The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​កំពុង​ស៊ើប​អង្កេត​រក​អ្នក​សម្លាប់​បុរស​ពីរ​នាក់

សមត្ថកិច្ច​កំពុង​ស៊ើប​អង្កេត​រក​អ្នក​សម្លាប់​បុរស​ពីរ​នាក់

សមត្ថកិច្ច​កំពុង​ស៊ើប​អង្កេត​រក​អ្នក​សម្លាប់​បុរស​ពីរ​នាក់

ស្ទឹងត្រែងៈ សព​បុរស ២​នាក់ មាន​ចង​ស្លាប​សេក​ហើម​ស្អុយ​ត្រូវ​គេ​ប្រទះ​ឃើញ​នៅ​ក្រោម​ទូក​ឈើ​មួយ​លើ​ឆ្នេរ​ខ្សាច់​ជាប់​មាត់​ទន្លេ​ស្ថិត​ក្នុង ភូមិ​ភ្លុក ឃុំ​ភ្លុក ស្រុក​សេសាន កាល​ពី​ថ្ងៃ​ចន្ទ។

លោក កាន់ ប៊ុនសុយ អធិការ​រង ស្រុក​សេសាន បាន​ឲ្យ​ដឹង​ថា ជន​រងគ្រោះ​មាន​ឈ្មោះ វ៉ាន់ វែង ភេទ​ប្រុស អាយុ ៥៦​ឆ្នាំ ជា​អ្នក​រក​ត្រី​រស់​នៅ ភូមិ​បានម៉ៃ ឃុំ​កំភុន ស្រុក​សេសាន និង​ម្នាក់​ទៀត​ឈ្មោះ ផាន់ ណារៈ ភេទ​ប្រុស អាយុ ៣៩​ឆ្នាំ ជា​កម្មករ​នៅ​ក្រុមហ៊ុន​វារី​អគ្គិសនី មាន​ស្រុក​កំណើត​នៅ ស្រុក​សំរោងទង ខេត្ត​កំពង់ស្ពឺ។

លោក​បាន​បន្ត​ថា៖ «នេះ​ជា​ករណី​ឃាតកម្ម​ហើយ​វា​កើត​ឡើង​ពី​ទំនាស់​នៅ​ក្នុង​ពេល​ផឹក​ស៊ី»។

លោក​បាន​បន្ថែម​ថា ជន​រងគ្រោះ​ត្រូវ​គេ​កាប់​នឹង​ពូថៅ​រួច​ចង​ស្លាប​សេក​ហើយ​អូស​សាកសព​យក​ទៅ​ដាក់​ជាមួយ​គ្នា​ដោយ​យក​ទូក​ឈើ​មួយ​គ្រឿង​ផ្កាប់​គ្រប​ពី​លើ»។

លោក​បាន​ឲ្យ​ដឹង​ទៀត​ថា នៅ​ក្បែរ​កន្លែង​កើត​ហេតុ​ឃើញ​មាន​ពូថៅ ដំបង សម្បក​កំប៉ុង​ស្រាបៀរ និង​កាក​សំណល់​គ្រឿង​ក្លែម​ជាច្រើន​ទៀត។

លោក​អធិការ​រង​បន្ថែម​ទៀត​ថា ករណី​នេះ បាន​កើត​ឡើង​តាំង​ពី​ថ្ងៃ ទី​១៣ ខែ​មីនា ហើយ​នៅ​ពេល​ដែល​នគរបាល​មូលដ្ឋាន​ទទួល​បាន​ពាក្យ​បណ្តឹង​វា​កន្លង​ផុត​ទៅ ២-៣ ថៃ្ង​ទៅ​ហើយ ជា​ពេល​ដែល​ក្រុម​ជន​ល្មើស​គេច​ខ្លួន​បាត់​ចេញ​ពី​ខេត្ត​នេះ ប៉ុន្តែ​សមត្ថកិច្ច​បាន​កំណត់​មុខ​សញ្ញា​ជន​ល្មើស​រួច​ហើយ គឺ​ពួក​គេ​ជា​កម្មករ​ធ្វើ​ការ​នៅ​ក្រុមហ៊ុន​សង់​ទំនប់​វារី​អគ្គិសនី​ជាមួយ​ជន​រងគ្រោះ។

លោក​បាន​បន្ត​ថា៖ «មុខ​សញ្ញា​ជន​បង្ក​បាន​រត់​គេច​ខ្លួន​អាច​ថា ទៅ​ស្រុក​កំណើត​របស់​ពួក​គេ ទៅ​ខេត្ត​ផ្សេង ឬ​អាច​ថា ឆ្លង​ដែន​ទៅ ថៃ»។ ប៉ុន្តែ​ទោះ​ជា​យ៉ាង​ណា លោក កាន់ ប៊ុនសុយ បាន​អះអាង​ថា បើ​ទោះ​បី​ជា​ជន​ប្រព្រឹត្ត​អំពើ​ឃាតកម្ម​នេះ បាន​រត់​គេច​ទៅ​ដល់​ទី​ណា​ក៏​ដោយ ក៏​សមត្ថកិច្ច​នៅ​តែ​បន្ត​ធ្វើ​ការ​ស្រាវជ្រាវ​តាម​ចាប់​ខ្លួន​យក​មក​ផ្តន្ទាទោស​ឲ្យ​ទាល់​តែ​បាន៕

អត្ថបទគួរចាប់អារម្មណ៍