The Phnom Penh Post Search

Search form




Logo of Phnom Penh Post newspaper Phnom Penh Post - ម្តាយ​និង​កូន​រង​របួស​ដោយ​ទឹក​អាស៊ីត​ក្នុង​ជម្លោះ​លក់​ដូរ​ជិត​គ្នា

ម្តាយ​និង​កូន​រង​របួស​ដោយ​ទឹក​អាស៊ីត​ក្នុង​ជម្លោះ​លក់​ដូរ​ជិត​គ្នា

ស្ត្រី​ជា​ម្តាយ​រង​ទឹក​អាស៊ីត​របួស​ធ្ងន់​ធ្ងរ​អាច​ខូច​ភ្នែក។
ស្ត្រី​ជា​ម្តាយ​រង​ទឹក​អាស៊ីត​របួស​ធ្ងន់​ធ្ងរ​អាច​ខូច​ភ្នែក។ រូប សហការី

ម្តាយ​និង​កូន​រង​របួស​ដោយ​ទឹក​អាស៊ីត​ក្នុង​ជម្លោះ​លក់​ដូរ​ជិត​គ្នា

តាកែវៈ ស្ត្រី​ពីរ​នាក់​ម្តាយ និង​កូន​ស្រី​បាន​រង​របួស​ធ្ងន់​ក្នុង​ករណី​ជះ​ទឹក​អាស៊ីត​ពី​ជន​ដៃ​ដល់​កាល​ពី​ព្រឹក​ព្រលឹម​ថ្ងៃ​ពុធ​ម្សិល​មិញ។ ហេតុ​ការណ៍​នេះ​កើត​ឡើង​ក្នុង​ផ្សារ​ទន្លាប់ ស្រុក​គិរីវង់ ខេត្ត​តាកែវ ប៉ុន្តែ ជន​សង្ស័យ​ពីរ​នាក់​ដែល​ជា​បង​ប្អូន​បង្កើត​បាន​រត់​គេច​ខ្លួន​បាត់។

លោក គាំ សុថា មន្រ្តី​នគរបាល ស្រុក​គិរីវង់ បាន​និយាយ​កាល​ពី​ម្សិល​មិញ​ថា ហេតុ​ការណ៍​ជះ​ទឹក​អាស៊ីត​នេះ​កើត​ឡើង​ដោយ​សារ​ជម្លោះ​រវាង​អាជីវករ​ដែល​មាន​តូប​លក់​ដូរ​នៅ​ទល់​មុខ​គ្នា​ក្នុង​ផ្សារ​ទន្លាប់ ដែល​ធ្វើ​ឲ្យ​ស្រ្តី​ម្នាក់ និង​កូន​ស្រី​អាយុ​ទើប​តែ ២ ឆ្នាំ​រង​របួស​ធ្ងន់។

លោក​បាន​បន្ត​ថា ស្រ្តី​ឈ្មោះ មួង ស្រីមុំ អាយុ ៣១​ឆ្នាំ បាន​រង​របួស​ពេញ​ខ្លួន និង​កូន​ស្រី​ឈ្មោះ សុខ ម៉េត ម៉ូលីតា អាយុ ២ ឆ្នាំ​រង​របួស​ពេញ​មុខ និង​ដង​ខ្លួន និង​បុរស​ដែល​ជា​ប្តី​ឈ្មោះ លុយ សុវណ្ណារ័ត្ន អាយុ ៣១​ឆ្នាំ មិន​បាន​រង​របួស​ដោយ​អាស៊ីត​ទេ តែ​រង​របួស​ស្រាល​ដោយ​ការ​វាយ​តប់​ពី​ជន​ដៃ​ដល់។

លោក គាំ សុថា បាន​រៀប​រាប់​ពី​ដំណើរ​រឿង​ថា៖ «នៅ​ម៉ោង ៦ និង ៥០ នាទី​ព្រឹក បុរស​ជា​ប្តី​ស្រ្តី​រង​គ្រោះ​កំពុង​តែ​រៀបចំ​អីវ៉ាន់​លក់​ជា​ធម្មតា​ដូច​សព្វ​ដង​ស្រាប់​តែ​បុរស​ជា​ជន​ដៃ​ដល់​បាន​មក​រក​រឿង​ឈ្លោះ​ប្រកែក​គ្នា ដែល​ពួក​គេ​មាន​រឿង​ប្រកែក​គ្នា​ម្តង​រួច​ហើយ​កាល​ពី​ថ្ងៃ​អង្គារ ពី​ការ​លក់​ដូរ»។

លោក​បន្ត​ទៀត​ថា ជម្លោះ​នោះ​បាន​ធ្វើ​ឲ្យ​ខាង​ជន​ដៃ​ដល់​វាយ​តប់​គ្នា​ជាមួយ​នឹង​បុរស​ដែល​ជា​ប្តី​ជន​រង​គ្រោះ​រហូត​ពក​ក្បាល។ កំពុង​តែ​ឈ្លោះ​ប្រកែក​គ្នា ស្រាប់​តែ​នារី​ជា​ជន​ដៃ​ដល់​ម្នាក់​ទៀត​ដែល​ជា​ប្អូន​ស្រី​បង្កើត​របស់​បុរស​ខាង​លើ​បាន​យក​ទឹក​អាស៊ីត​ដែល​លាក់​ទុក​ក្នុង​ធុង​ស្ពេ​ត្រូល​មក​ជះ​សំដៅ​ទៅ​លើ​ស្រ្តី​រង​គ្រោះ​ដែល​កំពុង​តែ​បញ្ចុក​បាយ​ព្រឹក​ដល់​កូន​ស្រី ធ្វើ​ឲ្យ​រង​របួស​ធ្ងន់។

កូន​ស្រី​ជន​រង​គ្រោះ​ដែល​មិន​ដឹង​អី​ក៏​រង​របួស​ធ្ងន់​ធ្ងរ​ដែរ។
កូន​ស្រី​ជន​រង​គ្រោះ​ដែល​មិន​ដឹង​អី​ក៏​រង​របួស​ធ្ងន់​ធ្ងរ​ដែរ។ រូប សហការី

លោក គាំ សុថា បាន​ឲ្យ​ដឹង​ទៀត​ថា ជន​ដៃ​ដល់​ទាំង​ពីរ​ជា​បង​ប្អូន​បង្កើត​គ្នា មាន​ឈ្មោះ បេង មាស អាយុ ២៨​ឆ្នាំ ដែល​ជា​បង​ប្រុស​របស់​កញ្ញា បេង លក្ខិណា អាយុ ២១​ឆ្នាំ។ សមត្ថ​កិច្ច​កំពុង​តាម​ស្វែង​រក​ចាប់​ខ្លួន​ខណៈ​ពួក​គេ​គេច​ខ្លួន​ភ្លាមៗ​បន្ទាប់​ពី​ធ្វើ​សកម្ម​ភាព​ទៅ​លើ​ជន​រង​គ្រោះ​រួច​មក។

ក្រុម​គ្រួសារ​ជន​រង​គ្រោះ​ក៏​បាន​ដាក់​បណ្តឹង​មក​សមត្ថកិច្ច​រួច​ហើយ​ផង​ដែរ ដោយ​ប្តឹង​ឲ្យ​ផ្តន្ទាទោស​ទៅ​តាម​ផ្លូវ​ច្បាប់​យ៉ាង​ធ្ងន់​ធ្ងរ​បំផុត។

លោក គាំ សុថា ថ្លែង​ថា៖ «វា​អាច​ជា​គម្រោង​គិត​ទុក​ជា​មុន​របស់​ជន​ដៃ​ដល់ ដោយ​សារ​តែ​ទឹក​អាស៊ីត​ត្រូវ​បាន​រៀបចំ​រួច​ជា​ស្រេច​ទុក​នៅ​ក្នុង​តូប​ពួក​គេ ហើយ​នេះ​ជា​ករណី​ជះ​ទឹក​អាស៊ីត​លើក ទី១ ក្នុង ឆ្នាំ​២០១៤ នេះ​បន្ទាប់​ពី​បាន​កើត​ឡើង​ម្តង កាល​ពី ២ ឆ្នាំ​មុន»។

លោក​បន្ត​ថា សមត្ថកិច្ច​មិន​អាច​ឲ្យ​ជន​ដៃ​ដល់​ទាំង​ពីរ​នេះ​រួច​ពី​សំណាញ់​ច្បាប់​បាន​ទេ។

លោក ពៅ សុខណា បុគ្គលិក​មន្ទីរពេទ្យ​បង្អែក ស្រុក​គិរីវង្ស កាល​ពី​ថ្ងៃ​ម្សិល​មិញ​បាន​ឲ្យ​ដឹង​ដែរ​ថា ជន​រង​គ្រោះ​ម្តាយ និង​កូន​ត្រូវ​បញ្ជូន​មក​កាន់​មន្ទីរពេទ្យ​ដើម្បី​ជួយ​សង្គ្រោះ​បឋម បន្ទាប់​មក​ខាង​មន្ទីរពេទ្យ​បាន​ទាក់​ទង​ទៅ​កាន់​អង្គការ​ជួយ​ជន​រង​គ្រោះ​ដោយ​អាស៊ីត​មក​ព្យាបាល​នៅ​ទីក្រុង​ភ្នំពេញ។

លោក សុខណា បញ្ជាក់​ថា៖ «អ្នក​រង​គ្រោះ​ត្រូវ​បាន​អង្គការ​ជួយ​ជន​រង​គ្រោះ​ដោយ​អាស៊ីត​យក​ទៅ​ព្យាបាល​នៅ​ពេទ្យ​កៀន​ឃ្លាំង​ភ្នំពេញ​រួច​ហើយ។ ស្រ្តី​រង​ការ​រលាក​ខ្លួន​និង​មុខ​ប្រមាណ​ជា ២៥ ភាគរយ​អាច​ប៉ះ​ពាល់​ភ្នែក​ខាង​ស្តាំ​ផង​ដែរ ចំណែក​កូន​ស្រី​ប៉ះ​ដុំៗ​លើ​ផ្ទៃ​មុខ​និង​ដង​ខ្លួន​ដោយ​សារ​ការ​ខ្ទាត​ពី​ម្តាយ»៕

អត្ថបទគួរចាប់អារម្មណ៍