The Phnom Penh Post Search

Search form

Logo of Phnom Penh Post newspaper Phnom Penh Post - រង្វាន់​១​ពាន់​ដុល្លារ ឲ្យ​សាក្សី​បង្ហាញ​ឃាតក​សម្លាប់​ស្ត្រី​បារាំង




រង្វាន់​១​ពាន់​ដុល្លារ ឲ្យ​សាក្សី​បង្ហាញ​ឃាតក​សម្លាប់​ស្ត្រី​បារាំង

រង្វាន់​១​ពាន់​ដុល្លារ ឲ្យ​សាក្សី​បង្ហាញ​ឃាតក​សម្លាប់​ស្ត្រី​បារាំង

កំពតៈ សមត្ថកិច្ច​ខេត្ត​កំពត​ប្រកាស​ផ្តល់​រង្វាន់​ជា​ប្រាក់​ចំនួន​មួយ​ពាន់ ដុល្លារ​ទៅ​ដល់​សាក្សី​ណា​ដែល​ដឹង​និង​ស្គាល់​ជន​សង្ស័យ​ជា​ឃាតក​ដែល​បាន សម្លាប់​ស្រ្តី​ទេសចរ​ជាតិ​បារាំង​កាល​ពី​អំឡុង​ខែ​កុម្ភៈ​ឆ្នាំ​២០១៣ ដែល​រហូត​មក​ដល់​ពេល​នេះ​ទោះ​មាន​ការ​ព្យាយាម​ពី​សមត្ថកិច្ច​ខេត្ត​ និង​ខាង​នគរបាល​បច្ចេក​ទេស​មក​ពី​ភ្នំពេញ​ក្តី ក៏​នៅ​មិន​ទាន់​រក​ឃើញ​តម្រុយ​ណា​មួយ​បាន​ច្បាស់​លាស់​នៅឡើយ។

លោក អ៊ិន ជីវ៉ា ស្នងការ​រងនគរបាល​ខេត្ត​ឲ្យ​ដឹង​ថា ជុំវិញ​ការ​ស្លាប់​របស់​ស្រ្តី​ជា​ទេសចរ​ជាតិ​បារាំង​រហូត​មក​ដល់​ពេល​នេះ​សមត្ថកិច្ច​បាន​ដុត​ដៃ​ដុត​ជើង​និង បើក​ការ​ស្រាវ​ជ្រាវ​យ៉ាង​សកម្ម ដើម្បី​ស្វែង​រក​ក្រុម​ឃាតក ក៏​ដូច​ជាទី​កន្លែង​សម្លាប់​ស្រ្តី​បារាំង​នោះ​នៅ​មិន​ទាន់​រក​ឃើញ​នៅឡើយ។

លោកប្រាប់ថា៖​«យើង​បាន​ឲ្យ​គេ​មុជ​ទឹក​រាវ​រក​កន្លែង​ណា ដែល​យើង​សង្ស័យ​និង​គ្រាន់​តែ​ប្រទះ​ឃើញ​សំពត់​ពណ៌​ខ្មៅ​មាន​រូត​ពី​ខាង​ក្រោយ​មួយ​ប៉ុណ្ណោះ តែ​យើង​មិន​សន្និដ្ឋាន​ថា ជា​របស់​នាង​ទេ​ព្រោះ​គេ​ថា​នាង​បាន​ស្លៀក​ខោ​ពេល​ចេញ​ទៅ។

ឥឡូវបើ​ជន​ណា​ផ្តល់​ដំណឹង​និង​ដឹង​ពី​អត្តសញ្ញាណ​ឃាតក​ពិត​នោះ​សមត្ថកិច្ច​យើង​នឹង​ផ្តល់​រង្វាន់​ប្រាក់​មួយ​ពាន់​ដុល្លារ»។

លោកឲ្យដឹង​បន្ត​ថា ទាំង​សមត្ថកិច្ច​មក​ពី​ក្រសួង​មហាផ្ទៃ​និង​សមត្ថកិច្ច​ខេត្ត​កំពត​កំពុង​តែ​បន្ត​ការ​ស្រាវជ្រាវ​និង​ប្រើ​គ្រប់​វិធី​ក្នុង​ការ​តាម​រក​ទៅលើ​គោល​ដៅ​ដែល​សង្ស័យ​ថា អាច​រក​ឃើញ​តម្រុយ។

ការធ្វើកោសល្យវិច័យ​រួម​គ្នា​រវាង​មន្រ្តី​បច្ចេក​ទេស​ជំនាញ​របស់​ក្រសួង​មហាផ្ទៃ​ជាមួយ​កុងស៊ុល​បារាំង​និង​វេជ្ជបណ្ឌិត​​បារាំង​យ៉ាង​ហ្មត់​ចត់​ទៅ​លើ​សព​ស្រ្តី​ទេសចរ​ជាតិ​បារាំង ប៉ុន្តែ​រហូត​មក​ដល់​ពេល​នេះ​គ្មាន​សមត្ថកិច្ច​ជំនាញ​ណា​មួយ​អាច​វាយ​តម្លៃ​បាន​នៅ​ឡើយ​ថា ​យ៉ាង​ណាទេ។

កាលពីដំបូង​ពេល​ស្រង់​សពពី​ទឹក​មក​ពិនិត្យ​សមត្ថកិច្ច​ខេត្ត​កំពត​សន្និដ្ឋាន​ថា​ជា​អំពើ​ឃាត​កម្ម​ព្រោះ​សាក​សព​ស្រ្តី​រងគ្រោះ​ត្រូវ​គេ​វាយ​បែក​លលាដ៍​ក្បាល​និង​របួស​ដៃ និង​អាក្រាត​ទៀត។ សមត្ថកិច្ច​ជំនាញ​ដែល​បាន​ចុះ​ផ្ទាល់​កាល​ពី​រក​ឃើញស​ព​ថ្មីៗ​បាន​សន្និដ្ឋាន​ថា អាច​ជា​ករណី​រំលោភ​សម្លាប់​ច្រើន​ជាង​ការ​សន្និដ្ឋាន តែមួយ​មុខ​ទៅ​លើ​អំពើ​ឃាតកម្ម​ព្រោះ​សាក​សព​ត្រូវ​រងការ​វាយ​សម្លាប់។

ស្រ្តីរងគ្រោះឈ្មោះ Ophelie ជា​ទេសចរ​ជន​ជាតិ​បារាំង ត្រូវ​គេប្រទះ​ឃើញ​ស្លាប់​អណ្តែត​ទឹក​នៅ​ក្នុង​ព្រែក​មួយ​ក្នុង​ក្រុង​កំពត​នៅ​ក្នុង​ខែកុម្ភៈ។ Ophelie និង​មិត្តភក្តិ​នាង​បាន​ចូល​ស្នាក់​នៅ​ផ្ទះ​សំណាក់ Les Manguiers នៅ​កំពត​កាល​ពី​ថ្ងៃ​ទី៤​ខែកុម្ភៈ ជា​ភ្ញៀវ​ទេសចរ​ហើយ​គ្រោង​ចាក​ចេញ​វិញ នៅ​ថ្ងៃអាទិត្យ ប៉ុន្តែ​បាន​បាត់​ខ្លួន​ពី​ល្ងាច​ថ្ងៃ​សៅរ៍​និង​ប្រទះ​ឃើញ​សាកសព​នៅ​ថ្ងៃ​អាទិត្យ៕

អត្ថបទគួរចាប់អារម្មណ៍