The Phnom Penh Post Search

Search form




Logo of Phnom Penh Post newspaper Phnom Penh Post - វៃគ្នា​ប៉ូលិស​ដោះ​ស្រាយ​មិន​ចេញ​នាំ​គ្នា​ទៅ​ស្បថ​នៅ​វត្ត




វៃគ្នា​ប៉ូលិស​ដោះ​ស្រាយ​មិន​ចេញ​នាំ​គ្នា​ទៅ​ស្បថ​នៅ​វត្ត

វៃគ្នា​ប៉ូលិស​ដោះ​ស្រាយ​មិន​ចេញ​នាំ​គ្នា​ទៅ​ស្បថ​នៅ​វត្ត

សៀមរាបៈ រឿង​ហេតុ​ដេញ​កាប់​ចាក់​គ្នា​រវាង​ក្មេង​ទំនើង​ពីរ​ក្រុម​ក្នុង​វង់​រាំ ធុង​បាស​ដែល​ធ្វើ​ឲ្យ​សមត្ថកិច្ច​ពិបាក​កំណត់​មុខ​សញ្ញា ព្រោះ​តែ​ជន​រងគ្រោះ​មិន​ស្គាល់​អ្នក​វាយ ហើយ​បាន​ប្តឹង​ប៉ូលិស​ទារ​សំណង​ចំនួន​៣​លាន​រៀល​នោះ បាន​បញ្ចប់​ដោយ​ភាគី​ទាំង​ពីរ​នាំ​គ្នា​ទៅ​ស្បថ​ឲ្យ​បារមី​វត្ត​ប្រធាតុ នៅ​ស្រុក​ជីក្រែង ខេត្ត​សៀមរាប ឲ្យ​ផ្តល់​យុត្តិធម៌​ឲ្យ។

លោក ទូច សាកល អធិការ​ស្រុក​ជី​ក្រែង​ឲ្យ​ដឹង​ថា ករណី​ក្មេង​ទំនើង​២​ក្រុម​វៃគ្នា​របួស​បែក​ក្បាល​ហើយ​មក​ប្តឹង​ឲ្យ​សមត្ថកិច្ច​ដោះ​ស្រាយ លោក​បាន​ធ្វើ​ទៅ​តាម​នីតិវិធី​ហើយ ប៉ុន្តែ​ភាគី​ខាង​ជន​រងគ្រោះ​មិន​ចាំ​មុខ​អ្នក​បង្ក​ដូច្នេះ ពួកគេ​ក៏​ដក​ពាក្យ​បណ្តឹង​ទៅ​វិញ។

លោកថា៖«ដំបូង​ជន​រង​គ្រោះ​ប្តឹង​ទារ​៣​លាន​រៀល​ពី​អ្នក​បង្ក តែ​ពេល​កោះហៅ​ទាំង​ពីរ​ភាគី​ឲ្យ​មក​ឆ្លើយ​ប្រាប់​ពី​ភិន​ភាគ​អ្នក​បង្ក ទៅ​ជា​ខាង​ជន​រង​គ្រោះ​កំណត់​មិន​បាន​ពី​អ្នក​វាយ​ថា​នរណា​ប្រាកដ ហើយ​ពួកគេ​ដក​ពាក្យ​បណ្តឹង​និង​ណាត់​គ្នា​ទៅ​ស្បថ​បញ្ចប់​រឿង»។

លោក បូត ចិន នាយ​នគរបាល​ប៉ុស្តិ៍​ពង្រ​លើ​រំឭកថា នៅ​ថ្ងៃ​កើត​ហេតុ​ទី​១៥ កុម្ភៈ ក្នុង​ភូមិ​ត្រពាំង​ភ្លោះ ឃុំ​ពង្រលើ ស្រុក​ជីក្រែង​មាន​រៀបចំ​ពិធី​ហែ​អ្នកតា​ក្នុង​ភូមិ​និង​មាន​រាំ​ធុង​បាស​ពេល​យប់​តែ​ការ​រាំ​នោះ​បាន​បញ្ចប់​ទៅ​នៅ​ម៉ោង​ជា​១១​យប់ ហើយ​ក៏​ស្រាប់​តែ​មាន​ក្មេង​២​ក្រុម​វៃ​គ្នា​ខ្លះ​បែក​ក្បាល​ហូរ​ឈាម​និង​ ខ្លះ​របួស​ដៃ​ជើង​ទើប​នៅ​ថ្ងៃ​ទី១៧ ខែកុម្ភៈ​ខាង​ជន​រង​គ្រោះ​ទៅ​ប្តឹង​អធិការ​ស្រុក​ជីក្រែង។

លោកថា ក្រោយ​ទទួល​ពាក្យ​បណ្ដឹង​សមត្ថកិច្ច​បាន​កោះ​ហៅ​ភាគី​ទាំង​ពី​រឲ្យ​ចូល ទៅ​បំភ្លឺ។ ខាង​ជន​រងគ្រោះ​ ប៉ាវ ចែក ភេទ​ប្រុស​អាយុ​២០​ឆ្នាំ នៅ​ភូមិ​ព្រៃ​ទទឹង ឃុំ​ល្វែង​ឫស្សី ស្រុក​ជីក្រែង សង្ស័យ​ថា ឈ្មោះ ងាវ ​ឆាត​ ភេទប្រុស​អាយុ​២៥​ឆ្នាំ នៅ​ភូមិ​ជាមួយ​គ្នា​វាយ​ខ្លួន។ តែ​ខាង​ជន​រងគ្រោះ​ថា មិន​ចាំមុខ​អ្នក​បង្ក​ច្បាស់ ហើយ​ភាគី​ម្ខាង​ទៀត​ក៏​ប្រកែក​មិន​ទទួល​ការ​ចោទ​ប្រកាន់​ទើប​ធ្វើ​ឲ្យ សមត្ថកិច្ច​ដោះ​ស្រាយ​មិន​ចេញ ទីបំផុត​ពួកគេ​ក៏​បបួល​គ្នា​ទៅ​ស្បថស្បែ​នៅ​វត្ត​ប្រធាតុ ឃុំ​ខ្វាវ​បញ្ចប់​ក្តី។

លោក​នាយប៉ុស្តិ៍​ប្រាប់​ថា ពេល​ទៅ​ស្បថ​ខាង​ភាគី​ជន​រង​គ្រោះ​មាន​គ្នា​៩នាក់ រីឯ​មួយ​ក្រុម​ទៀត​មាន​គ្នា៨​នាក់។ ទាំង​សង​ខាង​មាន​ម្តាយ​ឪពុក​ទៅ​ជាមួយ​ផង​ព្រោះ​អ្នក​ស្រុក​នៅ​តំបន់​នោះ មាន​ជំនឿ​ខ្លាំង​លើ​បារមី​វត្ត​ប្រធាតុ​នោះ​ណាស់ ហើយ​រៀបចំ​ពិធី​យ៉ាង​ អធិក​អធម មាន​រៀប​ជា​បាយ​សី​និមន្ត​ព្រះសង្ឃ តាអាចារ្យ​រួម​និង​អ្នក​ស្រុក អ្នក​ភូមិ​ចូល​រួម​ច្រើន​ផង​និង​ប្រារព្ធ​ធ្វើ​រយៈពេល​២ម៉ោង។

លោកតា សោម ឆួន ជា​អាចារ្យ​គណៈកម្មការ​វត្ត​ប្រធាតុ​ឲ្យដឹង​ថា​លោក​មិន​បាន​ចូលរួម​ទេ​ប៉ុន្តែ​បាន​ដឹង​ថា ពួក​គេបាន​និមន្ត​ព្រះសង្ឃ​សូត្រ​ធម៌​ប្រោះ​ព្រំ​ឲ្យ​ពួកគេ បាន​នាំ​គ្នា​ដុត​ធូប​ស្បថ​សច្ចា​នៅ​ក្នុង​ព្រះវិហារ នៅ​ចំពោះ​មុខ​ព្រះ​ភក្រ្ត​ព្រះពុទ្ធ​បដិមា ដែល​គេ​ជឿថា​ព្រះពុទ្ធ​អង្គនោះ មាន​បារមី​ពូកែ​ស័ក្តិ​សិទិ្ធ​ណាស់។ លោកតា​បន្ត​ថា ពួកគេ​ស្បថ​ថា ​បើ​អ្នក​ធ្វើ​ខុស ហើយ​មិន​ទទួល​កំហុស​​ សូម​ឲ្យ​បារមី​វត្ត​ដាក់​បណ្តាសា ឲ្យជួប​តែ​ក្តី​វិនាស​ដល់​ជីវិតផង៕

អត្ថបទគួរចាប់អារម្មណ៍