The Phnom Penh Post Search

Search form




Logo of Phnom Penh Post newspaper Phnom Penh Post - សភាព​មន្ត្រី​សហជីព​រងរបួស​ធ្ងន់ធ្ងរ ឯ​កម្មករ Dayup នៅ​បន្ត​តវ៉ា

សភាព​មន្ត្រី​សហជីព​រងរបួស​ធ្ងន់ធ្ងរ ឯ​កម្មករ Dayup នៅ​បន្ត​តវ៉ា

សភាព​មន្ត្រី​សហជីព​រងរបួស​ធ្ងន់ធ្ងរ ឯ​កម្មករ Dayup នៅ​បន្ត​តវ៉ា

ភ្នំពេញៈ សមាជិក​សហជីព​ពីរ​នាក់​ដែល​បាន​រង​ការ​វាយ​ដំ​ដល់​រង​របួសធ្ងន់​នៅ រោងចក្រ​ Dayup Global កាល​ពី​ថ្ងៃ​ចន្ទ នៅ​មន្ទីរ​ពេទ្យ​កាល់​ម៉ែត អាច​នឹង​បញ្ជូន​ទៅ​មន្ទីរ​ពេទ្យ​ប្រទេស​វៀតណាម ព្រោះ​តែ​ស្ថាន​ភាព​របួស​ធ្ងន់​ ចំណែក​ក្រុម​កម្មករ​ក៏​មាន​គម្រោង​ដង្ហែ​ក្បួន​បាតុកម្ម​តវ៉ា ទៅ​ក្រសួង​សង្គមកិច្ច​ផង​ដែរ​នៅ​ចុង​សប្ដាហ៍​នេះ។

លោក សំ សឿន ​ប្រធាន​សហព័ន្ធ​សហជីព​ដើម្បី​សិទ្ធិ​ការងារ​បាន​ឲ្យ​ដឹង​ថា គ្រូ​ពេទ្យ​ប្រាប់​អ្នក​របួស​ទាំង​ពីរ​ថា ស្ថាន​ភាព​អាច​នឹង​បញ្ជូន​ទៅ​សង្គ្រោះ​នៅ​ឯ​មន្ទីរ​ពេទ្យ​ប្រទេស​វៀតណាម ​ព្រោះ​មាន​សភាព​ធ្ងន់ធ្ងរ​ពេក។​

លោក​បន្ត​ថា៖«​សមាជិក​ម្នាក់​អាច​ប្រឈម​នឹង​ពិការ​ភាព​ឬ​បាត់​ការ​ចង​ចាំ។​ ឯ​ម្នាក់​ទៀត​អាច​នឹង​ពិការ​ភ្នែក​ម្ខាង ​ដោយ​សារ​តែ​ក្រុម​កម្មករ​ទំនើង​ក្នុង​រោង​ចក្រ​ Dayup ​Global វាយ​យ៉ាង​ដំណំ​ក្នុង​បំណង​សម្លាប់»។

អ្នក​ទាំង​ពីរ​គឺ​ លោក ឡូយ ​សុជាតិ ​អាយុ​៣៧​ឆ្នាំ​ ជា​មន្ត្រី​សហព័ន្ធ​សហជីព​កម្មករ​ខ្មែរ​ដែល​រង​របួស​ក្បាល ​មិន​អាច​និយាយ​បាន​។​ រីឯ​លោក សំ ​វិសូរ ​អាយុ​២៥​ឆ្នាំ​ ជា​ប្អូន​ប្រុស​លោក​ សំសឿន មិន​អាច​បើក​ភ្នែក​ និង​និយាយ​បាន​ដែរ។

សហជីព​ទាំង​បួន​រូប​នេះ​បាន​ចុះ​ទៅ​ចែក​ខិត្ត​ប័ណ្ណ​ដល់​កម្មករ​នៅ​រោងចក្រ​ Dayup Global និង​ពន្យល់​កម្មករ​ឲ្យ​យល់​ពី​សិទ្ធិ​ក្នុង​ការ​ទាមទារ​លក្ខខណ្ឌ​តាម​ ច្បាប់​ត្រឹមត្រូវ។ តែ​នៅ​ពេល​ចែក​រួច​ កំពុង​ហូប​អាហារ​ពេល​ព្រឹក​ជិត​នោះ​នៅ​ម៉ោង​ជាង​៧ ស្រាប់​កម្មករ​ប្រហែល​៤០​នាក់ ប្រដាប់​ដោយ​ដុំ​ដែក​ ដំបង​ឈើ និង​កាំបិត​ប៉័ងតោ បាន​ដើរ​សំដៅ​ទៅ​រក និង​បាន​វាយ​ប្រហារ​លើ​ពួក​គេ​។​ នេះ​បើ​តាម​លោក​ សំសឿន អះអាង​ ហើយ​លោក​ថា រឿង​នេះ​លោក​បាន​ប្តឹង​ទៅ​តុលាការ​រាជធានី អង្គការ​ពល​កម្ម​អន្តរ​ជាតិ​ (ILO)មជ្ឈ​មណ្ឌល​អាមេរិក​ដើម្បី​​សាមគ្គី​ភាព​ការងារ​អន្តរជាតិ​(​A-CI LS) ក្រសួង​ការងារ ​ស្ថាន​ទូត​កូរ៉េ និង​ក្រសួង​សង្គមកិច្ច ឲ្យ​ជួយ​រក​យុត្តិ​ធម៌​រួច​ហើយ។​

លោក សំ សឿន​ថា៖«​ខ្ញុំ​ចង់​ឲ្យ​តុលាការ​ និង​មន្ត្រី​ពាក់​ព័ន្ធ​រក​យុត្តិធម៌​និង​ផ្ដន្ទា​ទោស​កម្មករ​ទំនើង​ទាំង ​នោះ​ និង​អ្នក​គ្រប់គ្រង​ក្រុម​ហ៊ុន​​ឈ្មោះ ​យ៉ង ​រិទ្ធី ​តាម​ផ្លូវ​ច្បាប់​»។ លោក​ថា ​កម្មករ​បាន​តវ៉ា​នៅ​មុខ​រោង​ចក្រ​ទាមទារ​ឲ្យ​បណ្ដេញ​អ្នក​គ្រប់​គ្រង​ រដ្ឋបាល ចាប់​ខ្លួន​កម្មករ​ទំនើង​ និង​ទាមទារ​លក្ខខណ្ឌ​១៧​ចំណុច​ហើយ​ពួក​គេ​ក៏​មាន​គម្រោង​ដើរ​ក្បួន​ទៅ ក្រសួង​សង្គមកិច្ច​ដែរ​នៅ​ចុង​សប្តាហ៍​នេះ​។

កម្មករ​អាយុ​២៦​ ឆ្នាំ​មួយ​រូប​ពី​ម្សិលមិញ​ប្រាប់​ថា ​កម្មករ​ជាង​៥០០​នាក់​បាន​នាំ​គ្នា​តវ៉ា​នៅ​មុខ​រោងចក្រ​នេះ ទាម​ទារ​ឲ្យ​ក្រុមហ៊ុន​បណ្ដេញ​ប្រធាន​រដ្ឋបាល​ឈ្មោះ ​យ៉ង រិទ្ធី ចេញ​និង​ទាមទារ​ចំណុច​ផ្សេងៗ​ទៀត​។

លោក យ៉ង រិទ្ធី អ្នក​គ្រប់​គ្រង​រដ្ឋ​បាល​រោងចក្រ Dayup Global បាន​បដិសេធការ​ចោទ​ប្រកាន់​លើ​រូប​គាត់​ដដែល​ពី​ម្សិលមិញ។ គាត់​និយាយ​ថា៖«ខ្ញុំ​នៅ​តែ​អះអាង​ថា​យើង​គ្មាន​អ្វី​ខុស​។ ​មន្ត្រី​សហជីព​មក​បង្ក​រឿង​ឲ្យ​កម្មករ​តវ៉ា​ទាម​ទារ​ចំណុច​មួយ​ចំនួន​ ដែល​យើង​ផ្ដល់​ឲ្យ​កម្មករ​រួច​មក​ហើយ»។ លោក​ថា ការ​ទាមទារ​បណ្តេញ​គាត់​នោះ មិន​អាច​ទេ​ ព្រោះ​មាន​កម្មករ​តែ​ជាង​២០​នាក់​ចង់​ឲ្យ​គាត់​ឈប់ តែ​មាន​ច្រើន​ណាស់​គាំទ្រ​លោក៕PN

អត្ថបទគួរចាប់អារម្មណ៍