ព្រះវិហារៈសមត្ថកិច្ចនគរបាលស្រុកជាំក្សាន្តនៅតែបន្តស្វែងរកចាប់ខ្លួនជនសង្ស័យ៣នាក់ បន្ទាប់ពីបានធ្វើសកម្មភាពចាក់សម្លាប់មន្ត្រីប៉ូលិសព្រំដែនគោកវរៈលេខ១០៥ ដោយកាំបិតចុងស្រួចនៅក្នុងការដ្ឋានស្តុកថ្មរបស់ក្រុមហ៊ុនសាម៉េត ក្នុងឃុំមរកត កាលពីថ្ងៃទី១៧ វិច្ឆិកាកន្លងទៅ។
លោក ម៉ី ឆៃយ៉ាន អធិការរង នគរបាលស្រុកជាំក្សាន្ត កាលពីម្សិលមិញប្រាប់ថា ជនសង្ស័យទាំង៣នាក់ដែលចាក់សម្លាប់មន្ត្រីនគរបាល ឈ្មោះឆេង ណាកអាយុ៤៣ឆ្នាំ នៅភូមិគគីរ ឃុំអន្ទង ស្រុកអន្លង់វែង ខេត្តឧត្តរមានជ័យ ឈ្មោះ ឆេង គ្រី អាយុ៤០ឆ្នាំនៅភូមិគោកស្នូល ឃុំគោកដូងស្រុកអង្គរជុំ ខេត្តសៀមរាប និងម្នាក់ទៀតសមត្ថកិច្ចគ្រាន់តែស្គាល់ឈ្មោះតែមិនដឹងលំនៅពិតទេ។ រីឯជនរងគ្រោះឈ្មោះតាន់ ប៊ុន អាយុ៤៤ឆ្នាំ ជាអនុបញ្ជាការវរសេនាតូចលេខ១០៥ប្រចាំស្រុកជាំក្សាន្ត។
លោក សៃ ស៊ឹម អធិការរងទទួលផែនសន្តិសុខនគរបាលស្រុកបានឲ្យដឹងពីម្សិលមិញដែរថា ឃាតកម្មលើមន្ត្រីនគរបាលព្រំដែនគោកលេខ១០៥នេះ លោកមិនដឹងថា រវាងជនរងគ្រោះនិងជនសង្ស័យមានគំនុំនឹងគ្នានោះទេ ប៉ុន្តែជនសង្ស័យជាកម្មករនៅក្នុងក្រុមហ៊ុននោះ រីឯជនរងគ្រោះជាមេការក្នុងក្រុមហ៊ុន។
លោកឲ្យដឹងបន្តថា ពេលជនសង្ស័យចាក់សម្លាប់ជនរងគ្រោះពេលកំពុងដាំបាយ ដោយចាក់ត្រូវក្រោមក្លៀក១កាំបិត និងត្រូវភ្លៅ១កាំបិត ហើយរត់គេចខ្លួនបាត់ខណៈជនរងគ្រោះត្រូវបានគេបញ្ជូនទៅមន្ទីរពេទ្យខេត្ត។
លោកបន្តថា៖ «ជនសង្ស័យទាំង៣ សមត្ថកិច្ចពិបាកស្វែងរកចាប់ខ្លួន ដោយសារតែពួកគេមិនមានលំនៅពិតប្រាកដ ប៉ុន្តែសមត្ថកិច្ចកំពុងបន្តស្រាវជ្រាវរកមុខសញ្ញាចាប់ជនទាំងនោះដាក់ទោសតាមច្បាប់ឲ្យបាន»៕
