The Phnom Penh Post Search

Search form

Logo of Phnom Penh Post newspaper Phnom Penh Post - ប៉េ​អឹម​ខេត្ត​បង្ក្រាប​បទ​ល្មើស​នេសាទ​ក្នុង​ដែន​អភិរក្ស​និង​ប្រើ​ឧបករណ៍​ខុស​ច្បាប់




ប៉េ​អឹម​ខេត្ត​បង្ក្រាប​បទ​ល្មើស​នេសាទ​ក្នុង​ដែន​អភិរក្ស​និង​ប្រើ​ឧបករណ៍​ខុស​ច្បាប់

ប៉េ​អឹម​ខេត្ត​បង្ក្រាប​បទ​ល្មើស​នេសាទ​ក្នុង​ដែន​អភិរក្ស​និង​ប្រើ​ឧបករណ៍​ខុស​ច្បាប់

130403_10
សមត្ថកិច្ចចុះបង្ក្រាបបទល្មើសនេសាទនៅស្រុកឯកភ្នំ សហការី

បាត់ដំបងៈ អ្នក​នេសាទ​ជាតិ​វៀតណាម​៤នាក់​ ដែល​កម្លាំង​កង​រាជ​អាវុធ​ហត្ថ​ខេត្ត​បាត់ដំបង​ស្ទាក់​ចាប់​កំពុង​អូស​អួន​ក្នុង​តំបន់​ដែន​អភិរក្ស​ពូជ​ត្រីឡូត៍​លេខ២ និង​ឡូត៍​លេខ​១ កាល​ពីថ្ងៃ​ទី១​មេសា ​នៅ​ភូមិ​ក្បាល​តោ​ ស្រុក​ឯកភ្នំ​ ខេត្ត​បាត់​ដំបង ត្រូវ​បញ្ជូន​ទៅ​សាលា​ដំបូង​ខេត្ត​នៅ​ថ្ងៃ​ទី៣​មេសា​ម្សិលមិញ។

លោក ​ជឹម​ ចិន្តា ​មេបញ្ជា​ការ​ស្នាក់​ការ​សន្តិសុខ​លេខ​៥០៨​ឲ្យ​ដឹង​ថា​ ជន​ជាតិ​វៀត​ណាម​​ដែល​កម្លាំង​លោក​ស្ទាក់​ចាប់​ឃាត់​ខ្លួន​នោះ ខណៈ​ពួក​គេ​កំពុង​ធ្វើ​សកម្មភាព​យក​គ្រឿង​ម៉ាស៊ីន​អូស​អួន​នៅ​ចន្លោះ​ កណ្តាល​នៃ​ដែន​អភិរក្ស​ពូជ​ត្រី ហើយ​ត្រូវ​កម្លាំង​ល្បាត​ចាប់​បញ្ជូន​ទៅ​ទី​បញ្ជា​ការ​ខេត្ត​និង​ត្រូវ​ បញ្ជូន​ទៅ​សាលា​ដំបូង​ខេត្ត​នៅ​ថ្ងៃ​ពុធ​នេះ​ ដើម្បី​ឲ្យ​ចៅក្រម​ស៊ើប​សួរ​ និង​ចោទ​ប្រកាន់ ។

លោក​ថ្លែង​ថា​៖​«​ពួក ​គេ​មាន​គ្នា​ជាង​១០​នាក់​ បាន​បំផ្លិច​បំផ្លាញ​ធនធាន​ធម្មជាតិ​មួយ​ដែល​ច្បាប់​ហាម​ឃាត់​និង​ត្រូវ​ ជាប់​ទោស​ក្នុង​បទ​ល្មើស​នេសាទ​ ព្រោះ​ពួក​គេ​ចូល​ទៅ​នេសាទ​ក្នុង​ដែន​ឡូត៍​អភិរក្ស​ត្រី​ពូជ​ប្រើ​ទូក​ម៉ាស៊ីន​ធំៗ ​ជា​មធ្យោបាយ​ ខណៈ​របស់​យើង​មាន​ទូក​អន់​ជាង​»​។

លោក​ប្រាប់​ បន្ត​ថា ជន​សង្ស័យ​ទាំង​៤នាក់​មាន​ឈ្មោះ ឡេ យុំាងហ្វឿង អាយុ​២៨​ឆ្នាំ ទី២-ឈ្មោះ​ច្រាំង​ យ៉ាង​សាង​ អាយុ​៣៧​ឆ្នាំ​ទី៣-ឈ្មោះ​ យឿង យ៉ាង​ទុយ​អាយុ​៣១​ឆ្នាំ និង​ទី៤ ឈ្មោះ​យ៉យាំង ឌឿង អាយុ​៣៣​ឆ្នាំ​ ពួក​គេ​រស់​នៅ​ភូមិ​ក្បាល​តោ​ ស្រុក​ឯកភ្នំ​ ខេត្ត​បាត់ដំបង។​ ក្នុង​ការ​បង្រ្កាប​នោះ​សមត្ថកិច្ច​រឹបអូស​បាន​ឧបរកណ៍​អូស​ដោយ​ម៉ាស៊ីន​មាន​ប្រវែង​១.១៥០​ម៉ែត្រ​ ទូក​ឈើ​៤​និង​ទូក​ម៉ាស៊ីន​៤​គ្រឿង។​លោក​បន្ត​ថា ដោយ​សារ​ក្រុម​ជនល្មើស​បាន​ប្រើប្រាស់​ឧករណ៍​នេសាទ​ទំនើបៗ ឯសមត្ថកិច្ច​យើង​ប្រើ​ឧបករណ៍​អន់​ជាង ជា​ហេតុ​ធ្វើ​ឲ្យ​ជនល្មើស​មួយ​ចំនួន បើក​កាណូត​រត់​គេច​ខ្លួន​អស់។​

ទាក់ទិន​នឹង​បទល្មើស​នេសាទ​ដែរ នៅ​ឯ​ខេត្ត​បន្ទាយ​មានជ័យ ​កាលពី​ថ្ងៃទី​២ ខែ​មេសា ជន​ល្មើស​នេសាទ​៥នាក់ ក៏​ត្រូវ​កម្លាំង​កង​រាជ​អាវុធហត្ថ​ស្រុក​អន្លង់វែង ស្ទាក់​ចាប់​ឃាត់​ខ្លួន​បាន ​ខណៈ​ពួក​គេ​កំពុង​ហ៊ុម​អួន​អូស​យក​ត្រី​នៅ​ក្នុង​បឹង​ ស្ថិត​នៅ​ភូមិ​ទំនប់​ឃុំ​ត្រពាំងតាវ ​ស្រុក​អន្លង់​វែង ខេត្ត​ឧត្តរមានជ័យ។​

លោក ងួន ធារិទ្ធ មេ​បញ្ជាការ​កង​រាជ​អាវុធ​ហត្ថ​ស្រុក​អន្លង់​វែង បាន​ប្រាប់​ឲ្យ​ដឹង​ថា អ្នក​ទាំង​៥នាក់ មាន​ឈ្មោះ ​ទី១.ឯម លុយ​ ភេទ​ប្រុស អាយុ​៥៥​ឆ្នាំ ទី២.ខេង ប៊ុន​ថៃ ប្រុស​ អាយុ​៤៤​ឆ្នាំ ទី៣.ម៉ៅ ពៅ ប្រុស​អាយុ ៣០​ឆ្នាំ ទី៤.ខេង ដំ ប្រុស អាយុ ៥០​ឆ្នាំ និង​ទី៥.ឈ្មោះ អ៊ុន យ៉េន ប្រុស អាយុ ៤៦​ឆ្នាំ អ្នក​ទាំងអស់​គ្នា​រស់​នៅ​ភូមិ​ទំនប់ ឃុំ​ត្រពាំង​តាវ ស្រុក​អន្លង់វែង។

នៅ​ក្នុង​ប្រតិបត្តិការ​នេះ កម្លាំង​ល្បាត​កងរាជ​អាវុធ​ហត្ថ​ស្រុក​រឹប​អូសបាន​វត្ថុតាង មាន​ស្បៃ​អួន​ក្រឡាញឹក ប្រវែង​១០០​ម ហើយ​បាន​នាំ​ខ្លួន​ពួក​គេ​មក​ទីបញ្ជាការ​កងរាជ​អាវុធហត្ថ​ស្រុក​ ធ្វើការ​អប់រំ​ណែនាំ​និង​ធ្វើ​កិច្ច​សន្យា​បញ្ឈប់​ប្រើប្រាស់​ឧបករណ៍​នេសាទ​ ដែល​ច្បាប់​ហាម​ឃាត់​ទៀតមុន​​ឲ្យ​វិល​ត្រ​ឡប់​ទៅ​លំនៅឋាន​វិញ៕

អត្ថបទគួរចាប់អារម្មណ៍