The Phnom Penh Post Search

Search form




Logo of Phnom Penh Post newspaper Phnom Penh Post - វាយ​គ្នា​ក្នុង​វង់​ផឹក​ទឹក​ត្នោត​ជូរ​ម្នាក់​ស្លាប់ ២នាក់​ត្រូវ​ចាប់​ខ្លួន




វាយ​គ្នា​ក្នុង​វង់​ផឹក​ទឹក​ត្នោត​ជូរ​ម្នាក់​ស្លាប់ ២នាក់​ត្រូវ​ចាប់​ខ្លួន

វាយ​គ្នា​ក្នុង​វង់​ផឹក​ទឹក​ត្នោត​ជូរ​ម្នាក់​ស្លាប់ ២នាក់​ត្រូវ​ចាប់​ខ្លួន

តាកែវៈ សមត្ថកិច្ច​នគរបាល​ខេត្ត និង​កម្លាំង​នគរបាល​ស្រុក​បាទី បាន​ចាប់​ខ្លួន​ជន​សង្ស័យ​ជា​ជន​ដៃ​ដល់ ២ នាក់ ក្នុង​ករណី​សម្លាប់​មិត្ត​ភក្តិ​នៅ​ក្នុង​វង់​ផឹក​ស៊ី​បន្ទាប់​ពី​បាន​ព្រួត​គ្នា​វាយ​សម្លាប់​ជន​រង​គ្រោះ ក្នុង​ជម្លោះ​ពាក្យ​សម្តី​កាល​ពី​ថ្ងៃ​ទី​១៦ ខែ​មករា នៅ​ស្រុក​បាទី ខេត្ត​តាកែវ។

លោក ឃុត ឡូ អធិការ​រង​នគរបាល​ស្រុក​បាទី បាន​ឲ្យ​ដឹង​ថា ជន​សង្ស័យ​ដែល​កម្លាំង​សមត្ថកិច្ច​ចាប់​ឃាត់​ខ្លួន មាន​ឈ្មោះ សឿ ចាន់​សុជាតិ អាយុ​១៨​ឆ្នាំ​នៅ​ភូមិ​រលាំង​គ្រើល ឃុំ​ត្រពាំង​សាប ស្រុក​បាទី និង​ម្នាក់​ទៀត​ឈ្មោះ ឆិល ណុយ អាយុ​២២​ឆ្នាំ​នៅ​ភូមិ​ស្មៅ​ខ្ញី ឃុំ​ត្រពាំង​សាប​ស្រុក​បាទី ខេត្ត​តាកែវ ជា​មិត្ត​ភក្តិ​ជាមួយ​ជន​រង​គ្រោះ​ឈ្មោះ ពិន ប៉ាត់ អាយុ​២៨​ឆ្នាំ នៅ​ភូមិ​វាល​ប្រិយ ឃុំ​ចំបក់ ក្នុង​ស្រុក​បាទី ខេត្ត​តាកែវ​ដូច​គ្នា​ដែរ។

លោកប្រាប់ថា៖ «ជន​សង្ស័យ​ទាំង​២​នាក់ បាន​វាយ​ទៅ​លើ​ជន​រងគ្រោះ​នឹង​ដំបង​ឫស្សី​ត្រូវ​ចំ​កញ្ចឹង​ក​ពី​ក្រោយ​២​ដំបង និង​ចំ​បំពង់​ក២ ដំបង ខណៈ​ពួក​គេ​កំពុង​ផឹក​ស៊ី​ហើយ​ទាស់​ពាក្យ​សម្តី​គ្នា។ ពួកគេ​ទាំង​ពីរ​ត្រូវ​ជាប់​ចោទ​ពី​បទ​មនុស្ស​ឃាត​គិត​ទុក​ជា​មុន ហើយ​ត្រូវ​បញ្ជូន​ទៅ​កាន់​ស្នង​ការ​ដ្ឋាន​នគរបាល​ខេត្ត​កាល​ពី​ល្ងាច​ម្សិល​មិញ​បន្ទាប់​ពី​កសាង​សំណុំ​រឿង​រួច»។

លោក​ឲ្យ​ដឹង​តាម​ចម្លើយ​ជន​សង្ស័យ​ថា មុន​កើត​ហេតុ​នៅ​ថ្ងៃ​ទី១៦ មករា ជន​សង្ស័យ​២នាក់​រួម​នឹង​មិត្តភក្តិ​៤នាក់​ទៀត​បាន​នាំ​គ្នា​ទិញ​ទឹក​ត្នោត​ជូរ​ផឹក​រួម​គ្នា អស់​ចំនួន​២០​ដប (ដប​ទឹក​សុទ្ធ​កន្លះ​លីត្រ)​ក្នុង​នោះ មាន​ជន​រង​គ្រោះ​ម្នាក់​ដែរ​ដោយ​បាន​នាំ​គ្នា​ផឹក​តាំង​ពី​ថ្ងៃ​រហូត​ដល់​យប់​នៅ​សំ​យាប​ផ្ទះ។ ទំនង​ដោយ​ឡូឡា​ថ្លង់​ពេក ម្តាយ​ជន​រង​គ្រោះ​ក៏​បាន​បណ្តេញ​ចេញ ពួកគេ​ក៏​នាំ​គ្នា​​ទៅ​ផឹក​បន្ត នៅ​កណ្តាល​វាល​ស្រែ​ប៉ុន្តែ ទៅ​តែ​៣នាក់​ជន​រង​គ្រោះ​និង​ជន​ដៃ​ដល់​ទេ ចំណែក​ឯ​អ្នក​ផឹក​៣នាក់​ទៀត​បំបែក​គ្នា​ទៅ​ផ្ទះ​រៀងៗ​ខ្លួន​អស់​ទៅ។

លោក​អធិការ​បន្ត​ថា លុះ​ដល់​ម៉ោង​ជាង​៩​យប់ ដែល​ម្នាក់ៗ​ស្រវឹង​ជោក​រៀងៗ​ខ្លួន​ហើយ​នោះ​ក៏​នាំ​គ្នា​និយាយ​រំឭក​ពី​រឿង​រ៉ាវ​ពី​ថ្ងៃ​ដែល​ជន​សង្ស័យ​បាន​​ឲ្យ​ជន​រង​គ្រោះ​ជួយ​ចេញ​លុយ​ទិញ​ទឹក​ត្នោត​ជូរ​តែ​ជន​រងគ្រោះ​គ្មាន​លុយ ដោយ​និយាយ​ញយ​ដង​ពេក​បាន ធ្វើ​ឲ្យ​ជន​រងគ្រោះ​ច្រឡោត​ខឹង​ហើយ​ក៏​ទាស់​សម្តី​គ្នា។

លោក​ឲ្យ​ដឹង​ទៀត​ថា ពេល​នោះ​ជន​សង្ស័យ​ក៏​ផ្ទុះ​កំហឹង​បាន​យក​បំពង់​ឫស្សី​វាយ​ទៅ​លើ​ជន​រងគ្រោះ​ពី​ក្រោយ​តែ​ម្តង។​បន្ទាប់​ពី​វាយ​សន្លប់​ហើយ​ជន​សង្ស័យ​បាន​ដើរ​ទៅ​ផ្ទះ​មួយ​សន្ទុះ​តែ​មិន អស់​ចិត្ត​ក៏​នាំគ្នា​គេ​ម្នាក់​ទៀត​មក​មើល​ជន​រងគ្រោះ​ហើយ​បាន​យក​ទឹក​មួយ​ធុង​ស្រោច​លើ​ជន​រង​គ្រោះ ដើម្បី​ឲ្យ​ដឹង​ខ្លួន​វិញ​តែ​ក្រោយ​ពី​ដឹង​ថា​ជន​រងគ្រោះ​ស្លាប់​ពួកគេ​ក៏​ដើរ​ទៅ​ដេក​វិញ​ដោយ​មិន​ប្រាប់​គេ​ឲ្យ​ដឹង​ទេ លុះ​ព្រឹក​ឡើង​ទើប​ផ្អើល​ឆោឡោ​ឡើង និង​ឈាន​ដល់​ការ​ឃាត់​ខ្លួន​អ្នក​ទាំង​ពីរ។ ម្តាយ​ជន​រង​គ្រោះ​មិន​អាច​ទាក់​ទង​សុំ​បញ្ជាក់​ពី​ករណី​នេះ​បាន​ទេ​កាល​ពី​ម្សិលមិញ៕

អត្ថបទគួរចាប់អារម្មណ៍