The Phnom Penh Post Search

Search form




Logo of Phnom Penh Post newspaper Phnom Penh Post - ប្រពន្ធ​ជន​សង្ស័យ​​ត្រូវ​រង​គ្រាប់​កាំភ្លើង​ប៉ូលិស​ធ្លាយ​ពោះ​ប្រុង​ប្តឹង​ទារ​សំណង




ប្រពន្ធ​ជន​សង្ស័យ​​ត្រូវ​រង​គ្រាប់​កាំភ្លើង​ប៉ូលិស​ធ្លាយ​ពោះ​ប្រុង​ប្តឹង​ទារ​សំណង

ប្រពន្ធ​ជន​សង្ស័យ​​ត្រូវ​រង​គ្រាប់​កាំភ្លើង​ប៉ូលិស​ធ្លាយ​ពោះ​ប្រុង​ប្តឹង​ទារ​សំណង

130218_10
ជនសង្ស័យរងគ្រាប់កាំភ្លើងប៉ូលិស ដេកព្យាបាលនៅមន្ទីរពេទ្យ សហការី

ក្រុងប៉ោយប៉ែតៈ ប្រពន្ធ​ជន​សង្ស័យ​ដែល​ប៉ូលិស​ខេត្ត​និង​ក្រុង​ប៉ោយ​ប៉ែត​ព័ទ្ធ​ចាប់​តាម ដីកា តុលាការ ពី​បទ​ពាក់​ព័ន្ធ​នឹង​គ្រឿង​ញៀន​និង​បាន​រង​គ្រាប់​កាំភ្លើង​ធ្លាយ​ពោះ កាល​ពី​ថ្ងៃ​ទី​១៥​កុម្ភៈ​កំពុង​​ដេក​ពេទ្យ​បង្អែក​ខេត្ត​នោះ​ថា​នឹង​ប្តឹង ទារ​សំណង​ពី​មន្រ្តី​ប៉ូលិស​បង្ក បើ​សមត្ថកិច្ច​រក​មិន​ឃើញ​ដូច​ការ​ចោទប្រ​កាន់​ទេ​នោះ។

ស្រ្តី អ៊ុល សុវណ្ណ អាយុ​២៧​ឆ្នាំ​ជា​ប្រពន្ធ​ជន​សង្ស័យ ម៉េង ទ្រី អាយុ​៤៧​ឆ្នាំ នៅ​ភូមិ​មិត្ត​ភាព សង្កាត់​-​ក្រុង​ប៉ោយ​ប៉ែត​ ខេត្ត​បន្ទាយ​មាន​ជ័យ បាន​ប្រាប់​ថា ប្តី​គាត់​កំពុង​តែ​សង្គ្រោះ​នៅ​មន្ទីរ​ពេទ្យ​បង្អែក​មង្គល​បុរី បន្ទាប់​ពី​នគរបាល​បាញ់​ត្រូវ​មួយ​គ្រាប់​ចំ ពោះ​ធ្លាយ​មក​ឆ្អឹង​ខ្នង ខណៈ​កំពុង​ឈរ​បាញ់​ទឹក​លើ​ថ្នល់​កុំ​ឲ្យ​ហុយ​ដី។

នាងប្រាប់បន្តថា៖ «ប្តី​ខ្ញុំ គាត់​មិន​ទាន់​ដឹង​ខ្លួន​នៅ​ឡើយ​ទេ ខ្ញុំ​ភ័យ​ណាស់ ព្រោះ​ខ្ញុំ​មិន​ដឹង​ថា​ហេតុ​អ្វី​ប៉ូលិស​បាញ់​ប្តី​ខ្ញុំ​ហើយ​បើ​គាត់​គ្មាន កំហុស ប៉ូលិស​នោះ​នឹង​ចេញ​សំណង​ដល់​ប្តី​ខ្ញុំ»។

លោក អ៊ំ សុផល អធិការ​ក្រុង​ប៉ោយប៉ែ​ត​ប្រាប់​ពី​ម្សិល​មិញ​ថា ករណីរ​ផ្ទុះ​អាវុធ​ពេល​សមត្ថកិច្ច​ចុះ​ឃាត់​ខ្លួន​ជន​សង្ស័យ​មិន​មែន​នគរបាល​បាញ់​ទេ គឺ​ជា​ការ​រាល​កៃ​កាំភ្លើង​ពេល​សមត្ថកិច្ច​ព័ទ្ធ​ចាប់​ជន​សង្ស័យ​ដែល ព្យាយាម​រត់​គេច​ខ្លួន តែ​ត្រូវ​កម្លាំង​នគរបាល​ស្ទុះ​ទៅ​ឱប​ចាប់​ទើប​បណ្តាល​ឲ្យ​រាល​កៃ​កាំភ្លើង​ត្រូវ​បែប​នេះ។

លោកអធិការ​បន្ត​ថា រឿង​នេះ​ពាក់​ព័ន្ធ​នឹង​ដីកា​តុលាការ​ឲ្យ​នាំ​ខ្លួន ដោយ​សង្ស័យ​ថា​ជន​នេះ​ជាប់​ពាក់​ព័ន្ធ​នឹង​គ្រឿង​ញៀន។

លោក អ៊ិត សម្ផស្ស ចៅក្រម​សាលា​ដំបូង​ខេត្ត​បន្ទាយ​មាន​ជ័យ​ដែល​កាន់​សំណុំ​រឿង​នេះ​ឲ្យ ដឹង​ពី​ម្សិល​មិញ​ថា ជន​សង្ស័យ​ដែល​ត្រូវ​របួស​នោះ​គឺ​ខាង​សាលា​ដំបូង​ខេត្ត​ចេញ​ដីកា បង្គាប់​ឲ្យ​ចូល​ខ្លួន​រួច​ហើយ ប៉ុន្តែ​ជន​នេះ​មិន​បាន​ចូល​មក​បំភ្លឺ តាម​ការ​កោះហៅ​របស់​តុលាការ​ខេត្ត​នោះទេ។

លោកចៅក្រម ថា ជន​សង្ស័យ​តុ​លាការ​មិន​ទាន់​ចោទ​ប្រកាន់​គាត់​ជា​ផ្លូវ​ការ​នៅ​ឡើយ​ទេ ​គ្រាន់​តែ​អង្កេត​ដោយ​សង្ស័យ​ជាប់​ពាក់​ព័ន្ធ​នឹង​គ្រឿង​ញៀន​ប៉ុណ្ណោះ តែ​គាត់​ចេះតែ​គេច។

អ្នកស្រី សុវណ្ណ រំឭក ថា នៅ​ថ្ងៃ​កើត​ហេតុ​ប្តី​គាត់​ឈរ​បាញ់​ទឹក​ថ្នល់​នៅពី​មុខ​ផ្ទះ ស្រាប់តែ​មាន​រថយន្ត​មួយ​ម៉ាក​វីហ្គូ មាន​មនុស្ស​៤​នាក់​ស្លៀកពាក់​ស៊ីវិល​ប្រដាប់​ដោយ​កាំភ្លើង​វែងខ្លី លោត​ចុះ​មក​ហើយ​ដក​កាំភ្លើង​ដេញ​ចាប់​ប្តី​គាត់​ពេល​នោះប្តី​គាត់​បាន រត់គេច​ទៅ​ក្រោយ​ផ្ទះ​តែ​ត្រូវ​នគរបាល​បាញ់​ត្រូវ​មួយ​គ្រាប់តែ​ម្តង។

គាត់បន្ត​ថា បន្ទាប់​មក​ពួកគេ​ក៏នាំ​គ្នា​លើក​ប្តី​គាត់​ដែល​របួស​ដាក់​ក្នុង រថយន្ត​យក​ទៅ​នៅ​មន្ទីរ​ពេទ្យ​មង្គល​បុរី តែ​មន្រ្តី​ដែល​ជា​អ្នក​បាញ់​នោះ​មិន​ឡើង​ជិះ​​រថយន្ត​ជាមួយ​ទៅ​ទេ គឺ​នៅ​រត់​ហៅ​ម៉ូតូឌុប​ជិះ​គេច​ខ្លួន​បាត់។

អ្នកស្រី សុវណ្ណ ថា ជន​ស្លៀក​ពាក់​ស៊ីវិល​មក​ចាប់​ប្តី​គាត់​នោះ​និយាយ​ថាគ្នា ប្តី​គាត់​សង្ស័យ​ពាក់ព័ន្ធ​នឹង​គ្រឿង​ញៀន ហើយ​ពួកគេ​ចាប់​ខ្លួន​តាម​ដីកា​តុលាការ។ ប៉ុន្តែ​គាត់​ឆ្ងល់​ថា ​ប្រហែល​ជាមួយ​ឆ្នាំ​នេះ​ប្តី​គាត់​មិន​បាន​ទៅ​ណា​ទេ​ដេក​ឈឺ​នៅ​តែ​ផ្ទះ។ គាត់​ថា ៖ «បើគាត់​មាន​លុយ​រាប់​លាន​ឲ្យខ្ញុំ ក៏​ខ្ញុំ​មិន​ថា​ដែរ តែ​ខ្ញុំ​អូស​រទេះ​លក់​នំ​ចិញ្ចឹម​ប្តី ដល់​តែគេ​មក​ចាប់​បែប​នេះខ្ញុំ​ក៏​មិន​យល់​ដែរ»៕

អត្ថបទគួរចាប់អារម្មណ៍