The Phnom Penh Post Search

Search form

Logo of Phnom Penh Post newspaper Phnom Penh Post - សមត្ថកិច្ច​មិន​ទាន់​ចាប់​ខ្មាន់​កាំភ្លើង​បាញ់​សម្លាប់​បុគ្គលិក​កាណា​ឌីយ៉ា​និង​ក្មួយ




សមត្ថកិច្ច​មិន​ទាន់​ចាប់​ខ្មាន់​កាំភ្លើង​បាញ់​សម្លាប់​បុគ្គលិក​កាណា​ឌីយ៉ា​និង​ក្មួយ

សមត្ថកិច្ច​មិន​ទាន់​ចាប់​ខ្មាន់​កាំភ្លើង​បាញ់​សម្លាប់​បុគ្គលិក​កាណា​ឌីយ៉ា​និង​ក្មួយ

130410_09a
សមត្ថកិច្ចពិនិត្យសាកសពស្រី្តរងគ្រោះនៅកន្លែងកើតហេតុ រូប ន ប.ជ ក

ភ្នំពេញៈ សមត្ថកិច្ច​រាជធានី មិន​ទាន់​ចាប់​ខ្មាន់​កាំភ្លើង ដែល​បាន​បើក​ការ​បាញ់​ប្រហារ​យ៉ាង​ព្រៃផ្សៃ ប្រមាណ ១៥ គ្រាប់ បណ្តាល​ឲ្យ​ត្រូវ​ស្ត្រី​ម្នាក់​ និង​ក្មេង​ប្រុស​ម្នាក់​ស្លាប់​ភ្លាមៗ និង​ស្ត្រី​ជា​បង​និង​ជា​ម្តាយ​ម្នាក់​រង​របួស​កាល​ពី​ល្ងាច​ថ្ងៃ​អង្គារ នោះ​នៅ​ឡើយ​ទេ។

កាលពីម៉ោង​ប្រមាណ​ជាជិត ៦ ល្ងាច​ថ្ងៃ​អង្គារ ជន​សង្ស័យ ដែល​នគរ​បាល​មិន​ទាន់​អាច​កំណត់​អត្ត​សញ្ញាណ​នោះ​ បាន​បើក​ការ​បាញ់​ប្រហារ​ ទៅ​លើ​ស្ត្រី​ម្នាក់ ដែល​ជា​បុគ្គលិក​ធនាគារ​កាណា​ឌីយ៉ា ខណៈ​ដែល​ស្ត្រី​រូប​នោះ ត្រូវ​បាន​រថយន្ត​ក្រុម​ហ៊ុន​ដឹក​ទៅ​ដល់​មុខ​ផ្ទះ ហើយ​នាង​បាន​ដើរ​ទៅ​បើក​ទ្វារ​ផ្ទះ ក៏​ត្រូវ​ខ្មាន់​កាំភ្លើង ដែល​បាន​ពួន​ចាំ​ជា​ស្រេច បាន​ដក​កាំភ្លើង​បាញ់​សន្ធាប់​ជា​ច្រើន​គ្រាប់​សំដៅ​ទៅ​លើ​រូប​នាង​បណ្តាល​ឲ្យ​ត្រូវ​គ្រាប់​ស្លាប់​ភ្លាមៗ នៅ​កន្លែង​កើត​ហេតុ។ ដោយ​ឃើញ​ប្អូន​ស្រី ត្រូវ​គេ​បាញ់​ឲ្យ​ដេក​ដួល​នៅ​មុខ​ទ្វារ​ផ្ទះ ស្ត្រី​ជា​បង បាន​រត់​ទៅ​បើក​ទ្វារ​ជួយ​ប្អូន​ក៏​ត្រូវ​ខ្មាន់​កាំភ្លើង​បាញ់​ជា ច្រើន​គ្រាប់​បណ្តាល​ឲ្យ​រង​របួស ចំណែក​កូន​ប្រុស​តូច​ដែល​រត់​តាម ត្រូវ​គ្រាប់​ចំ​ក្បាល​ស្លាប់​ភ្លាមៗ។ អំពើ​បាញ់​ប្រហារ​ដ៏​ព្រៃផ្សៃ​នេះ បាន​កើត​ឡើង​នៅ​បុរី​ញូ​វថោន ក្នុង​ភូមិ​ព្រៃ​ទាខណ្ឌ​ពោធិ៍​សែន​ជ័យ។

តាម ​មន្ត្រី​នគរ​បាល​ប៉ុស្តិ៍​សង្កាត់​ចោម​ចៅ​ ដែល​បដិសេធ​សុំ​មិន​បញ្ចេញ​ឈ្មោះ បាន​ឲ្យ​ដឹង​ថា ស្ត្រី​រងគ្រោះ ដែល​ស្លាប់​មាន​ឈ្មោះ ទិត្យ ធារ៉ា អា​យុ ២៦ ឆ្នាំ ជា​បុគ្គលិក​ធនាគារ​កាណា​ឌីយ៉ា ក្នុង​ក្រុង​ភ្នំពេញ ត្រូវ​គ្រាប់​ចំនួន ៣ គ្រាប់ ចំ​ក្បាល​មួយ​គ្រាប់ ដៃ​ឆ្វេង​មួយ​គ្រាប់ និង​ដៃ​ស្តាំ​មួយ​គ្រាប់។ ក្មេង​ប្រុស​ដែល​ស្លាប់​ឈ្មោះ​យុទ្ធ ដា​រ៉ា អា​យុ ជាង ១ ខួប ត្រូវ​មួយ​គ្រាប់​ចំក្បាល។ ចំណែក​ស្ត្រី​ដែល​ត្រូវ​ជា​បង​ស្រី និង​ត្រូវ​ជា​ម្តាយ​ឈ្មោះ ទិត សុម៉ា​ឡែន អាយុ ៣៥ ឆ្នាំ ជាអតីត​តារា​ចម្រៀង ត្រូវ​ពីរ​គ្រាប់ មួយ​គ្រាប់​ចំ​ជើង និង​មួយ​គ្រាប់​ទៀត​ត្រូវ​បញ្ឆិត​ដង​ខ្លួន។

លោក ប៊ន សំអាត អធិការ​នគរបាល​ខណ្ឌ​ពោធិ៍​សែន​ជ័យ បាន​សន្និដ្ឋាន​ជំហាន​ដំបូង​ថា ជា​អំពើ​បាញ់​ប្រហារ​ដោយ​គំនុំ។ លោក​បន្តថា៖​«សមត្ថកិច្ច​កំពុង​តែ​ដុត​ដៃ​ដុត​ជើង ធ្វើ​ការ​ស៊ើប​អង្កេត​ស្រាវ​ជ្រាវ​រក​ចាប់​ខ្លួន​ជន​ដៃដល់»។

លោក ជួន សុវណ្ណ ស្នងការ​រាជធានី បាន​ថ្លែង​កាល​ពី​ម្សិល​មិញ​ថា ក្នុង​ហេតុ​ការណ៍​បាញ់​ប្រហារ​ដ៏​រន្ធត់​នេះ ​សមត្ថកិច្ច​កំពុង​តែ​ស្វះ​ស្វែង​រក​ឃាតក​ជា​ជន​ដៃដល់។ លោក​បញ្ជាក់​ថា៖​«ករណី​នេះ ខ្ញុំ​មិន​អាច​ផ្តល់​ព័ត៌មាន​ផ្សព្វ​ផ្សាយ​ជា​សាធារណៈ​បាន​ទេ ខណៈ​ដែល​រឿង​នេះ​កំពុង​ស្ថិត​ក្នុង​រង្វង់​នៃ​ការ​ស្រាវ​ជ្រាវ​ស៊ើប​អង្កេត»។

មន្រ្តីនគរបាល​សង្កាត់​ចោមចៅ បាន​ឲ្យ​ដឹង​ថា នៅ​កន្លែង​កើត​ហេតុ សមត្ថកិច្ច បាន​រក​ឃើញ​សំបក​គ្រាប់​ចំនួន​ពី ៥ ទៅ ៦ គ្រាប់ ហើយ​កាំភ្លើង​ដែល​ប្រើ​ក្នុង​ការ​បាញ់​ប្រហារ​នោះ ម៉ាក​ឡុក ដែល​ខ្មាន់​កាំភ្លើង អាច​បាញ់​អស់​គ្រាប់​ប្រមាណ ១៥ គ្រាប់៕

អត្ថបទគួរចាប់អារម្មណ៍