The Phnom Penh Post Search

Search form




Logo of Phnom Penh Post newspaper Phnom Penh Post - ប៉ូលិស​ស្ទាក់​ចាប់​ឡាន​យប់​បាញ់​គេ​របួស​ត្រូវ​ជាប់​គុក ១០ ឆ្នាំ​ដដែល




ប៉ូលិស​ស្ទាក់​ចាប់​ឡាន​យប់​បាញ់​គេ​របួស​ត្រូវ​ជាប់​គុក ១០ ឆ្នាំ​ដដែល

ប៉ូលិស​ស្ទាក់​ចាប់​ឡាន​យប់​បាញ់​គេ​របួស​ត្រូវ​ជាប់​គុក ១០ ឆ្នាំ​ដដែល

20140509_10
ជនជាប់ចោទ យូ សុកគារ ត្រូវប្រពន្ធជូនដំណើរតាមពីក្រោយសមត្ថកិច្ចឡើងតុលាការ គឹម សារុំ

ភ្នំពេញៈ សាលា​ឧទ្ធរណ៍​ក្នុង​សវនាការ​កាល​ពី​ម្សិលមិញ​បើ​ទោះ​ជា​ជន​ជាប់​ឆ្លើយ​ដោះសារ​ថា គ្មាន​បំណង​នឹង​រាល​កៃ​កាំភ្លើង​ក៏​ដោយ ក៏​ចៅក្រម​ជំនុំ​ជម្រះ​សម្រេច​តម្កល់​ទោស​ជន​ជាប់​ចោទ​ឲ្យ​ជាប់​ពន្ធនាគារ ១០​ឆ្នាំ និង​បង្គាប់​ឲ្យ​សង​ជំងឺ​ចិត្ត​ទៅ​ដើម​បណ្តឹង​ជា​ជន​រងគ្រោះ​ចំនួន ២០ លាន​រៀន​ដដែល ក្រោម​ការ​ចោទ​ពី​បទ​ប៉ុនប៉ង​មនុស្ស​ឃាត និង​ប្រើ​ប្រាស់​អាវុធ​ខុស​ច្បាប់​និង​កំហែង​តាម​ការ​សម្រេច​របស់​តុលាការ​ថ្នាក់​ក្រោម។

លោក​ចៅក្រម អ៊ុំ សារិទ្ធ ប្រធាន​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍ បាន​ប្រកាស​ក្នុង​សវនាការ​កាល​ពី​ម្សិលមិញ​ថា ឈ្មោះ យូ សុកគារ ហៅ ម៉ៅ អាយុ ២៩​ឆ្នាំ ដែល​សាលា​ដំបូង​រាជធានី ចោទ​ប្រកាន់​និង​ផ្តន្ទាទោស​ឃុំ​ខ្លួន ១០​ឆ្នាំ និង​ដាក់​ទោស​គូកន​ឈ្មោះ គង់ ដារ៉ា អាយុ ៤៤​ឆ្នាំ ឲ្យ​ជាប់​ទោស ២​ឆ្នាំ តែ​ដាក់​ឃុំ​ខ្លួន​តែ ១ ឆ្នាំ​នោះ​ទាំង​ដើម​ចោទ និង​ចុង​ចោទ (សុកគារ) បាន​ប្តឹង​ទាស់​មក​សាលា​ឧទ្ធរណ៍​ដូច​គ្នា។

ក្នុង​សវនាការ​លោក​ចៅក្រម​ថ្លែង​ថា៖ «ជន​រងគ្រោះ​ប្តឹង​ទាស់​មក​ឧទ្ធរណ៍​ទារ​សំណង ១ ម៉ឺន ២ ពាន់​ដុល្លារ​ខណៈ​សាលា​ដំបូង​សម្រេច​ឲ្យ​សង ២០ លាន​រៀល។ ចំណែក​ជន​ជាប់​ចោទ​ក៏​ប្តឹង​ទាស់​នឹង​ការ​សម្រេច​ផ្តន្ទាទោស​ឃុំ​ខ្លួន ១០​ឆ្នាំ របស់​តុលាការ​ថ្នាក់​ក្រោម​ដែរ»។

តាម​អង្គហេតុ ឈ្មោះ យូ សុកគារ ហៅ ម៉ៅ និង​ឈ្មោះ គង់ ដារ៉ា បាន​ស្ទាក់​ទារ​លុយ​ពី​ម្ចាស់​រថយន្ត​ម៉ាក​សាំយ៉ុង​ពណ៌​ស​ពាក់​ស្លាក​លេខ ភ្នំពេញ 2C-3315 ឈ្មោះ ឌី វិចិត្រ នៅ​ម៉ោង ៣ ទៀប​ភ្លឺ​ថ្ងៃ ទី​២៧ ខែ​មករា ឆ្នាំ​២០១៣ ជិត​ដី​ឡូត៍​មួយ​ក្នុង សង្កាត់​ស្វាយប៉ាក ខណ្ឌ​ឫស្សីកែវ ដោយ​ពួក​គេ​ទាំង ២​នាក់ បើក​ម៉ូតូ​ដេញ​តាម​ទារ​លុយ ២ ពាន់​រៀល​ប្រមាណ​ជា ៥ គីឡូម៉ែត្រ​ដី​តែ​ដោយ​សារ​ឡាន​មិន​ព្រម​ឈប់ យូ សុកគារ ក៏​យក​ដុំ​ថ្ម​គប់​បណ្តាល​ឲ្យ​បែក​កញ្ចក់​ឡាន​ពី​ក្រោយ​ហើយ​ក្នុង​ពេល​ម្ចាស់​ឡាន (ជន​រងគ្រោះ) ចុះ​មក​មើល​ឡាន​ក៏​ត្រូវ សុកគារ ដក​កាំភ្លើង​កា-៥៩ បាញ់​ត្រូវ​ម្ចាស់​ឡាន ១ គ្រាប់​លើ​ដោះ​ខាង​ឆ្វេង​ធ្លាយ​ទៅ​ក្រោយ​សន្លប់​ផង។ ក្រោយ​ការ​ស៊ើប​អង្កេត​នៅ​ថ្ងៃ​បន្ទាប់ (២៨ ខែ​មករា) ជន​ជាប់​ចោទ​ទាំង ២ នាក់​ក៏​ត្រូវ​នគរបាល​យុត្តិធម៌​ចាប់​ខ្លួន​បញ្ជូន​មក​សាលា​ដំបូង​រាជធានី។

សំណុំ​រឿង​នេះ ជន​ជាប់​ចោទ​ត្រូវ​សាលា​ដំបូង​រាជធានី​បើក​សវនាការ​កាត់​ទោស​នៅ​ថ្ងៃ ទី៧ ខែ​ឧសភា ឆ្នាំ​២០១៣ ដោយ​សម្រេច​ផ្តន្ទាទោស​ដាក់​ពន្ធនាគារ យូ សុកគារ ១០ ឆ្នាំ​និង​ឲ្យ​សង​ទៅ​ជន​រងគ្រោះ ២០ លាន​រៀល ឯ​ឈ្មោះ គង់ ដារ៉ា ត្រូវ​ផ្តន្ទាទោស ២​ឆ្នាំ ពី​បទ​កំហែង​យក​តែ​បាន​ដាក់​ឃុំ​តែ ១ ឆ្នាំ និង​ព្យួរ​ទោស​នៅ​សល់​តាម​អំណាច​សាលក្រម​ចុះ​ថ្ងៃ ទី​៣១ ខែ​កក្កដា ឆ្នាំ​២០១៣។

ក្នុង​សវនាការ​ដែល​អវត្តមាន​ជន​រងគ្រោះ ឈ្មោះ យូ សុកគារ បាន​ប្រាប់​ចៅក្រម​ថា ខ្លួន​ជា​មន្ត្រី​នគរបាល​ប្រឆាំង​គ្រឿង​ញៀន​ក្រុង​តែ​ដោយ​ជីវភាព​ក្រីក្រ​ក៏​នាំ​គ្នា​ទៅ​ស្ទាក់​ចាំ​ចាប់​ឡាន​យក​លុយ ហើយ​នៅ​យប់​ថ្ងៃ​កើត​ហេតុ​នោះ ជន​រងគ្រោះ​បាន​ឈប់​ឡាន​និង​យក​ដែក​បំពង់​ទីប​បម្រុង​វាយ​មក​លើ​ខ្លួន​ទើប​បាន​ដក​កាំភ្លើង​ហើយ​រាលកៃ​ទៅ​ត្រូវ​ជន​រងគ្រោះ​របួស។

សុកគារ និយាយ​ថា៖ «ខ្ញុំ​រាលកៃ​កាំភ្លើង ខ្ញុំ​មិន​បាន​បាញ់​គាត់​ទេ សូម​តុលាការ​មេត្តា​បន្ធូរ​បន្ថយ​ទោស​ដល់​រូប​ខ្ញុំ»។

លោក នូ ចន្ថា មេធាវី​ចាត់​តាំង​ការពារ​សិទ្ធិ​ជន​ជាប់​ចោទ​ថ្លែង​ថា តាម​ចម្លើយ​កូន​ក្តី​លោក​នៅ គ្រប់​ដំណាក់ និង​នៅ​ក្នុង​សវនាការ​ថ្ងៃ​នេះ ថា​គាត់​បាន​រាល​កៃ​កាំភ្លើង​ហើយ​គាត់​ប្តឹង​ទាស់ ព្រោះ​សាលា​ដំបូង​ដាក់​ទោស ១០​ឆ្នាំ វា​ធ្ងន់ធ្ងរ​ពេក។

លោក​មេធាវី​ថា៖ «កូន​ក្តី​ខ្ញុំ មាន​កំហុស​ប៉ុន្តែ​សូម​តុលាការ​មេត្តា​បន្ថយ​ទោស​ដល់​គាត់»។

លោក​ព្រះ​រាជអាជ្ញា ង៉ែត សារ៉ាត់ តំណាង​មហា​អយ្យការ​ថ្លែង​ថា ជន​ជាប់​ចោទ​បាន​ប្រើ​តួនាទី​ទៅ​គំរាម​កំហែង​ប្រជាជន ធ្វើ​ឲ្យ​ប្រជាជន​គ្មាន​ទំនុក​ចិត្ត​លើ​ប៉ូលិស​ហើយ​ធ្វើ​ខុស​ច្បាប់ ដូច្នេះ​ផ្អែក​តាម​អង្គ​ហេតុ​ជន​ជាប់​ចោទ​ពិត​ជា​បាន​បាញ់​ជន​រងគ្រោះ​ដូច​នេះ​សូម​ក្រុម​ប្រឹក្សា​ពិចារណា​និង តម្កល់​ទោស​ពួក​គេ។

ក្រោយ​ពី​ក្រុម​ប្រឹក្សា​ថយ​ទៅ​ពិចារណា​មិន​ប៉ុន្មាន​នាទី​មក លោក អ៊ុំ សារិទ្ធ ប្រធាន​ចៅក្រម​ប្រឹក្សា​ជំនុំ​ជម្រះ​បាន​ប្រស​សម្រេច​តម្កល់​ទោស​ជន​ជាប់​ចោទ​តាម​ការ​សម្រេច​របស់​តុលាការ​ថ្នាក់​ក្រោម​ដដែល ព្រោះ​ជន​ជាប់​ចោទ​មិន​ព្រម​សារភាព​ពី​ទោស​កំហុស និង​បើក​សិទ្ធិ​ប្តឹង​សារ​ទុក្ខ​ទៅ​តុលាការ​កំពូល​បើ​មិន​សុខ​ចិត្ត៕

អត្ថបទគួរចាប់អារម្មណ៍