The Phnom Penh Post Search

Search form

Logo of Phnom Penh Post newspaper Phnom Penh Post - ម៉ូតូ​អូ​សរ៉ឺម៉ក​បុក​ជាមួយ​​​ឡាន​យី​ឌុប​​ស្លាប់​​បួន​នាក់​




ម៉ូតូ​អូ​សរ៉ឺម៉ក​បុក​ជាមួយ​​​ឡាន​យី​ឌុប​​ស្លាប់​​បួន​នាក់​

ម៉ូតូ​អូ​សរ៉ឺម៉ក​បុក​ជាមួយ​​​ឡាន​យី​ឌុប​​ស្លាប់​​បួន​នាក់​

កំពង់ចាមៈ មនុស្ស​៤​នាក់ ក្នុង​នោះ​មាន​ស្រី​ព ពោះ និង​កូន​ក្នុង​ផ្ទៃ​ផង​បាន​ស្លាប់ ក្នុង​គ្រោះថ្នាក់​ចរាចរណ៍​បុកគ្នា​រវាង​ម៉ូតូ​អូស​រ៉ឺម៉ក ជាមួយ​នឹង​រថយន្ត​យីឌុប​ដឹក​ស្រូវ​នៅ​លើ​ផ្លូវ​ជាតិ​លេខ៧ ក្នុង​ភូមិ​វិហារ ស្រុក​ត្បូង​ឃ្មុំ កាល​ពី​ព្រឹក​ថ្ងៃ​ទី៣ ខែ​មីនា ឆ្នាំ​២០១៣។

លោក សុខ សាវ័ន្ត អធិការរង​ស្រុក​ត្បូង​ឃ្មុំ​ឲ្យ​ដឹង​ពី​ម្សិល​មិញ​ថា ករណី​គ្រោះ​ថ្នាក់​ចរាចណ៍​ពីថ្ងៃ​ទី៣ មីនា ដែល​បណ្តាល​ឲ្យ​មាន​មនុស្ស​ស្លាប់​៤នាក់ រាប់​ទាំង​ទារក​ទើប​នឹង​កើត​នោះ​សមត្ថកិច្ច​កំពុង​តែធ្វើ​កំណត់​ហេតុ​ដើម្បី បញ្ជូន​ទៅ​តុលាការ ឯ​អ្នក​បើកបរ​ដែល​រត់​គេច​កំពុង​ស្វែង​រកចាប់​ខ្លួន។

លោកថ្លែងថា៖ «ភាគី​ជន​រងគ្រោះ បាន​បើក​ម៉ូតូ​អូស​រ៉ឺម៉ក​បុក​នឹង​រថយន្ត​ពេល​បើក​បញ្ច្រាស​ទិស​គ្នា តែ​តាម​ច្បាប់​ភាគី​រថយន្ត​ក៏​នៅ​ជាប់​បណ្តឹង​អាជ្ញានៅ​តុលា​ការ​ព្រោះ​យើង បុក​មនុស្ស​ស្លាប់​និង​ត្រូវ​ចេញ​សំណង ប្រសិន​បើ​រក​ឃើញ​ថា​មាន​កំហុស»។

លោកអធិការរង​រំឭក​ថា ជន​រង​គ្រោះ​ស្លាប់ មាន​ឈ្មោះ នួន ឆុន ភេទ​ប្រុស អាយុ​៥១​ឆ្នាំ ជា​អ្នក​រត់​ម៉ូតូ​ឌុប ស្នាក់​នៅ​ភូមិ​បឹង​កំពឹស ឃុំ​ទួល​សុភី ស្រុក​អូររាំង​ឪ ខេត្ត​កំពង់ចាម បើក​ម៉ូតូ​ម៉ាកវេវ​ពណ៌​ក្រហម និង​ស្ត្រី​ឈ្មោះ សៀង សន អាយុ​៦៣ឆ្នាំ ជា​ម្តាយ​ស្រី្ត​ឈ្មោះ អាន ហំ អាយុ​៣១​ឆ្នាំ ដែល​ពពោះ​គ្រប់ខែ មាន​លំនៅ​ភូមិ​ទួល​សុពណ៌ ឃុំ​ទួល​សុភី ស្រុក​អូររាំង​ឪ ខេត្ត​កំពង់ចាម និង​កូន​ក្នុង​ផ្ទៃ​ដែល​កើត​មក​ក៏​បាន​ស្លាប់​ដែរ។

តាមសាក្សី​នៅ​កន្លែង​កើត​ហេតុថា គេ​បាន​ឃើញ​ម៉ូតូ​រ៉ឺម៉ក​ជន​រងគ្រោះ​នៅ​ម៉ោង​ប្រមាណ​ជិត​៦ព្រឹក​ធ្វើ​​ដំណើរ​តាម​បណ្តោយ​ផ្លូវ​ជាតិ លេខ៧ ពី​ស្រុក​អូររាំង​ឪ សំដៅ​ទៅ​មន្ទីរពេទ្យ​ក្រុង​កំពង់ចាម។ មក​ដល់​ចំណុច​កើត​ហេតុ​ស្រ្តី​មាន​ផ្ទៃ​ពោះ​នោះ បាន​ស្រែក​យំ​ខ្លាំងៗ​ឮ​ដល់​អ្នក​នៅ​ក្បែរ​ផ្លូវ​នោះក៏នាំ​គ្នា​ផ្អើល​មើល ខណៈ​នោះ​អ្នក​បើក​ម៉ូតូ​ងាក​ទៅ​ក្រោយ ហើយ​ក៏​រេ​ចង្កូត​ចូល​រថយន្ត​យីឌុប​ផ្ទុក​ស្រូវ​ពេញ កំពុង​បើក​បញ្ច្រាស​ទិស​គ្នា ចំពី​មុខ​មួយ​ទំហឹង​តែ​ម្ដង។

លោកបន្តថា ភ្លាមៗ​នោះ​ស្ត្រី​ជាម្តាយ​និងម្ចាស់​ម៉ូតូ​បាន​ស្លាប់​នឹង​កន្លែង សមត្ថកិច្ច​នគរបាល​ប៉ុស្តិ៍​និង​ប្រជាពលរដ្ឋ​អម​ផ្លូវ​បាន​ហៅ​រថយន្ត ពេទ្យ​បង្អែក​ស្រុក​ត្បូង​ឃ្មុំ​មក​ជួយ​ស្ត្រី​ពោះ​ធំ ប្រហែល​៥​នាទី​ស្រ្តី​ពពោះ​ក៏​កើត​កូន​នៅ​លើ​ឡាន​​តែ​មិន​បាន​ប៉ុន្មាន​នាទី​ផង ទារក​នោះ​ក៏​ស្លាប់ ​ឯ​ម្តាយ​ក៏​ស្លាប់​ដែរ ពេល​ដឹក​ទៅ​​ដល់​មន្ទីរ​ពេទ្យ​ដោយសារ​របួស​ធ្ងន់ធ្ងរ។

លោក​​អធិការ​រង​ប្រាប់​ថា ករណី​គ្រោះថ្នាក់​ចរាចរណ៍​នេះ​បើតាម​កំណត់​ហេតុ​សមត្ថកិច្ច​ជំនាញ​និង​សាក្សី​នៅ​កន្លែង​កើត​ហេតុ​បញ្ជាក់​ថា ខាង​ភាគី​ជន​រងគ្រោះ​បាន​បើក​ម៉ូតូ​រ៉ឺម៉ក​ទៅ​បុក​រថយន្ត​ដោយ​ការ ធ្វេស​ប្រហែស តែតាម​ច្បាប់​ខាង​ម្ចាស់​រថយន្ត​ត្រូវ​ចេញ​សំណង​ទៅ​ភាគី​រង​គ្រោះ ព្រោះ​បាន​បង្ក​ឲ្យ​មនុស្ស​ស្លាប់។

ឯរថយន្ត​និងម៉ូតូ​រ៉ឺម៉ក ត្រូវ​ខាង​សមត្ថកិច្ច​នគរបាល​ចរាចរ​នាំ​យក​ទៅ​រក្សា​ទុក​នៅ​អធិការ ដ្ឋាន​នគរបាល​ស្រុក​ត្បូង​ឃ្មុំ ដើម្បី​រង់ចាំ​ការ​ដោះស្រាយ៕

អត្ថបទគួរចាប់អារម្មណ៍