The Phnom Penh Post Search

Search form

Logo of Phnom Penh Post newspaper Phnom Penh Post - សមត្ថកិច្ច​ស្រុក​ស្នួល​ចាប់​ឡាន​ដឹក​ឈើ​បាន​៤​គ្រឿង

សមត្ថកិច្ច​ស្រុក​ស្នួល​ចាប់​ឡាន​ដឹក​ឈើ​បាន​៤​គ្រឿង

សមត្ថកិច្ច​ស្រុក​ស្នួល​ចាប់​ឡាន​ដឹក​ឈើ​បាន​៤​គ្រឿង

ក្រចេះ: ក្រុម​មន្ត្រី​អភិរក្ស​ជីវចម្រុះ ដែន​ជម្រក​សត្វ​ព្រៃ​ស្នួល និង​អាជ្ញាធរ​ដែន​ដី បាន​បង្ក្រាប​រថយន្ដ​ដឹក​ឈើ​ខុស​ច្បាប់ ៤​គ្រឿង​ដែល​ផ្ទុក​ពេញ​ដោយ​ឈើ​ប្រណីត ប្រភេទ​កកោះ​និង​ស្រឡៅ ប្រមាណ ជាង ២០ ម៉ែត្រ​គុប​ក្នុង​តំបន់​ដី​ព្រៃ​សម្បទាន​របស់​ក្រុមហ៊ុន​ធីធីវ៉ាយ នៅ​ចំណុច​គីឡូម៉ែត្រ​លេខ​១៣១ ក្នុង​ភូមិសាស្ដ្រ​ដែន​ជម្រក​សត្វ​ព្រៃ​ស្នួល។

តាម​ប្រភព​ពី​មន្ត្រី​នគរបាល​ស្រុក​ស្នួល​ម្នាក់​ដែល​ស្នើ​សុំ​មិន​បញ្ចេញ​ឈ្មោះ បាន​ឲ្យ​ដឹង​កាល​ពី​ម្សិលមិញ​ថា ការ​បង្ក្រាប​ក្នុង​រយៈ​ពេល​ពីរ​ថ្ងៃ​មក​នេះ គឺ​ថ្ងៃ​ទី១០ និង​ទី១១ មិថុនា សមត្ថកិច្ច​បាន​ចាប់​រឹប​អូស​បាន​ឈើ​ប្រណីត​ប្រមាណ​ជាង​២០​ម៉ែត្រ​គុប និង​រថយន្ត​សម្រាប់​ប្រព្រឹត្ត​បទ​ល្មើស​ចំនួន​៤​គ្រឿង ក្នុង​នោះ​មាន​ប្រភេទ​រថយន្ត​កាមរី​ឆ្លាម​មួយ​គ្រឿង កាមរី​បាឡែន​មួយ​គ្រឿង និង​រថយន្ត​ធុន​ធំ​មួយ​គ្រឿង ប៉ុន្តែ​អ្នក​បើក​បរ​បាន​រត់​គេច​ខ្លួន​។

មន្ត្រី​ដដែល​ឲ្យ​ដឹង​ទៀត​ថា៖ «បច្ចុប្បន្ន ឈើ​ប្រណីត​ទាំង​នោះ​នឹង​រថយន្ត​ដឹក​ឈើ​នោះ​ត្រូវ​បាន​នាំ​យក​ទៅ​រក្សា​ទុក ក្នុង​ទី​ស្នាក់ការ​អភិរក្ស ជីវចម្រុះ ដែន​ជម្រក​ស្នួល ហើយ​រថយន្ត​តូច​ពីរ​គ្រឿង​នាំ​យក​ទៅ​រក្សា​ទុក​នៅ​អធិការដ្ឋាន​នគរបាល​ស្រុក​ស្នួល ដើម្បី​កសាង​សំណុំ​រឿង​បញ្ជូន​ទៅ​តុលាការ»។

លោក ឈឹម សាវុធ មន្ត្រី​ស៊ើប​អង្កេត​ជាន់​ខ្ពស់​មជ្ឈមណ្ឌល​សិទ្ធិ​មនុស្ស​កម្ពុជា បាន​ថ្លែង​ថា បទ​ល្មើស​ព្រៃ​ឈើ​តែង​តែ​កើត​មាន​ស្ទើរ​តែ​រៀង​រាល់​ថ្ងៃ ហើយ​ឈើ​ប្រណីត​រាប់​ពាន់​រាប់​ម៉ឺន​ម៉ែត្រ​គុប ត្រូវ​បាន​គេ​ដឹក​ចេញ​ឆ្លង​កាត់​តំបន់​ជម្រក​សត្វ​ព្រៃ​ស្នួល​ប៉ុន្តែ​ការ​បង្ក្រាប​ហាក់​ដូច​ជា​គ្មាន​ប្រសិទ្ធភាព​ទាល់​តែ​សោះ។

លោក​ថ្លែង​ថា៖ «ព្រៃ​ឈើ​នៅ​តំបន់​ភូមិ​ភាគ​ឦសាន រាប់​ចាប់​ពី​ព្រៃ​សហគមន៍​រហូត​ដល់​ព្រៃ​អភិរក្ស​ដែន​ជម្រក​សត្វ​ត្រូវ​បាន​ក្រុម​ឈ្មួញ​ទុច្ចរិត​កាប់​បំផ្លាញ ក្នុង​ទំហំ​មួយ​ស្ទើរ​តែ​ឈាន​ទៅ​រក​ភាព​ហិនហោច​ទាំង​ស្រុង ប៉ុន្តែ​អ្នក​ប្រព្រឹត្ត​បទ​ល្មើស​មិន​ត្រូវ​បាន​គេ​ចាប់​យក​មក​ផ្ដន្ទាទោស​តាម ផ្លូវ​ច្បាប់​នោះ​ទេ»។

លោក​បន្ត​ថា ករណី​បង្ក្រាប​បទ​ល្មើស​ព្រៃ​ឈើ ស្ទើរ​តែ​ទាំង​អស់​ត្រូវ​បាន​គេ​រាយការណ៍​ថា ចាប់​បាន​តែ​ឈើ និង​មធ្យោបាយ​ដឹក​ជញ្ជូន​ប៉ុន្តែ​មនុស្ស​ដែល​ជា​អ្នក​ប្រព្រឹត្ត មិន​ត្រូវ​បាន​ចាប់​ខ្លួន​នោះ​ទេ ដែល​នេះ​បង្ហាញ​ថា ការ​បង្ក្រាប​ធ្វើ​ឡើង​ដើម្បី​តែ​«ផល​ប្រយោជន៍​ឬ​លាភ​សក្ការៈ​ប៉ុណ្ណោះ មិន​មែន​ដោយ​ឆន្ទៈ​ទប់​ស្កាត់​បទ​ល្មើស​ព្រៃ​ឈើ​នោះ​ទេ»៕

អត្ថបទគួរចាប់អារម្មណ៍