The Phnom Penh Post Search

Search form




Logo of Phnom Penh Post newspaper Phnom Penh Post - សង្ស័យ​ចោរ​លួច​គោ​ព្រួតវ៉ៃ​ស្លាប់​រួច​ដុត​សព​ឃាត់​ជន​ដៃ​ដល់​បី​នាក់

សង្ស័យ​ចោរ​លួច​គោ​ព្រួតវ៉ៃ​ស្លាប់​រួច​ដុត​សព​ឃាត់​ជន​ដៃ​ដល់​បី​នាក់

សង្ស័យ​ចោរ​លួច​គោ​ព្រួតវ៉ៃ​ស្លាប់​រួច​ដុត​សព​ឃាត់​ជន​ដៃ​ដល់​បី​នាក់

កំពង់ស្ពឺៈ ប៉ូលិស​ព្រហ្ម​ទណ្ឌ​ខេត្ត កាល​ពី​ម្សិល​មិញ​នេះ បាន​ឃាត់​ខ្លួន​ជន​ដៃ​ដល់ ៣ នាក់ ក្នុង​ចំណោម​ ២០ នាក់ ដែល​បាន​ព្រួត​គ្នា​វាយ​សម្លាប់ និង​ដុត​សាក​សព​បុរស​មាន​ជំងឺ​សរសៃ​ប្រសាទ​ម្នាក់ ដែល​ពលរដ្ឋ​បាន​ចោទ​ថា ជា​ចោរ​លួច​គោ​របស់​អ្នក​ភូមិ​ស្រែ​អំបិល ឃុំ​ត្រពាំង​គង ស្រុក​សំរោង​ទង​ ខេត្ត​កំពង់ស្ពឺ។

ស្នងការ​រង​នគរបាល​ខេត្ត​កំពង់ស្ពឺ និង​ជា​ប្រធានការិយា​ល័យ​កណ្តាល ទទួល​បន្ទុក​ព្រហ្ម​ទណ្ឌ​ លោក សោម បូរ៉ា បាន​ប្រាប់​ភ្នំពេញប៉ុស្តិ៍​ពី​ម្សិល​មិញ​ថា សមត្ថកិច្ច​ឃាត់​ខ្លួន​ជន​ដៃ​ដល់​ជា​មេខ្លោង​និង​គ្នីគ្នា​ ៣ នាក់ ក្នុង​ចំណោម​ ២០ នាក់ ដែល​កំណត់​អត្ត​សញ្ញាណ​រួច​នោះ ហើយ​លោក​បាន​ចាត់​ទុក​ថា​ នេះ​ជា​ទង្វើ​ឃោរ​ឃៅ​មួយ​ទៅ​លើ​ជន​រងគ្រោះ ដែល​អ្នក​ទាំង​នេះ​មិន​សហការ​នឹង​សមត្ថកិច្ច​ ព្រួត​គ្នា​វាយ​និង​មិន​ទុក​ឱកាស​ឲ្យ​ជន​រងគ្រោះ​និយាយ​អ្វី​សោះ​ឡើយ។

លោក បូរ៉ា អះអាង​ថា៖ «មាន​​តែ​តាម​ចាប់​ពួក​ហ្នឹង​ដាក់​គុក​ទាំង​អស់ ពួក​ហ្នឹង​ខូច​ ចោទ​គេ​ថា​ចោរ​លួច​គោ​ក្របី​ ចេះ​តែ​វាយ​គេ ​ឥឡូវ​ចាប់​បាន​ ៣ នាក់​ នៅ​សល់​ទៀត​មាន​ជាង​ ២០ នាក់ កំពុង​តែ​ដេញ​ចាប់​ខ្វាត់​ខ្វែង​...ក្រុម​គ្រួសារ​គេ​បាន​ប្តឹង​ហើយ»។

លោក សោម បូរ៉ា បន្តឲ្យ​ដឹង​ថា សមត្ថ​កិច្ចរក​ឃើញ​ថា​ ជន​រងគ្រោះ ឈ្មោះ នួន ពុទ្រា ហៅ​ចន្ទ្រា អាយុ ២៧ ឆ្នាំ នៅ​ភូមិ​ត្រពាំង​កែវ ឃុំ​ដំណាក់​អម្ពិល​ ស្រុក​អង្គ​ស្នួល​ ខេត្ត​កណ្តាល​។ តាម​រយៈ​សាច់​ញាតិ ជន​រងគ្រោះ​មាន​ជំងឺ​សរសៃ​ប្រសាទ ដែល​មាន​លិខិត​បញ្ជាក់​ពី​មន្ទីរ​ពេទ្យ​សម្តេច​ឪ ជា​ភ័ស្តុតាង​ផង ហើយ​បាន​បាត់​ខ្លួន​ពី​ផ្ទះ​ជាង​ ១ ខែ​មក​ហើយ។

មេ​ភូមិ​ស្រែ​អំបិល លោក ជួប ណន ឲ្យ​ដឹង​ថា ថ្ងៃ​កើត​ហេតុ​នៅ​ម៉ោង​ ៨:៣០ ​នាទី​យប់ ជន​រង​គ្រោះ​បាន​ដើរ​លប​ចូល​ក្នុង​ផ្ទះ​មួយ​នៅ​ចុង​ភូមិ តែ​ត្រូវ​បាន​ម្ចាស់​ផ្ទះ​ឃើញ​ចាប់​បញ្ជូន​មក​ស្នាក់​ការ​ភូមិ ដោយ​សង្ស័យ​ថា ជា​ចោរ​លួច​គោ ព្រោះ​ថ្មីៗ​នេះ​គោ​អ្នកភូមិ​ជាង​ ១០ ក្បាល​​បាត់​ដោយ​មិន​ដឹង​មូល​ហេតុ។

លោកបន្ត​ថា រហូត​ដល់​ម៉ោង ៩ យប់ ខណៈ​លោក​កំពុង​តែ​ទាក់​ទង​ទៅ​ប៉ូលិស ស្រាប់​តែ​​អ្នក​ភូមិ​ស្ទើរ​តែ​មួយ​ភូមិ មក​ព្រួត​គ្នា​វាយ​ជន​រងគ្រោះ ទោះ​បី​ជា លោក​ព្យាយាម​ឃាត់ ហើយ​ប៉ូលិស​ ៤ នាក់​ទៀត​ចុះ​មក​អន្ត​រាគមន៍​ក្តី តែ​មិន​អាច​ឃាត់​បាន​រហូត​រង​របួស​ដោយ​ដុំ​ថ្ម​ទៀតផង។

លោកបន្ត​ថា ៖ «អ្នកភូមិ​មាន​កំហឹង​ខ្លាំង​ពេក ពួកគេ​គ្នា​ច្រើន​​វ៉ៃមួយ​ដៃ​មួយ​ជើង​ម្នាក់​ តែ​ជន​រងគ្រោះ​អត់​ទាន់​ស្លាប់​ទេ ប៉ូលិស​ឃាត់​ដែរ តែ​គ្មាន​​អ្នកណា​ស្តាប់​ទេ ក្រោយ​មក​ពួក​គេ​អូស​ជន​រងគ្រោះ​ទៅ​វាយ​បន្ថែម​នៅ​កណ្តាល​ស្រែ​រហូត​ដល់​ស្លាប់​ ហើយ​ដុត​សព​នោះ​ទៀត​ តែ​ឆេះ​មិនអស់​ទេ​ សមត្ថកិច្ច​ទៅ​ឃាត់​ទាន់ ហើយ​អ្នក​វាយ​ទាំង​នោះ​ក៏​រត់​អស់»។

បើ​តាម​លោក​មេភូមិស្រែអំបិល​ ជួប ណន ករណី​បែប​នេះ​ គឺ​មិន​ធ្លាប់​កើត​មាន​ក្នុង​ភូមិ​នេះ​ឡើយ។

ពាក់​ព័ន្ធ​នឹង​រឿង​នេះ ប្រធាន​ផ្នែក​បច្ចេក​ទេស​ស៊ើប​អង្កេត​របស់​អង្គការ​សិទ្ធិមនុស្ស​លីកាដូ លោក អំ សំអាត យល់​ឃើញ​ថា​ ទង្វើ​វាយ​សម្លាប់​ដោយ​ក្រុម​មនុស្ស​ទៅ​លើ​ជន​សង្ស័យ តាម​រយៈ​ការ​ចោទ​ប្រកាន់​ថា ជា​ចោរ​បែប​នេះ ​គឺ​បណ្តាល​មក​ពី​គាត់​មាន​គំនុំ និង​បាត់បង់​ជំនឿ​ទុក​ចិត្ត​លើ​ប្រព័ន្ធ​តុលាការ​ពី​មុន​មក ប៉ុន្តែ​ ជន​ដៃ​ដល់​ទាំង​នេះ​នឹង​ត្រូវ​ប្រឈម​​ចំពោះ​មុខ​ច្បាប់​ជុំវិញ​បទ​ល្មើស​ឧក្រិដ្ឋ។

លោក​បន្ត​ថា៖ «នេះ​ជា​វប្បធម៌​ដែល​បន្សល់​ពី​មុន​មក ពល​រដ្ឋ​អស់​ជំនឿ​លើ​ប្រព័ន្ធ​តុលាការ ដោយសារ​ភាព​អយុត្តិធម៌ បង្ក​ជា​គំនុំ ចង់​ឈ្នះ​តុលា​ការ ទើប​វាយ​ជន​សង្ស័យ​ដល់​ស្លាប់​បែបនេះ»៕

អត្ថបទគួរចាប់អារម្មណ៍