The Phnom Penh Post Search

Search form




Logo of Phnom Penh Post newspaper Phnom Penh Post - ផឹក​ចំ​ស្រា​ខ្លាំង​វាយ​ប្រពន្ធ​នឹង​ដប​ស្រា​ផុង​លលាដ៍​ស្លាប់




ផឹក​ចំ​ស្រា​ខ្លាំង​វាយ​ប្រពន្ធ​នឹង​ដប​ស្រា​ផុង​លលាដ៍​ស្លាប់

ផឹក​ចំ​ស្រា​ខ្លាំង​វាយ​ប្រពន្ធ​នឹង​ដប​ស្រា​ផុង​លលាដ៍​ស្លាប់

ភ្នំពេញៈ ដោយសារ​តែ​ជាតិ​សុរា​បាន​ធ្វើ​ឲ្យ​បុរស​ម្នាក់​បាត់​សតិ ដាច់​ចិត្ត​វាយ​ស្រ្តី​ជា​ប្រពន្ធ​នឹង​ដប​ស្រា​ស៊ុប​ពើ​វីស្គី ដល់​ផុង​លលាដ៍​ស្លាប់ រួច​គ្រប​ភួយ​ទុក​ចោល​ក្នុង​ផ្ទះ​ជួល ហើយ​នាំ​កូន​តូច​២នាក់​រត់​គេច​ខ្លួន​បាត់​កាល​ពី​ថ្ងៃ​អង្គារ។

លោក សួន សំអឿន នាយ​នគរបាល​ប៉ុស្តិ៍​គោក​រកា​បាន​ឲ្យ​ដឹង​ថា អំពើ​ហិង្សា​ប្តី​វាយ​ប្រពន្ធ​ស្លាប់​នេះ​កើត​ឡើង​តាំង​ពី​ថ្ងៃ​អាទិត្យ​ក្នុង​ផ្ទះ​ជន​រងគ្រោះ​ជួល​ស្នាក់​នៅ​ក្នុង​ភូមិ​អណ្ដូង​៣ សង្កាត់​គោក​រកា ខណ្ឌ​ពោធិ៍​សែន​ជ័យ ពួកគេ​មាន​ស្រុក​កំណើត នៅ​ភូមិ​គោក​ច្រែះ ឃុំ​អង្គរស ស្រុក​មេសាង ខេត្ត​ព្រៃវែង។

លោក​បញ្ជាក់​ថា ស្រ្តី​រងគ្រោះ​ឈ្មោះ ហម ស្រីដា អាយុ​២៧​ឆ្នាំ រីឯ​ប្តី​ឈ្មោះ ភី រ៉ាវី អាយុ ២៦​ឆ្នាំ ជា​ជាង​ផ្សារ​ដែក​បាន​នាំកូន​តូចៗ​២នាក់ រត់​គេច​ខ្លួន​បាត់​បន្ទាប់​ពី​ដឹង​ថា ប្រពន្ធ​បាន​ស្លាប់។

លោក​មេប៉ុស្តិ៍​រៀប​រាប់​តាម​សម្តី​អ្នក​ភូមិ​ប្រាប់​ថា អំពើ​ហិង្សា​ក្នុង​គ្រួសារ​នេះ​បណ្តាល​មក​ពី​កូន​ទៅ​លេង​ផ្ទះ​អ្នក​ជិត​ខាង​ពី​ថ្ងៃ​អាទិត្យ ហើយ​ត្រូវ​ម្ចាស់​ផ្ទះ​ហាម​មិន​ឲ្យ​លេង ព្រោះ​ខ្លាច​បែក​កញ្ចក់​ទូ។ ស្ត្រី​ជា​ម្តាយ​រងគ្រោះ បាន​ឮ គេ​ស្តី​ឲ្យ​កូន មាន​កំហឹង​ក៏​ស្ទុះទៅ​វាយ​កូន​កុំ​ឱ្យ​ទៅ​លេង​ផ្ទះ​គេ​ទៀត រួច​ក៏​បន្ត​ទៅ​ហៅ​ប្ដី ដែល​កំពុង​ផឹក​ស៊ី​ជាមួយ​មិត្ត​ភក្ដិ​ឲ្យ​មក​ផ្ទះ។ ប្តី​ប្រពន្ធ​នេះ​មក​ដល់​ផ្ទះ ក៏​កើត​ជម្លោះ​ពាក្យ​សម្តី​គ្នា រហូត​ធ្វើ​ឲ្យ​បុរស​ជា​ប្តី​ដែល​មាន​ជាតិ​សុរា​លើស​អង្សា ផ្ទុះ​កំហឹង​ទប់​ចិត្ត​មិន​បាន​ទាញ​ដប​ស្រា​ស៊ុបពើ​វីស្គី វាយ​ក្បាល​ប្រពន្ធ បណ្ដាល​ឱ្យ​រង​របួស​ជា​ទម្ងន់។

លោកថា៖«ជន​រងគ្រោះ​ត្រូវ​ប្តី​វាយ​នឹង​ដបស្រា​ចំ​ចិញ្ចើម​ខាង​ឆ្វេង រយះ​ដេរ​៥​ថ្នេរ ហើយ​ត្រូវ​អ្នក​ភូមិ​នាំ​យក​ទៅ​ដេរ​នៅ​គ្លីនិក​ឯកជន ពេល​នោះ​ស្ត្រី​រង​គ្រោះ ក៏​មិន​ព្រម​ឲ្យ​សមត្ថកិច្ច​ចាប់​ខ្លួន​ប្តី​ដែរ ដោយ​អះ​អាង​ថា គ្រាន់​តែ​មាន​ទំនាស់​គ្រួសារ​បន្តិច​បន្តូច​ប៉ុណ្ណោះ»។

លោក​បញ្ជាក់​ថា បន្ទាប់​ពី​ដេរ​របួស​ហើយ​ស្រ្តី​រង​គ្រោះ​បាន​សម្ងំ​ដេក​នៅ​ក្នុង​ផ្ទះ​រហូត​មិន​ឃើញ​ចេញ​ទៅ​ពិនិត្យ​របួស​នៅ​មន្ទីរ​ពេទ្យ​ទេ។ លុះ​មក​ដល់​ថ្ងៃ​ទី​៣០​តុលា អ្នក​ជិត​ខាង​ឆ្ងល់ ព្រោះ​មិន​ឮមាត់​ក​ប្តី​ប្រពន្ធ​នេះ​ដូច​សព្វ​ដង ក៏​នាំគ្នា​ចូល​ទៅ​មើល​ក្នុង​បន្ទប់ ស្រាប់​តែ​ឃើញ​នាង​ដេក​ស្លាប់​ដោយ​មាន​ដណ្តប់​ភួយ​ផង។ ចំណែក​បុរស​ជា​ប្តី​និង​កូនៗ មិន​ដឹង​ជា​លប​រត់​គេច​ខ្លួន​តាំង​ពី​ពេល​ណា​ផង​ទេ។

លោកបន្តថា បន្ទាប់​ពី​ធ្វើ​កោសល្យ​វិច័យ​រួច​សមត្ថកិច្ច​បាន​ប្រគល់​សាក​សព​ឲ្យ​ក្រុម​គ្រួសារ​នាំ​យក​ទៅ​ធ្វើ​បុណ្យ​ពី​ម្សិល​មិញ។

លោក យាន នៅ មន្រ្តី​សង្កាត់​គោក​រកា​បាន​ប្រាប់​ដែរ​ថា ដោយ​សារ​តែ​ជា​គ្រួសារ​ក្រីក្រ​សព​ស្ត្រី​រងគ្រោះ​មិន​បាន​នាំ​យក​ទៅ​ធ្វើ​បុណ្យ​នៅ​ស្រុក​កំណើត​ទេ អាជ្ញាធរ​បាន​អង្គាស​ប្រាក់​បាន​ខ្លះ​ឲ្យ​ម្តាយ​ស្រ្តី​រង​គ្រោះ​ធ្វើ​បុណ្យ​នៅ​ផ្ទះ​ជួល។

ម្តាយ​ស្ត្រី​រង​គ្រោះ​កាល​ពី​ម្សិល​មិញ​មិន​អាច​ទាក់​ទង​បាន​ទេ៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។