The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ក្រសួង​ការងារ​សន្យា​ចុះ​ទៅ​ដោះ​ស្រាយ​វិវាទ​នៅ​រោងចក្រ ជីមលី

មន្ត្រី​ក្រសួង​ការងារ​សន្យា​ចុះ​ទៅ​ដោះ​ស្រាយ​វិវាទ​នៅ​រោងចក្រ ជីមលី

មន្ត្រី​ក្រសួង​ការងារ​សន្យា​ចុះ​ទៅ​ដោះ​ស្រាយ​វិវាទ​នៅ​រោងចក្រ ជីមលី

ភ្នំពេញៈ មន្ដ្រី​ក្រសួង​ការងារ​នឹង​ចុះ​ទៅ​កាន់​រោងចក្រ​ជីម​លី នៅ​ក្នុង ខណ្ឌ​ពោធិ៍​សែន​ជ័យ នៅ​ព្រឹក​ថ្ងៃ​ព្រហស្បតិ៍​នេះ ដើម្បី​ធ្វើ​ការ​សម្រប​សម្រួល​ករណី​តវ៉ា​ទាមទារ​របស់​កម្មករ​បន្ទាប់​ពី​កម្មករ​ជាង ២ ពាន់​នាក់​បាន​ដង្ហែ​ក្បួន​មក​កាន់​ក្រសួង​កាល​ពី​ព្រឹក​ថ្ងៃ​ពុធ។

លោក សុំ សេន តំណាង​កម្មករ​ដែល​ចូល​ជួប​ជាមួយ​នឹង​មន្រ្តី​គណៈ​កម្មការ​ដោះ​ស្រាយ​វិវាទ​ការងារ​នៅ​ក្រសួង​ការងារ​បាន​ប្រាប់​ថា កម្មករ​សម្រេច​ចិត្ត​ដើរ អ្នក​ខ្លះ​ជិះ​រថយន្ត ម៉ូតូ និង​ម៉ូតូ​កង់​បី​ឆ្ពោះ​មក​ក្រសួង​ការងារ​ដែល​មាន​ចម្ងាយ​ជាង ២០ គីឡូម៉ែត្រ ដើម្បី​សុំ​ការ​អន្តរាគមន៍​ពី​ក្រសួង។

លោក​ថ្លែង​ថា៖ «កម្មករ​បាន​ចេញ​ដំណើរ​ពី​រោងចក្រ​ពី​ម៉ោង ៧ ព្រឹក ដោយ​ត្រូវ​សមត្ថកិច្ច​ឃាត់ ៤ ដង ប៉ុន្តែ​ពុំ​មាន​អ្វី​ជា​ឧបសគ្គ​នោះ​ទេ ដោយ​កម្មករ​បាន​ព្យាយាម​ជម្នះ​ដើរ​រហូត​មក​ដល់​ក្រសួង​បាន»។ លោក​ថា កម្មករ​បាន​បិទ​ទ្វារ​របង​មុខ​ក្រសួង​មិន​ឲ្យ​បុគ្គលិក​ចេញ​រហូត​មាន​ការ​សម្រប​សម្រួល និង​មក​ទទួល​ញត្តិ​ពី​កម្មករ។

លោក សុំ សេន បញ្ជាក់​ថា៖ «លោក វង្ស សុវណ្ណ ដែល​ជា​អនុ​ប្រធាន​គណៈ​កម្មការ​ដោះ​ស្រាយ​វិវាទ​ការងារ​បាន​ទទួល​ញត្តិ​ពួក​យើង ហើយ​លោក​ថា លោក​ឬ​មន្រ្តី​លោក​នឹង​ចុះ​ទៅ​កាន់​រោងចក្រ​នៅ​ព្រឹក​ស្អែក​នេះ​ដើម្បី​ជួប​ខាង​រោងចក្រ ដោះ​ស្រាយ​ជូន​កម្មករ»។

កម្មករ​បាន​សម្រេច​ចិត្ត​ចេញ​ពី​ក្រសួង​នៅ​ម៉ោង ២ រសៀល​ហើយ​ពួក​គេ​បាន​គំរាម​ធ្វើ​ការ​បិទ​ផ្លូវ​ជាតិ​លេខ ៤ បើ​មន្រ្តី​ក្រសួង​មិន​ចុះ​ជួយ​ដោះ​ស្រាយ​ជូន​កម្មករ។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​និយាយ​ថា កម្មករ​បាន​នាំ​គ្នា​ធ្វើ​ការ​តវ៉ា​ដោយ​សារ​រោងចក្រ​បញ្ឈប់​ជាង​ភ្លើង​មួយ​រូប​ដោយ​គ្មាន​មូល​ហេតុ ហើយ​ក្រុម​ហ៊ុន​ក៏​មិន​ឆ្លើយ​តប​នឹង​ការ​ដាក់​លិខិត​ជូន​ដំណឹង​ពី​ការ​តវ៉ា​ដែរ។

លោក​មាន​ប្រសាសន៍​ថា៖ «យើង​ដាក់​លិខិត​ជូន​ដំណឹង​មុន​មួយ​សប្តាហ៍ អំពី​ការ​តវ៉ា​នេះ ប៉ុន្តែ​ខាង​រោងចក្រ​មិន​បាន​ឆ្លើយ​តប​ថា​នឹង​ដោះ​ស្រាយ​ឬ​អត់​ទេ ជា​ហេតុ​នាំ​ឲ្យ​កម្មករ​ខឹង ក៏​នាំ​គ្នា​ផ្ទុះ​ការ​តវ៉ា​តែ​ម្តង»។

លោក ប៉ាវ ស៊ីណា បញ្ជាក់​ពី​ចំណុច​ដែល​កម្មករ​ទាម​ទារ​ទៅ​កាន់​រោងចក្រ​ថា​មាន ៨ ចំណុច រួម​មាន​ឲ្យ​ក្រុម​ហ៊ុន​ទទួល​យក​កម្មករ​ម្នាក់​ដែល​បញ្ឈប់​ឲ្យ​ចូល​ធ្វើ​ការ​វិញ ផ្តល់​បាយ​ថ្ងៃ​ត្រង់ ៤០០០ រៀល​ក្នុង ១ ថ្ងៃ​ផ្តល់​ប្រាក់​ធ្វើ​ដំណើរ​ឬ​ស្នាក់​នៅ ១៥ ដុល្លារ​ក្នុង ១ ខែ​ផ្តល់​លុយ​ព្រីម ១៨ ដុល្លារ​ក្នុង ១ ខែ។ល។

លោក សោម ពិសិដ្ឋ ប្រធាន​រដ្ឋបាល​រោងចក្រ ជីម​លី បាន​បដិសេធ​ធ្វើ​ការ​អធិប្បាយ​កាល​ពី​ម្សិល​មិញ៕

អត្ថបទគួរចាប់អារម្មណ៍