The Phnom Penh Post Search

Search form

Logo of Phnom Penh Post newspaper Phnom Penh Post - មក​ពី​ថៃ​ញៀន​ថ្នាំ​វ៉ៃ​ម្តាយ​នឹង​គល់​ឫស្សី​ស្លាប់

មក​ពី​ថៃ​ញៀន​ថ្នាំ​វ៉ៃ​ម្តាយ​នឹង​គល់​ឫស្សី​ស្លាប់

មក​ពី​ថៃ​ញៀន​ថ្នាំ​វ៉ៃ​ម្តាយ​នឹង​គល់​ឫស្សី​ស្លាប់

កំពង់ចាមៈ បុរស​ញៀន​ថ្នាំ​ម្នាក់ ត្រូវ​សមត្ថកិច្ច​នគរបាល​ស្រុក​ស្ទឹង​ត្រង់ ចាប់​ខ្លួន​បញ្ជូន​ភ្លាមៗ​ទៅ​តុលាការ​ខេត្ត​កំពង់​ចាម បន្ទាប់​ពី​បុរស​នោះ​បាន​វាយ​សម្លាប់​ម្ដាយ​ខ្លួន​ឯង​នឹង​ព្រនង់​គល់​ឫស្សី។

លោក ជា ធារិទ្ធ អធិការ​ស្រុក​ស្ទឹង​ត្រង់ បាន​ប្រាប់​ភ្នំពេញ ប៉ុស្តិ៍​ពី​ថ្ងៃពុធ​ថា ជន​សង្ស័យ​ឈ្មោះ ម៉េង ពែង អាយុ​៣២​ឆ្នាំ ត្រូវ​ចាប់​ខ្លួន​បន្ទាប់​ពី​រូបគេ​វាយ​សំពង​ម្ដាយ​ដែល​មាន​វ័យ​៦២​ឆ្នាំ​នឹង ព្រនង់​គល់​ឫស្សី បណ្ដាល​ឲ្យ​ស្លាប់​នៅ​ក្នុង​ចម្ការ​ស្វាយ​ចន្ទី ដែល​មាន​ចម្ងាយ​ប្រមាណ​៨០០​ម៉ែត្រ​ពីផ្ទះ ដែល​ស្ថិត​ក្នុង​ភូមិ​ព្រែក​ព្រះ​អង្គ ឃុំ​ព្រែក​បាក់ ស្រុក​ស្ទឹង​ត្រង់។ ហេតុ​ការណ៍​នេះ​បាន​កើត​ឡើង កាល​ពី​ល្ងាច​ថ្ងៃ​ទី​១៣ ប្រមាណ​ជា​១០​ម៉ោង មុន​ថ្ងៃ​បុណ្យ​ចូល​ឆ្នាំ​ថ្មី​ឆ្នាំ​ម្សាញ់​ឈាន​មក​ដល់។

លោកបន្តថា៖«បច្ចុប្បន្ន ជន​សង្ស័យ​ត្រូវ​តុលាការ​ខេត្ត បង្គាប់​ឲ្យ​យក​ទៅ​ឃុំ​ខ្លួន​បណ្ដោះ​អាសន្ន ដោយ​ចោទ​ប្រកាន់​ពី​បទ​មនុស្ស​ឃាត​ដោយ​ចេតនា»។

លោក សយ សុទ្ធ មេ​ភូមិ​ព្រែក​ព្រះ​អង្គបាន​ប្រាប់​ឲ្យ​ដឹង​ថា ជន​សង្ស័យ​ជា​មនុស្ស​ញៀន​ថ្នាំ​និង​ទើប​តែ​ត្រឡប់​មក​ពី​រក​ការងារ​ធ្វើ​ក្នុង ប្រទេស​ថៃបាន​ប្រមាណ​ជាង​មួយ​សប្ដាហ៍​ប៉ុណ្ណោះ។

លោកឲ្យដឹង​ទៀតថា ក្រោយ​ពី​វាយ​សម្លាប់​ម្ដាយ​រួច ជន​នេះ​បាន​ព្យាយាម​ជីក​ដី​កប់​សព​ម្ដាយ​ដើម្បី​បំបិទ​ដាន ប៉ុន្តែត្រូវ​ឪពុក​មា​សាច់​ថ្លៃ​ម្នាក់ ឈ្មោះ អុល ឱក អាយុ​៧២​ឆ្នាំ បាន​ឃើញ​ហេតុការណ៍​នោះ ហើយ​បាន​ស្រែក​ហៅ​អ្នក​ភូមិ​ឲ្យ​ជួយ ខណៈ​ជន​សង្ស័យ​ព្យាយាម​តាម​សម្លាប់​គាត់​ម្នាក់​ទៀត​ដើម្បី​បំបិទ​មាត់។

លោកថ្លែងថា៖ «ទោះ​ជា​បែប​ណា​ក៏​ដោយ ជន​សង្ស័យ​ត្រូវ​បាន​ឪពុក​មាសាច់​ថ្លៃ​វាយ​មួយ​ដំបង​ត្រូវ​ស្មង​ជើង បណ្ដាល​ឲ្យ​ដួល​នៅ​នឹង​កន្លែង ខណៈ​ព្យាយាម​រត់​គេច ពេល​ដែល​ឃើញ​កម្លាំង​សមត្ថកិច្ច ទៅ​ដល់»។

តាមសម្ដី​របស់​លោក អុល ឱក ជា​ឪពុក​មាសាច់​ថ្លៃ​ជន​សង្ស័យ បាន​បញ្ជាក់​ថា ជន​សង្ស័យ​បាន​ទៅ​ធ្វើ​ការ​នៅ​ប្រទេស​ថៃ៦​ឆ្នាំ​មក​ហើយ ប៉ុន្តែ​មិន​ដែល​ផ្ញើ​លុយ​កាក់​មក​ផ្ទះ​ទេ គេ​ត្រឡប់​មក​វិញ គឺ​ដូច​ជា​មនុស្ស​វិកល​ចរិត។

លោក អុល ឱក និយាយ​ដែរ​ថា៖​«ខ្ញុំ​មិន​ដឹង​ថា​តើ​វា​ញៀនថ្នាំ​ឬ​អ្វី​នោះ​ទេ គ្រាន់​តែ​ដឹង​ថា វា​មាន​អាការ​ដូចជា មនុស្ស​ឆ្កួត ... វា​ឆ្កួត​រហូត​ដល់​វាយ​សម្លាប់​ម្ដាយ​របស់​វា​បង្កើត និង​បម្រុង​វាយ​សម្លាប់​ខ្ញុំ​ថែម​ទៀត តែ​សំណាង​ល្អ វា​រអិល​ដួល ហើយ​ខ្ញុំក៏​ស្ទុះ​ទៅ​ចាប់បាន​ដំបង​វាយវា ត្រូវ​ចំស្មង​ជើង​វា​ដួល​វិញ​ទើប​ចាប់​វា​បាន»៕

អត្ថបទគួរចាប់អារម្មណ៍