បាល​​ប្រាប់​ថា ស្រ្តី​ជា​ម្តាយ​បានឲ្យ​ឈ្មោះ ​ធឿន ​ភក្តី​ ប្រើ​ស៊ីម​កាត​ថ្មី​មួយ​ទូរស័ព្ទ​ទៅ​ជំរិត​ទារ​ប្រាក់ពី​ប្តី ខ្លួន​ចំនួន​៤ពាន់​ដុល្លារ និង​បាន​គំរាម​សម្លាប់​ក្មេង​នេះ​ផង បើ​សិន​មិន​បាន​លុយ។ រីឯខ្លួន​ឯង​ជា​ម្តាយ​បាន​ទៅ​យក​កូន​ពី​សាលា​បឋម​សិក្សា​ហ៊ុន​នាង បឹង​ត្របែក ទៅ​លាក់​នៅ​វត្ត​ប្រជុំវង្ស ដើម្បី​បំភ័ន្ត​ភ្នែក​ប្តី។

មន្រ្តី​នគរបាលបាន​ឲ្យ​ដឹង​ដែរ​ថា ក្រោយ​មក​ជន​សង្ស័យ​ដែល​ជា​ម្តាយ​បាន​ទៅ​បបួល​អតីត​ប្តី របស់​ខ្លួន​ទៅ​រាយ​ការណ៍​ប្រាប់​សមត្ថកិច្ច​ប៉ូលិស ហើយ​ខាង​ប៉ូលិស​ក៏​បាន​សាក​សួរ និង​ចុះ​ធ្វើការ ស៊ើប​អង្កេត និង​ប្រមូល​បាន​សាក្សី​មួយ​ចំនួន​នៅ​ជុំវិញ​កន្លែង​កើត​ហេតុ​មក​សាក​សួរ និង​ធ្វើ​ការ​ស្រាវជ្រាវ​តាម​រយៈលេខ​ទូរស័ព្ទ​ដែល​ម្តាយ​និង ឪពុក​ក្មេង​បាន​រាយការណ៍​ប្រាប់ គ្រប់​អ្នក​ដែល​ធ្លាប់​មាន​ទំនាក់​ទំនង​ពី​មុនៗ​នោះ ទើប​ឈាន​ដល់​ការ​ឃាត់​ខ្លួន​បាន​ជន​សង្ស័យ ធឿន ភក្តី​ និង​បែក​ធ្លាយ​គម្រោង​ជំរិត​កូន​ឯង​នេះ​តែ​ម្តង៕

អត្ថបទគួរចាប់អារម្មណ៍