The Phnom Penh Post Search

Search form




Logo of Phnom Penh Post newspaper Phnom Penh Post - ភ្លៀង​ខ្យល់​រលំ​ផ្ទះ​កំពុង​សង់ ១ ខ្នង​នៅ បវេល របួស ៩នាក់

ភ្លៀង​ខ្យល់​រលំ​ផ្ទះ​កំពុង​សង់ ១ ខ្នង​នៅ បវេល របួស ៩នាក់

ភ្លៀង​ខ្យល់​រលំ​ផ្ទះ​កំពុង​សង់ ១ ខ្នង​នៅ បវេល របួស ៩នាក់

បាត់ដំបងៈ ភ្លៀង​ខ្យល់​កន្ត្រាក់​តូច​មួយ​បាន​បោក​បក់​រំលំ​ផ្ទះ​កំពុង​តែ​សាង​សង់​មួយ​ខ្នង​បណ្តាល​ឲ្យ​មនុស្ស ៩នាក់​រង​របួស​ធ្ងន់​ស្រាល​កាល​ពី​ថ្ងៃ ទី៨ ខែ មីនា នៅ​ក្នុង​ស្រុក បវេល ខេត្ត បាត់ដំបង។

លោក ឈា នី មេឃុំ បឹងប្រាំ ពី​ម្សិលមិញ​បាន​ប្រាប់​ថា កាល​ពី​រសៀល​ថ្ងៃ​សៅរ៍​មាន​ភ្លៀង​ខ្យល់​កន្ត្រាក់​ផង​នៅ​តំបន់​កើត​ហេតុ​ប៉ុន្តែ​មិន​មែន​ជា​ខ្យល់​ព្យុះ​ទេ ពេល​នោះ​មនុស្ស​ទាំង ៩នាក់ បាន​រត់​ចេញ​ពីក្រោម​ផ្ទះ​ដោយ​សារ​ខ្លាច​មាន​គ្រោះថ្នាក់។

លោក​ថា៖ «ពួក​គេ​បាន​រត់​ចេញ​មក​ក្រៅ​ផ្ទះ​ទាំង​មេឃ​ភ្លៀង ដោយ​សារ​បារម្ភ​ខ្លាច​មាន​ព្យុះ​ទៀត ពីព្រោះ​ធ្លាប់​មាន​ហេតុការណ៍​ភ្លៀង​ព្យុះ​បាក់​ផ្ទះ​សង្កត់​អ្នក​ភូមិ​នេះ​ស្លាប់​ពីរ​នាក់ និង​របួស ៧នាក់ ម្តង​ហើយ កាល​ពី​ឆ្នាំ​មុន»។

លោក​ប្រាប់​ទៀត​ថា ទាំង​អស់​គ្នា​បាន​ដើរ​ចូល​ទៅ​ក្នុង​ផ្ទះ​វិញ ក្រោយ​ពី​ភ្លៀង​រាំង ប៉ុន្តែ​អកុសល​ខ្យល់​កន្ត្រាក់​ខ្លាំង​មួយ​បាន​បក់​រំលំ​ផ្ទះ​នោះ បណ្តាល​ឲ្យ​បាក់​សង្កត់​ធ្វើ​ឲ្យ​មាន​របួស​គ្រប់​គ្នា​មួយ​រំពេច។

លោក​បញ្ជាក់​ថា៖ «ពួក​គេ​ជា​សាច់​ញាតិ​គ្នា និង​ជា​ជាង​ជួសជុល​ផ្ទះ​ក្នុង​នោះ​មាន​ក្មេងៗ ៤នាក់ អាយុ​ពី ៥ខែ ដល់ ១១ឆ្នាំ ហើយ​និង​ស្រ្តី​មាន​ផ្ទៃ​ពោះ​ម្នាក់​ផង។ កុមារី​ម្នាក់​ក្នុង​ចំណោម​នេះ បាន​រង​របួស​ធ្ងន់​ដោយ​បាក់​ឆ្អឹង​ដង​កាំបិត ហើយ​ត្រូវ​បញ្ជូន​ទៅ​មន្ទីរពេទ្យ​ខេត្ត បាត់ដំបង»។

លោក​មេឃុំ​បាន​និយាយ​ទៀត​ថា គ្រោះថ្នាក់​នេះ​វា​ជា​ហេតុការណ៍​អាក្រក់​មួយ​ដែល​គ្មាន​អ្នក​ណា​នឹក​ស្មាន​ដល់ តែ​សំណាង​ល្អ​ដែរ​ដែល​គ្មាន​អ្នក​បាត់បង់​ជីវិត៕

អត្ថបទគួរចាប់អារម្មណ៍