The Phnom Penh Post Search

Search form




Logo of Phnom Penh Post newspaper Phnom Penh Post - ម្ចាស់​ហាង​ម៉ាស្សា​វ៉ៃ​សិច​នៅ​ប៉ោយ​ប៉ែត​ត្រូវ​ឃុំ​ខ្លួន




ម្ចាស់​ហាង​ម៉ាស្សា​វ៉ៃ​សិច​នៅ​ប៉ោយ​ប៉ែត​ត្រូវ​ឃុំ​ខ្លួន

ម្ចាស់​ហាង​ម៉ាស្សា​វ៉ៃ​សិច​នៅ​ប៉ោយ​ប៉ែត​ត្រូវ​ឃុំ​ខ្លួន

ប៉ោយប៉ែតៈ ស្រ្តី​សង្ស័យ​ជា​មេបន​និង​ជា​ម្ចាស់​ហាង​ម៉ាស្សា​ដែល​កូន​ឈ្នួល​ប្តឹង​ចោទ​ថា បង្ខំឲ្យ​រួមភេទ​ជាមួយ​ភ្ញៀវ​គ្មាន​ពេល​សម្រាក​បន្ទាប់​ពី​បាន​ឃាត់ ខ្លួន​ក្នុង​ហាង​នៅ​ក្រុង​ប៉ោយ​ប៉ែត ឥឡូវ​ត្រូវ​ស្នង​ការ​ខេត្ត​បន្ទាយ​មាន​ជ័យ​បញ្ជូន​ទៅ​ឃុំ​​នៅ​ពន្ធនាគារ​ខេត្ត។

លោក លឺ ចាន់​ដារា នាយ​រង​ការិយា​ល័យ​ប្រឆាំង​ការ​ជួញ​ដូរ​មនុស្ស​និង​ការពារ​អនីតិ​ជន​ខេត្ត​ឲ្យ​ដឹង​ថា ស្រ្តី​ជា​មេបន​ត្រូវ​សមត្ថកិច្ច​បញ្ជូន​ទៅ​ឃុំ​បណ្តោះ​អាសន្ន​នៅ ពន្ធនាគារ​ខេត្ត​បន្ទាយ​មាន​ជ័យ​កាល​ពី​ថ្ងៃ​ទី​២៣ កុម្ភៈ បន្ទាប់​មាន​ពាក្យ​បណ្តឹង​ពីនារី​រងគ្រោះ។

លោកប្រាប់ថា៖​«ស្រ្តី​ជា​មេបន​ត្រូវ​សមត្ថកិច្ច​កសាង​សំណុំ​រឿង​និង​ចោទ​ប្រកាន់​ពី​បទ​សញ្ចារ​កម្ម​ព្រោះ​ត្រូវ​កូន​ចៅ​ចោទ​ដូចៗ​គ្នា​ថា​បាន​បង្ខំ​ពួកគេ​ឲ្យ​រួម ​ភេទ​ជាមួយ​ភ្ញៀវ​ដោយ​ជ្រក​ក្រោម​ស្លាក​ម៉ាស្សា តែ​ប៉ុណ្ណោះ»។

លោក អ៊ុំ សុផល អធិការ​ក្រុង​ប៉ោយ​ប៉ែត​រំឭក​ឲ្យ​ដឹង​ថា ស្រ្តី​មេបន​ជាប់​ចោទ​ឈ្មោះ ស៊ិន សោភា​អាយុ​៣០​ឆ្នាំ ជា​ថៅកែ​ហាង​ម៉ាស្សា​ហេង​លាភ នៅ​ភូមិ​បាលិលេយ្យ​សង្កាត់​-ក្រុង​ប៉ោយ​ប៉ែត ឯ​ស្រ្តី​រង​គ្រោះ​ជាដើម​បណ្តឹង​ឈ្មោះ យ៉ង់ ចាន់​ធឿន អាយុ​៣១​ឆ្នាំ​បាន​ប្តឹង​ចោទ​ថា​បាន​បង្ខំ​នាង​ឲ្យ​រួមភេទ​ជា​មួយ​ភ្ញៀវ​ ជាច្រើន​ដង១​ថ្ងៃៗ។

លោកបន្ត​ឲ្យដឹងថា មុន​សមត្ថកិច្ច​ឃាត់​ខ្លួន​ស្រ្តីជាប់​ចោទ តាម​ពាក្យ​បណ្តឹង​នោះ សមត្ថកិច្ច​ក៏​បាន​ចុះ​ស៊ើបសួរ ស្រ្តី​ចំនួន​៧នាក់​ទៀត នៅ​ក្នុង​ហាង​ម៉ាស្សា​នោះ ដើម្បី​ដាក់​បន្ទុក។ លោកថា ស្រ្តី​ទាំង៧នាក់​នោះ បាន​ឆ្លើយ​ដូចៗ​គ្នា​ថា​«ហាង​ម៉ាស្សា​នោះ​មាន​បង្កប់​ស្រ្តី​បម្រើ​ផ្លូវ​ភេទ ទើប​សម្រេច​ឃាត់​ខ្លួន​ស្រ្តី​ជាប់​ចោទ»។

លោក​ថ្លែង​ថា ​ក្នុង​ពាក្យ​បណ្តឹង​ស្រ្តី​រងគ្រោះ​ប្តឹង​ចោទ​ថៅកែ​ស្រី​ថា បាន​បង្ខំ​នាង​ឲ្យ​រួមភេទ​ជាមួយ​ភ្ញៀវ​ជាច្រើន​ដង​ក្នុង​១ថ្ងៃៗ ទោះ​នាង​មិន​ស្រួល​ខ្លួន​និង​សុំ​សម្រាក​ក៏​គេ​មិន​ព្រម​ដែរ មាន​ពេល​ខ្លះ​នាង​ត្រូវ​ទទួល​ភ្ញៀវ​ទាំង​ឈឺ​ក៏​មាន​ព្រោះខ្លាច​ស្រ្តី មេបន​ធ្វើ​បាប។ ក្នុង​បណ្តឹង​ស្រ្តី​រងគ្រោះ​មិន​​ទាមទារ​សំណង​ជា​ប្រាក់​ទេ តែ​សុំ​ឲ្យច្បាប់​ដាក់​ទោស​ស្រ្តី​ជាប់​ចោទ​ទៅ​តាម​ទំហំ​ដែល​នាង​បាន​ប្រព្រឹត្ត។

លោក ថា តាម​សម្តី​ស្រ្តី​រង​គ្រោះ​ថា​ មុន​នាង​មក​បម្រើការ​ក្នុង​ហាង​ម៉ាស្សា គឺស្រ្តី​ជាប់​ចោទ​បាន​ទៅ ​លួង​លោមឲ្យ​ប្រាក់​ខែ​ច្រើន​ហើយ​ប្រាប់​ថា ​គ្រាន់​តែ​​ធ្វើ​ជា​អ្នក​ម៉ា​ស្សា​ឲ្យ​គេ​ទេ​ ខណៈនាង​កំពុង​ធ្វើ​ការ​នៅ​ទី​ក្រុងភ្នំពេញ​ ហើយ​ពេល​ទៅ​ដល់​ ស្រ្តី​នោះ​ ក៏​ឲ្យ​នាង​ខ្ចី​លុយ​មួយ​លាន​រៀល ​តែ​ក្រោយ​មក​ក៏​ចោទ​ថា​ នាង​ជំពាក់​ប្រាក់​មិន​សង​និង​បង្ខំ​នាង​ឲ្យ​រួមភេទ​ជា​មួយ​ភ្ញៀវ​ទៅវិ​ញ​ ដើម្បី​បាន​ប្រាក់​សង​គេ។​ចំពោះ​ប្រាក់​ដែល​នាង​ខំ​រក​បាន​ពី​ការ​រួម​ភេទ​ ជា​មួយ​ភ្ញៀវ​ម្តង​ៗ​គេ​កំណត់​យក​មួយ​ម៉ឺន​រៀល​។

លោក​​បន្ត​ថា​ ​ហាង​ម៉ាស្សា​ជួល​គេ​និង​ទើប​តែ​បើក​បាន​ជាង​១ខែ​នេះ ក្រោយ​ឃាត់​ខ្លួនថៅ​កែ​ហាង​ឃុំ ​ស្រ្តី​បម្រើការ​មិន​បាន​ឃាត់​ខ្លួន​ទេ ​សមត្ថកិច្ច​ក៏បាន​​ឲ្យបិ​ទ​និង​ប្រគល់​ឲ្យ​ម្ចាស់​ដើម​វិញ​៕

អត្ថបទគួរចាប់អារម្មណ៍