The Phnom Penh Post Search

Search form

Logo of Phnom Penh Post newspaper Phnom Penh Post - ម្តាយ​តៃកុង​ឡាន​ស្លាប់​ប្តឹង​មន្ត្រី​រដ្ឋបាល​ព្រៃឈើ​ពី​បទ​បង្ក​ឃាតកម្ម

ម្តាយ​តៃកុង​ឡាន​ស្លាប់​ប្តឹង​មន្ត្រី​រដ្ឋបាល​ព្រៃឈើ​ពី​បទ​បង្ក​ឃាតកម្ម

ម្តាយ​តៃកុង​ឡាន​ស្លាប់​ប្តឹង​មន្ត្រី​រដ្ឋបាល​ព្រៃឈើ​ពី​បទ​បង្ក​ឃាតកម្ម

ឧត្ដរ​មាន​ជ័យៈ សាលា​ដំបូង​ខេត្ដ​ឧត្ដរ​មាន​ជ័យ កំពុង​ស៊ើប​អង្កេត​លើ​បណ្ដឹង​ស្ត្រី​ម្នាក់​ដែល​ប្តឹង​ចោទ​នាយ​រង​ផ្នែក​រដ្ឋបាល​ព្រៃ​ឈើ​អន្លង់​វែង​និង​គូកន​ពី​បទ​មាន​ចេតនា​សម្លាប់​កូន​ប្រុស​គាត់។

លោក​កូយ កាន់យ៉ា ព្រះ​រាជ​អាជ្ញា​អម​សាលា​ដំបូង​ខេត្ដ​នេះ​ប្រាប់​ភ្នំពេញ ប៉ុស្តិ៍​ពី​ម្សិលមិញ​ថា អ្នក​ស្រី ហេង ស៊ុននី អាយុ​៦០​ឆ្នាំ​នៅ​ភូមិ​វត្ត​បូព៌ សង្កាត់​សាលា​កំរើក​ក្រុង-ខេត្ត​សៀមរាប បាន​ដាក់​ពាក្យ​ប្ដឹង​មក​តុលាការ​ខេត្ត​ឧត្តរ​មាន​ជ័យ​ពី​សប្ដាហ៍​មុន ដោយ​ចោទ​ប្រកាន់​ទៅ​លើ​នាយ​រង​ផ្នែក​រដ្ឋបាល​ព្រៃ​ឈើ​អន្លង់​វែង​និង​បក្ខពួក​ពី​បទ​«បង្ក​ឃាតកម្ម​ដោយ​ចេតនា​លើ​កូន​ប្រុស​គាត់»។

លោក​ថា បណ្ដឹង​នោះ​អ្នក​ស្រី ស៊ុននី ថា កូន​ប្រុស​គាត់​ស៊ី​ឈ្នួល​បើក​ឡាន​ដឹក​ឈើ​ឲ្យ​គេ ហើយ​ក្រឡាប់​ស្លាប់​ពេល​កម្លាំង​រដ្ឋបាល​ព្រៃឈើ​នៅ​អន្លង់​វែង​បើក​ឡាន​ប្រដេញ​បុក និង​បាន​ប្រើ​អាវុធ​បាញ់​បួន​គ្រាប់។ លោក​បន្ត​ថា​៖​«តុលាការ​កំពុង​តែ​ស៊ើប​អង្កេត​ស្រាវជ្រាវ​រឿង​នេះ​»។

លោក ឡឹក សុជាតា នាយ​រង​ផ្នែក​រដ្ឋបាល​ព្រៃ​ឈើ​អន្លង់​វែង មិន​អាច​ទាក់​ទង​បាន​ទេ។ ប៉ុន្តែ​លោក ទៀង ដាវិទ្យ ប្រធាន​រដ្ឋបាល​ព្រៃ​ឈើ​ខេត្ត​ឧត្តរ​មាន​ជ័យ​ថា លោក​បាន​ដឹង​រឿង​ប្តឹង​ប្តល់​នេះ តែ​លោក​គ្មាន​អ្វី​និយាយ​ទេ​ទុក​ឲ្យ​សមត្ថកិច្ច​តុលាការ​ស៊ើប​អង្កេត​ស្រាវជ្រាវ​ទៅ​ចុះ។

លោក វង្ស សុភ័ក្ដិ មេ​ឃុំ​អន្លង់​វែង បាន​ប្រាប់​ដែរ​ថា កាល​ពីព្រឹក​ថ្ងៃ​ទី០៣ ខែ​ឧសភា កម្លាំង​រដ្ឋបាល​ព្រៃ​ឈើ​បាន​ប្រដេញ​ឡាន​ដឹក​ឈើ​គ្រញូង​និង​មាន​ឮ​ស្នូរ​ផ្ទុះ​អាវុធ​បួន​គ្រាប់​បន្ទាប់​មក​គេ​ឃើញ​រថយន្ត​ដឹក​ឈើ​គ្រញូង​ផ្ទុះ​បែក​កង់​ក្រឡាប់​បណ្ដាល​ឲ្យ​អ្នក​បើក​បរ​ខ្ទាត​ចេញ​ពី​ក្នុង​ឡាន​ស្លាប់​នៅ​នឹង​កន្លែង។

លោក​បន្ត​ថា៖​«ប៉ែន្តែ​ក្រោយ​ពី​ការ​ចុះ​ពិនិត្យ​សាក​សព សមត្ថកិច្ច​ថា​តៃកុង​ស្លាប់​ដោយ​គ្រោះថ្នាក់​ចរាចរណ៍​បាក់​ក​ស្លាប់​ខ្លួន​ឯង»។

ប៉ុន្តែ​អ្នក​ស្រី ហេង ស៊ុននី ប្រាប់​បណ្ដាញ​ព័ត៌មាន Online ថា គឺ​គេ​បើក​ឡាន​ដេញ​បុក​និង​បាញ់​ឡាន​កូន​គាត់ រហូត​បែក​កង់​ក្រឡាប់​ទើប​បណ្ដាល​ឲ្យ​កូន​គាត់​ខ្ទាត​ចេញ​ពី​ឡាន​និង​ត្រូវ​គេ​នាំ​គ្នា​វាយ​កូន​គាត់​ដល់​ស្លាប់​ផង។

លោក ងួន ធីរិទ្ធ មេ​បញ្ជាការ​ប៉េអឹម​ស្រុក​អន្លង់​វែង អះអាង​ថា តាម​ពលរដ្ឋ​នៅ​ក្បែរ​នោះ​ថា​មាន​ការ​ផ្ទុះ​អាវុធ​មុន​ឡាន​ក្រឡាប់​ធ្លាក់​ផ្លូវ។ ប៉ុន្តែ​សមត្ថកិច្ច​រក​មិន​ឃើញ​មាន​ស្នាម​គ្រាប់​កាំភ្លើង​នៅ​លើ​រថយន្ត​ទេ ក្រៅ​ពី​ឃើញ​បែក​កង់​ក្រោយ​ហើយ​អ្នក​បើក​បរ​បាក់​ឆ្អឹង​កញ្ចឹង​ក​ស្លាប់​។ លោក​បន្ត​ថា តាម​ដឹង​ពី​នគរបាល​ស្រុក​ដែល​កោះ​ហៅ​លោក ឡឹក សុជាតា ឲ្យ​បំភ្លឺ​ករណី​នេះ​ឮ​ថា គាត់​ជិះ​ឡាន​តាកូម៉ា​ដេញ​ឡាន​ដឹក​ឈើ​គ្រញូង​ប៉ង​បើក​កៀរ​ឱ្យ​ឡាន​នោះ​ឈប់​តែ​មិន​បាន​បាញ់​ឡាន​នោះ​ទេ​។ ប៉ុន្តែ​ថា អ្នក​បាញ់​នោះ​គឺជា​ទាហាន​រួម​ដំណើរ​ជាមួយ​គាត់។

លោក ស៊ុយ សេង អធិការ​នគរបាល​ស្រុក​អន្លង់វែង បាន​បញ្ជាក់​ថា៖«ករណី​នេះ​កំពុង​ស្ថិត​ក្នុង​ការ​ស៊ើប​អង្កេត​ស្រាវជ្រាវ​បន្ត​»៕

អត្ថបទគួរចាប់អារម្មណ៍