The Phnom Penh Post Search

Search form




Logo of Phnom Penh Post newspaper Phnom Penh Post - មជ្ឈមណ្ឌល​កំចាត់​មីន​ស៊ីម៉ាក់​បាន​ទៅ​ទទួល​យក​គ្រាប់​ទម្ងន់​២៥០​គីឡូក្រាម

មជ្ឈមណ្ឌល​កំចាត់​មីន​ស៊ីម៉ាក់​បាន​ទៅ​ទទួល​យក​គ្រាប់​ទម្ងន់​២៥០​គីឡូក្រាម

មជ្ឈមណ្ឌល​កំចាត់​មីន​ស៊ីម៉ាក់​បាន​ទៅ​ទទួល​យក​គ្រាប់​ទម្ងន់​២៥០​គីឡូក្រាម

20140318_09a
អ្នកជំនាញស៊ីម៉ាក់កំពុងស្ទូចគ្រាប់ដាក់ឡានម្សិលមិញ សហការី

កណ្តាលៈ កង​កម្លាំង​របស់​មជ្ឈមណ្ឌល​កំចាត់​មីន​កម្ពុជា (ស៊ីម៉ាក់) កាល​ពី​ម្សិលមិញ បាន​ទៅ​ទទួល​យក​គ្រាប់ MK 82 ទម្ងន់ ២៥០ គីឡូក្រាម​សល់​ពី​សម័យ​សង្គ្រាម ដែល​ក្រុម​កម្មករ​ជីក​ដី​របស់​ក្រុមហ៊ុន 7NG ប្រទះ​ឃើញ​នៅ​តំបន់​រោងចក្រ​របស់​ក្រុមហ៊ុន​នេះ​នៅ​ក្នុង ឃុំ​សន្លុង ស្រុក​ខ្សាច់​កណ្តាល កាល​ពី​ព្រឹក​ថ្ងៃ​សៅរ៍។

លោក ប៉ែន សារិទ្ធ ប្រធាន​ក្រុម​កម្ទេច​គ្រាប់​យុទ្ធភណ្ឌ​មិន​ទាន់​ផ្ទុះ​ប្រចាំ ខេត្ត​កណ្តាល និង​រាជធានី​ភំ្នពេញ បាន​ឲ្យ​ដឹង​ថា ក្រុម​របស់​លោក​បាន​ទៅ​ទទួល​យក​គ្រាប់​ដែល​ក្រុម​កម្មករ​ជីក​ដី​ប្រទះ​ឃើញ​នៅ ស្រុក​ខ្សាច់​កណ្តាល មក​រក្សា​ទុក​រួច​ហើយ។

លោក​បាន​បញ្ជាក់​ថា៖ «នេះ​ជា​ប្រភេទ​គ្រាប់ MK 82 ផលិត​នៅ​សហរដ្ឋ​អាមេរិក​នៅ​សល់​ពី​សម័យ​សង្គ្រាម​វា​ជា​ប្រភេទ​គ្រាប់​ទម្លាក់​ពី​លើ​យន្តហោះ វា​អាច​នៅ​ផ្ទុះ​បាន។ យើង​ទទួល​បាន​គ្រាប់​ពី​ប្រជា​ពលរដ្ឋ​ស្ទើរ​រាល់​ថ្ងៃ​ក្នុង​មួយ​ថ្ងៃ​ពី ៤-១០ គ្រាប់​តែ​ភាគ​ច្រើន​ជា​ប្រភេទ​គ្រាប់ ៦០-៨០»។

លោក នៅ សុខន អធិការ​រង​នគរបាល ស្រុក​ខ្សាច់​កណ្ដាល បាន​ឲ្យ​ដឹង​ថា​គ្រាប់ MK 82 នេះ ត្រូវ​បាន​ក្រុម​កម្មករ​ជីក​ដី នៅ​តំបន់​រោងចក្រ 7NG ប្រទះ​ឃើញ កាល​ពី​ព្រឹក​ថ្ងៃ​សៅរ៍ ខណៈ​ក្រុម​កម្មករ​កំពុង​ជីក​ដី នៅ​ចំណុច ទួល​ក្រួស ឃុំ​សន្លុង ស្រុក​ខ្សាច់​កណ្ដាល។

លោក​បាន​បញ្ជាក់​ថា៖ «គ្រាប់​នេះ​ជា​ប្រភេទ MK 82 មាន​ទម្ងន់ ២៥០ គីឡូក្រាម​វា​មាន​ច្រែះ​ចាប់​តែ​វា​អាច​នៅ​ផ្ទុះ​ប្រសិន​បើ​យើង​បើក​អាត្រាក់ ឬ​អាប៊ុល​កិន​ពី​លើ»។

លោក នៅ សុខន បន្ត​ថា ក្រោយ​ពី​ទទួល​បាន​ព័ត៌មាន​នេះ លោក​អធិការ​ស្រុក បាន​បញ្ជូន​កម្លាំង​ជំនាញ​ចុះ​ទៅ​ពិនិត្យ​នៅ​កន្លែង ហើយ​កម្លាំង​ជំនាញ​បាន​ហ៊ុម​ខ្សែ​ព័ទ្ធ​ជុំវិញ កុំ​ឲ្យ​ប្រជា​ពលរដ្ឋ​ចូល​ទៅ​ក្បែរ ហើយ​បាន​រាយការណ៍​ទៅ​កម្លាំង​ស៊ីម៉ាក់​ដើម្បី​ឲ្យ​ចុះ​មក​ពិនិត្យ និង​បាន​ប្រគល់​ទៅ​ឲ្យ​ស៊ីម៉ាក់​កាល​ពី​ម្សិលមិញ៕

អត្ថបទគួរចាប់អារម្មណ៍