The Phnom Penh Post Search

Search form

Logo of Phnom Penh Post newspaper Phnom Penh Post - មេ​ទាហាន​ម្នាក់​ត្រូវ​គេ​កាប់​ និង​ព្រួត​វាយ​រហូត​ស្លាប់​ពេល​ចូល​ផ្ទះ​គេ​ទាំង​យប់




មេ​ទាហាន​ម្នាក់​ត្រូវ​គេ​កាប់​ និង​ព្រួត​វាយ​រហូត​ស្លាប់​ពេល​ចូល​ផ្ទះ​គេ​ទាំង​យប់

ជនសង្ស័យ ២ នាក់​មា និង​ក្មួយ​ក្រោយ​ពេល​សមត្ថកិច្ច​ឃាត់​ខ្លួន។
ជនសង្ស័យ ២ នាក់​មា និង​ក្មួយ​ក្រោយ​ពេល​សមត្ថកិច្ច​ឃាត់​ខ្លួន។ រូបថត ប៉ូលិស

មេ​ទាហាន​ម្នាក់​ត្រូវ​គេ​កាប់​ និង​ព្រួត​វាយ​រហូត​ស្លាប់​ពេល​ចូល​ផ្ទះ​គេ​ទាំង​យប់

បាត់ដំបងៈ មន្ត្រី​យោធា​ជាន់​ខ្ពស់​ម្នាក់​ត្រូវ​បាន​បុរស​ពីរ​នាក់​លប​កាប់​នឹង​ខ្វែវ​ពី​ក្រោយ​ខ្នង​ហើយ​ត្រូវ​មនុស្ស​មួយ​ហ្វូង​ទៀត​នាំ​គ្នា​ព្រួត​គ្នា​វាយ​រហូត​ស្លាប់​នៅ​ពេល​រំលង​អធ្រាត្រ​ដោយ​សង្ស័យ​ថា​ជា​ចោរ​ពេល​គាត់​បាន​លប​ចូល​ផ្ទះ​របស់​ពួកគេ។

តាម​កំណត់​ហេតុ​សមត្ថកិច្ច​ហេតុការណ៍​នេះ​បាន​កើត​នៅ​ម៉ោង​ជាង​ ១ រំលង​អធ្រាត្រ​ឈាន​ចូល​ថ្ងៃ​ទី ២៨ ខែ​វិច្ឆិកា ឆ្នាំ​ ២០១៥ ​នៅ​ភូមិ​កញ្ចាំ ឃុំ​ស៊ុង ស្រុក​សំឡូត ខេត្ត​បាត់ដំបង។ ជនរងគ្រោះ​ឈ្មោះ យឹម សុផល អាយុ ៤៨ ឆ្នាំ​ជា​មេបញ្ជាការ​កង​អនុសេនា​ធំ​ចំណុះ​ឲ្យ​វរសេនា​តូច​លេខ​ ៥២២ នៃ​កងពល​តូច​លេខ ៥២។ ឯ​ជន​បង្ក​ហេតុ និង​ជា​ម្ចាស់​ផ្ទះ​ឈ្មោះ ឆាយ បុល អាយុ ៣២ ឆ្នាំ និង​ម្នាក់​ទៀត​ត្រូវ​ជា​ឪពុកមា​បង្កើត​ឈ្មោះ អ៊ុន ថុន អាយុ ៤០ ឆ្នាំ។

អធិការ​ស្តីទី​ស្រុក​សំឡូត​លោក ម៉ែន រីន បាន​ឲ្យ​ដឹង​តាម​ចម្លើយ​របស់​ជន​បង្ក​ហេតុ​ទាំង​ពីរ​នាក់​ថា​នៅ​យប់​កើត​ហេតុ​ម៉ោង​ ១ និង​ ៣០ ​នាទី​រំលង​អធ្រាត្រ​ជនរងគ្រោះ​បាន​កាន់​ដំបង​មួយ​ដើរ​ចូល​ក្នុង​ផ្ទះ​របស់​ជន​បង្កហេតុ​រួច​លប​ឡើង​តាម​កាំជណ្តើរ​ទៅ​ខាង​លើ​ផ្ទះ​តែ​ដោយ​ឮ​សម្រិប​ជើង​ម្ចាស់​ផ្ទះ​ក៏​ស្រែក​សួរ​ប៉ុន្តែ​មិន​ឆ្លើយតប​ឡើយ។ ដោយ​មិន​ឮ​ឆ្លើយ​ម្ចាស់​ក៏​សង្ស័យ​ថា​ជា​ចោរ​រួច​ក៏​បាន​ទូរស័ព្ទ​ហៅ​ពូ​របស់​ខ្លួន​ដែល​នៅ​ផ្ទះ​ក្បែរ​ឲ្យ​ជួយ។

លោក​ ម៉ែន រីន បន្ត​ថា​បន្ទាប់ពី​ឪពុកមា​មក​ដល់​ដោយ​មាន​ទាំង​ដំបង​មក​ផង​នោះ​ជន​បង្ក​ដែល​ជា​ម្ចាស់​ផ្ទះ​បាន​ស្រែក​ខ្លាំង​ថា «ចោរៗ» រហូត​ផ្អើល​ដល់​អ្នក​ភូមិ និង​បាន​យក​ខ្វែវ​ហើយ​បាន​លប​កាប់​ជនរងគ្រោះ​ពី​ក្រោយ​ខ្នង​ត្រូវ​កញ្ចឹង​ក និង​ជើង​ធ្លាក់​ពី​ជណ្តើរ​មក​ដល់​ក្រោម។

លោក​ថា៖ «ទាំងនេះ​ជា​ចម្លើយ​ជន​បង្កហេតុ​ដោយសារ​តែ​យប់​ជ្រៅ​ពេក​ហើយ​ក្នុង​ផ្ទះ​នោះ​ងងឹត​មិន​មាន​សាក្សី​ណា​មួយ​អាច​សន្មត​ថា​មាន​រឿង​ហេតុ​ដូច​អ្វី​ដែល​ពួកគេ​បាន​និយាយ​នោះ​ទេ»។

លោក ណី ឈុននឿន មេ​បញ្ជាការ​​វរសេនា​តូច​លេខ ៥២២ នៃ​កងពល​តូច​លេខ ៥២ ឈរ​ជើង​នៅ​ចំណុច​អូររាំងខេន និង​ជា​ថ្នាក់ដឹកនាំ​ជនរងគ្រោះ​បាន​ឲ្យ​ដឹង​ដែរ​ថា​ក្រោយ​ជន​រងគ្រោះ​ធ្លាក់​ពី​លើ​ជណ្តើរ​​ឪពុកមា​ជន​បង្ក​ក៏​បាន​វាយ​នឹង​ដំបង​បន្ថែម​ទៀត​ចំណែក​សាច់ញាតិ​ជន​បង្កហេតុ​ដែល​រស់នៅ​ម្តុំ​នោះ​ក៏​មក​ជា​បន្តបន្ទាប់​ហើយ​បាន​ព្រួត​គ្នា​វាយ​ជនរងគ្រោះ​យ៉ាង​ដំណំ​។

លោក​បាន​បញ្ជាក់​ថា៖ «ពេល​ខ្ញុំ​ទៅ​ដល់​លោក សុផល នៅ​និយាយ​បាន​ខ្លះៗ​ដែរ​ដោយ​បាន​ផ្ដាំ​ឲ្យ​ជួយ​មើល​កូនៗ​របស់​គេ​ផង​ហើយ​ថា​គេ​មិន​បាន​ធ្វើ​ខុស​ទេ​ម៉េច​បាន​មក​វាយ​គេ​បែប​នោះ​លុះ​ប្រហែល ៣ ​នាទី​ក្រោយ​មក​គេ​ក៏​សន្លប់​លែង​ដឹង​ខ្លួន​តែ​ម្ដង​ទៅ»។

បើ​តាម​លោក ណី ឈុននឿន ជនរងគ្រោះ យឹម សុផល មាន​វិបត្តិ​ផ្លូវចិត្ត​ធ្ងន់ធ្ងរ​រយៈពេល​ ២ ឆ្នាំ​ចុងក្រោយ​នេះ​បន្ទាប់ពី​ប្រពន្ធ​គាត់​រត់​ចោល និង​បាន​ទុក​កូនស្រី​តូច​ពីរ​នាក់​ឲ្យ​គាត់​ដែល​បច្ចុប្បន្ន​ម្នាក់​មាន​អាយុ​ ៦ ​ឆ្នាំ​ និង​ម្នាក់​ទៀត ១០ ឆ្នាំ។

លោក​ថា​ តាំង​ពី​បែក​បាក់​ប្រពន្ធ​កាល​ណា​មក​ជនរងគ្រោះ​តែង​ផឹក​ស្រា​ញឹកញាប់​រហូត​ដល់​ធ្លាក់​ខ្លួន​ឈឺ​ម្តងៗ​តែ​គាត់​ដូចជា​មិន​ធ្លាប់​បាន​ទៅ​បង្ក​ជម្លោះ​ជាមួយ​នរណា​ឡើយ។

លោក ម៉ៅ ឆន មន្ត្រី​ប្រចាំការ​នៃ​អធិការដ្ឋាន​នគរបាល​ស្រុក​សំឡូត​បាន​ឲ្យ​ដឹង​ថា​ក្រោយពី​មាន​ហេតុការណ៍​នោះ​សមត្ថកិច្ច​ក៏​បាន​ឃាត់​ខ្លួន​ជន​បង្កហេតុ​ទាំង​ពីរ​នាក់​នោះ​ភ្លាមៗ​តាម​ដីកា​បង្គាប់​​របស់​តុលាការ។ ​លោក​ឲ្យ​ដឹង​ទៀត​ថា​ក្រោយ​ពេល​ឃាត់​ខ្លួន​ជន​បង្កហេតុ​បាន​សារភាព​ដោយ​មិន​លាក់​លៀម​ទេ​ដោយ​ពួកគេ​ព្រម​នៅ​ទទួល​ខុស​ត្រូវ​មិន​គេចវេះ​ពី​រឿង​នេះ​ឡើយ។

លោក​ថា​ សមត្ថកិច្ច​ឃាត់​ខ្លួន​ពួកគេ​ក៏​ដើម្បី​រក្សា​សុវត្ថិភាព​របស់​ពួកគេ​ផង​ដែរ។

ភ្នំពេញ​ប៉ុស្តិ៍​មិន​អាច​សុំ​ការ​ឆ្លើយតប​ពី​ព្រះរាជអាជ្ញា​លោក នួន សាន ដែល​ចេញ​ដីកា​ឃាត់​ខ្លួន​នោះ​បាន​ទេ​កាលពី​ម្សិលមិញ។

ករណី​នេះ​លោក ណី ឈុននឿន មេ​បញ្ជាការ​វរសេនា​តូច​លេខ ៥២២ បាន​ឲ្យ​ដឹង​ថា​លោក​បាន​កំពុង​ពិភាក្សា​ស្នើ​ទៅ​តុលាការ​អនុវត្ត​តាម​ច្បាប់​ផ្តន្ទាទោស​លើ​ជនដៃដល់​ និង​បង្គាប់​ទាមទារ​សំណង​នានា​ដើម្បី​ជួយ​ផ្គត់ផ្គង់​ដល់​កូនស្រី​ទាំង​ពីរ​របស់​ជនរងគ្រោះ៕

អត្ថបទគួរចាប់អារម្មណ៍