The Phnom Penh Post Search

Search form




Logo of Phnom Penh Post newspaper Phnom Penh Post - ប្រពន្ធ​ចុង​កាប់​ប្រពន្ធ​ដើម​នឹង​បុ័ងតោ​របួស​ត្រូវ​ជាប់​ឃុំ




ប្រពន្ធ​ចុង​កាប់​ប្រពន្ធ​ដើម​នឹង​បុ័ងតោ​របួស​ត្រូវ​ជាប់​ឃុំ

ប្រពន្ធ​ចុង​កាប់​ប្រពន្ធ​ដើម​នឹង​បុ័ងតោ​របួស​ត្រូវ​ជាប់​ឃុំ

 ភ្នំពេញៈ ប្រពន្ធ​ចុង​ដែល​យក​កាំបិត​ប៉័ង​តោ​កាប់​ប្រពន្ធ​ដើម​ឲ្យ​របួស​ដៃ​ធ្ងន់ធ្ងរ​ដេក​ពេទ្យ ព្រោះ​តែ​រឿង​មាន​ជម្លោះ​យក​ប្តី​មួយ​ពីរ​នាក់​កាល ពីថ្ងៃ​ទី​៤ ខែ​កុម្ភៈ​នោះ សមត្ថកិច្ច​នៅ​បន្ត​ឃុំ​ខ្លួន​ក្នុង​អធិការដ្ឋាន​ខណ្ឌ​មាន​ជ័យ ដើម្បី​កសាង​សំណុំ​រឿង​បញ្ជូន​ទៅ​តុលាការ​រាជធានី​នៅ​ឡើយ។

លោក ម៉ែន ហេង​ទិត្យ អធិការ​រង​នគរបាល​ខណ្ឌ​មាន​ជ័យ​ឲ្យ​ដឹង​ពី​ម្សិលមិញ​ថា ស្រ្តី​ប្រពន្ធ​ចុង​ដែល​ប្រើ​កាំបិត​កាប់​ប្រពន្ធ​ដើម​ត្រូវ​ក​ដៃ ក្នុង​ជម្លោះ​ព្រោះ​រឿងប្រចណ្ឌ​ប្តី​នោះ​នៅ​មិន​ទាន់​បាន​បញ្ជូន​សំណុំ​រឿង​ទៅ​សាលា​ដំបូង​ភ្នំពេញ​នៅឡើយ​ទេ។

លោកប្រាប់ដែរថា៖ «សំណុំ​ឯកសារ​បាន​បញ្ជូន​ទៅ​ថ្នាក់​លើ​សម្រេច​តែ​នៅ​មិន​ទាន់​ដឹង​ថា នឹង​បញ្ជូន​ជន​សង្ស័យ​ទៅ​តុលាការ​នៅ​ពេល​ណា​នោះ​ទេ»

លោក ទេព បូរ៉ា នាយ​ប៉ុស្តិ៍​នគរបាល​សង្កាត់​បឹង​ទំពុន​បាន​ឲ្យដឹង​ថា ករណី​ជម្លោះ​រវាង​ប្រពន្ធ​ដើម​និង​ប្រពន្ធ​ចុង រហូត​បង្ក​ជា​ហិង្សា​នោះ លោក​បាន​ទទួល​ពាក្យ​បណ្តឹង​ពី​ខាង​ស្រ្តី​រងគ្រោះ​ជា​ប្រពន្ធ​ដើម​រួចហើយ។ មន្រ្តី​នគរបាល​ប៉ុស្តិ៍​សង្កាត់​បឹងទំពុន​បាន​រំឭក​ប្រាប់​ថា កាល​ពី​រសៀល​ម៉ោង​ប្រមាណ​ជា​៣​ថ្ងៃទី​០៤ ខែ​កុម្ភៈ ស្ដ្រី​ជា​ប្រពន្ធ​ដើម​ឈ្មោះ ឯម ស្រីមុំ អាយុ ២៥​ឆ្នាំ និង​ប្រពន្ធ​ចុង​ឈ្មោះ វង្ស ស្រី​រស់ អាយុ ៣០ឆ្នាំ បាន​បង្ក​ជម្លោះ​ជេ​បញ្ចោរ​គ្នា ដោយសារ​តែ​ប្រចណ្ឌ​ប្តីនៅ​ផ្ទះ​ប្រពន្ធ​ចុង។

តាមសាក្សីនៅទី​កន្លែងកើត​ហេតុ​អះអាង​ប្រាប់​សមត្ថកិច្ច​ថា​ស្ដ្រី​ប្រពន្ធ​ដើម ឯម ស្រីមុំ អាយុ ២៥​ឆ្នាំ រស់​នៅផ្ទះ​ជួ​ល​ នៅ​សង្កាត់​ផ្សារ​ដើម​ថ្កូវ​ ខណ្ឌ​ចំការមន រាជធានី​ភ្នំពេញ។ ថ្ងៃ​កើត​ហេតុ​បាន​ធ្វើ​ដំណើរ​មក​លេង​ផ្ទះ​ម្ដាយ​ក្មេក​នៅ​កន្លែង​កើតហេតុ។ លុះ​ពេល​ទៅ​ដល់​ស្រាប់​តែ​បាន​ឃើញ​ប្ដី​របស់​ខ្លួន ឈ្មោះ ប៉េងរ៉ូហ្សា អាយុ​២៦​ឆ្នាំ កំពុង​អង្គុយ​សាសង​គ្នា​ជាមួយ​ស្ដ្រី​ជា​ប្រពន្ធ​ចុង​ឈ្មោះ វង្ស ស្រី​រស់ ដែល​ស្នាក់​នៅ​ផ្ទះ​លេខ​៣៨​៦​ ផ្លូវ​លេខ ៨៧ បេតេ ក្នុង​ក្រុម​ទី៥ ភូមិ​ត្នោត​ជ្រំ សង្កាត់បឹង​ទំពុន ខណ្ឌ​មាន​ជ័យ នៅ​ទល់​មុខ​ផ្ទះ​ម្តាយ​ក្មេក។

មន្រ្តី​នគរបាល​ប៉ុស្តិ៍​សង្កាត់​បឹង ទំពុន​ប្រាប់​ទៀត​ថា នៅ​ពេល​ប្រពន្ធ​ដើម​ឃើញ​ដូច្នោះ​ហើយ បាន​ដឹង​រឿង​ច្បាស់ ក៏​បាន​ចាប់​ផ្ដើម​ជេរ​បញ្ចោរ​ទៅ​លើ​ស្ដ្រី ប្រពន្ធ​ចុង​តែ​ម្តង ពី​ដំបូង​ខាង​ប្រពន្ធ​ចុង​មិន​បាន​ជេរ​ត ឬ​ប្រើ​ពាក្យ​សម្តី​ឆ្លើយតប​វិញ​ទេ ហើយ​ក៏​ដើរ​សំដៅ​ទៅ​ផ្ទះ​ខ្លួន​វិញ ក្នុង​គោល​បំណង​ថា មិន​ចង់​បង្ក​រឿង​វែង​ឆ្ងាយ​ទេ​នាំ​ឲ្យ​ខ្មាស​គេ។ មន្ត្រី​ដដែល​បាន​បញ្ជាក់​ដែរថា ប៉ុន្ដែ ដោយ​ខាង​ប្រពន្ធ​ដើម​ខឹង​ខ្លាំង​ពេក និង​បាន​ដើរ​ទៅ​តាម​ដល់​ផ្ទះ​នាង​ជា​ប្រពន្ធ​ចុង​ជេរ​បញ្ចោរ​ថែម​ទៀត។ គ្រា​នោះ​ដោយ​នឹក​ខ្មាស​គេ​ផង និង​អត់​ទ្រាំ​នឹង​ការ​ជេរ​បញ្ចោរ​ពី​នាង​ប្រពន្ធ​ដើម​លែង​បាន​ទៀត ស្ដ្រី​ជា ប្រពន្ធ​ចុង​បាន​ចូល​ទៅ​ក្នុង​ផ្ទះ​ទាញ​យក​បាន​កាំបិត​ប៉័ងតោ​ស្ទុះមក​កាប់​ទៅ​លើ​ស្ដ្រី​ប្រពន្ធ​ដើម បណ្ដាល​ឲ្យ​ត្រូវ​កដៃ​ខាង​ឆ្វេង​រង​របួស​ធ្ងន់​ត្រូវ​បញ្ជូន​មក​មន្ទីរពេទ្យ។

មន្រ្តីនគរបាល​ប្រាប់​ថា ស្ដ្រី​ប្រពន្ធ​ដើម​បាន​ប្រាប់​សមត្ថកិច្ច​ថា នាង​ឈ្លោះ​ជាមួយ​ប្តី​ហើយ​នាង​មក​ផ្ទះ​ម្ដាយ​ក្មេក​នៅ​ថ្ងៃ​កើត​ហេតុ​នោះ ក្នុង​គោល​បំណង​ចង់​មក​ប្រាប់​ម្តាយ​ក្មេក​ឲ្យ​ប្រាប់​ប្ដី​នាង​ផ្ដល់ ប្រាក់​ខ្លះ​សម្រាប់​ចិញ្ចឹម​កូន​ពេល​កើត ព្រោះប្តី​ចេះតែ​គេច​មិន​ទទួល​ខុស​ត្រូវ៕

អត្ថបទគួរចាប់អារម្មណ៍